ৰে'ল বিভাগত ভুৱা নিযুক্তিৰ বজাৰ

dainik janambhumi February 25, 2025

ডিজিটেল ডেস্ক: আমগুৰি ৰে'ল ষ্টেছনত ৰে'লৱে বিভাগত কৰ্মৰত এগৰাকী চতুৰ্থ বৰ্গৰ কৰ্মচাৰীয়ে উজনি অসমত মেলা চাকৰিৰ ভুৱা নিযুক্তিৰ বজাৰখনে এতিয়া সৰ্বত্ৰ চাঞ্চল্যৰ সৃষ্টি কৰিছে। এই বিষয়ে সবিস্তাৰে দৈনিক জনমভূমি কাকতত প্রকাশ পোৱাত এতিয়া প্ৰৱঞ্চনাৰ বলি হোৱা যুৱকসকল চাকৰিৰ বাবে দিয়া ধন হেৰুৱাই ভাগি পৰিছে। কিন্তু এই প্রৱঞ্চিত যুৱকসকলক এক অজ্ঞাত স্থানৰ পৰা আৰক্ষীৰ কাষ নাচাপিবলৈ বিভিন্নধৰণেৰে মুখ বন্ধ কৰিবলৈ উঠি-পৰি লাগিছে। 

অভিযোগ অনুসৰি, আমগুৰিস্থিত ৰে'লৱে কাৰ্যালয়ত কৰ্মৰত ৰাজীৱ নাথ পইন্টমেন হিচাপে কৰ্মৰত এজন চতুৰ্থ বৰ্গৰ চাকৰিয়াল। উজনি অসমৰ বিভিন্ন জিলাৰ বহু যুৱকৰ পৰা প্ৰৱঞ্চনাৰে কোটি কোটি টকা সৰকাই এতিয়া আত্মগোপন কৰি আছে ৰাজীৱ নাথে। আনহাতে, চাকৰি দিয়াৰ নামত বহু যুৱকক ৰে'লৱে বিভাগত লাভ কৰা চাকৰিৰ নিযুক্তি-পত্ৰও বিতৰণ কৰিছিল এই প্রৱঞ্চকটোবে। প্ৰৱঞ্চকটোৱে বিতৰণ কৰা এই নিযুক্তি-পত্ৰসমূহ পাই যুৱকসকলে ৰে'ল বিভাগত যোগদানৰ বাবে গন্তব্য স্থানলৈ ঢাপলি মেলিছিল। কিন্তু গন্তব্য স্থান পাইহে প্রকৃত কথা জানিব পাৰে এই যুৱকসকলে। কিয়নো এই চাকৰিত মকৰলৰ বাবে দিয়া নিযুক্তি-পত্ৰসমূহ ভুৱা। ফলত পুনৰ ঘৰলৈ ঘূৰি আহিবলৈ বাধ্য হয় প্ৰৱঞ্চিত হোৱা যুৱকসকল। আর্থিকভাৱে দুর্বল বহু নিবনুৱা যুৱকে মাটি-বাৰী বিক্ৰী কৰাৰ উপৰি ব্যক্তিগত বাহন আদি বিক্ৰী কৰাৰ লগতে ৰাতি-দিন একাকাৰ কৰি কষ্টেৰে উপার্জিত পইচাকেইটাও ৰে'লৱেত চাকৰি দিয়াৰ - প্রলোভনেৰে লৈ গ'ল দালালৰূপী নাথে। এতিয়া বাতৰি কাকতত ৰাজীৱ নাথৰ প্ৰৱঞ্চনাৰ কথা জানিব পাৰি তিনিচুকীয়া, ডিব্ৰুগড়, শিৱসাগৰ, আমগুৰি, টীয়ক, যোৰহাট, তিতাবৰ আৰু তেজপুৰৰ চাকৰি প্ৰত্যাশী যুৱকসকলৰ মাজত হাহাকাৰ লাগিছে। তাৎপর্যপূর্ণ বিষয় যে তিনিচুকীয়া ডিভিজনৰ ৰে'লৱে বিষয়া অতুলানন্দ ছাবট (ATULANANDA SABAT) আৰু এ কে সিনহা নামৰ ৰে'লৱে বিষয়া দুজনৰ পৃথকে পৃথকে স্বাক্ষৰিত অস্থায়ী ট্রেক মেইনটেইনাৰ হিচাপে ভুৱা নিযুক্তি-পত্ৰ দি আভুৱা-ভাঁৰে দালাল নাথে প্রায় বিভিন্ন ঠাইৰ দুই শতাধিক যুৱকক। পৰৱৰ্তীকালত পশ্চিম বংগৰ আলিপুৰস্থিত জনেল ৰে'লৱে ট্রেইনিং ইনষ্টিটিউটত (MDZRTI) চলিত বৰ্ষৰ ফেব্ৰুৱাৰী মাহৰ ১০ তাৰিখে প্ৰশিক্ষণৰ বাবে পঠায় যুৱকসকলক। আলিপুৰৰ হোটেলত কেইদিনমান থাকিবলৈ কৈ যোগাযোগ বিচ্ছিন্ন হয় প্ৰৱঞ্চক নাথৰ সৈতে যুৱকসকলৰ। ফলত কিংকর্তব্যবিমূঢ় হৈ ঘূৰি আহিল যুৱকসকল।

 ইতিমধ্যে ৰে'লৱে বিভাগৰ কৰ্মচাৰী দালালৰূপী নাথে ম'বাইল ফোন বন্ধ কৰি পলাই থকাৰ অভিযোগ তুলিছে ভুক্তভোগীসকলে। আনহাতে, দৈনিক জনমভূমি কাকতৰ অনুসন্ধানত পোহৰলৈ আহিছে এই ভুৱা নিযুক্তি-পত্ৰত স্বাক্ষৰিত দুই বিষয়াৰ কেতবোৰ সন্দেহজনক স্থিতি। ৰহস্যজনকভাৱে সাংবাদিকৰ পৰা আঁতৰি আছে এই দুই বিষয়া। এজন বিষয়াই এই বিষয়ে প্ৰৱঞ্চনাৰ বলি হোৱা যুৱকসকলে কিয় সংবাদ মাধ্যমক জনালে বুলিহে প্ৰশ্ন কৰে। আনহাতে, তিনিচুকীয়া ডিভিজনৰ এজন উচ্চপদস্থ বিষয়াৰ সৈতে যোগাযোগ কৰাত প্ৰৱঞ্চনাৰ বলি হোৱা যুৱকসকলক লিখিতভাৱে ভুৱা নিযুক্তি-পত্রসহ তিনিচুকীয়া ডিভিজনত অভিযোগ দাখিল কৰিবলৈ পৰামৰ্শ দিয়ে। এই অভিযোগ লাভ কৰিলে বিভাগীয়ভাৱে ৰাজীৱ নাথৰ লগতে সমগ্র বিষয়টো তদন্ত কৰাৰ আশ্বাস দিয়ে। অন্যহাতে, ৰে'লৱে বিভাগত চাকৰি কৰাৰ উপৰি মণিকূট নাট্যগোষ্ঠী নামৰ ভাওনা দলটোৰ সঞ্চালকৰ দৰে দায়িত্ব পালন কৰিছিল এই প্ৰৱঞ্চক নাথে। এই প্ৰৱঞ্চকটোৱে নিজে সঞ্চালকৰ দায়িত্বত থকা মণিকূট নাট্যগোষ্ঠীৰ উদ্যোগত ভগামুখৰ মৰিজাঁজীত এক ভাওনা প্রতিযোগিতাও অনুষ্ঠিত কৰিছিল। য'ত এই প্ৰৱঞ্চকটোৱে সম্পাদকৰ দৰে মুখ্য ভূমিকা পালন কৰিছিল। কিন্তু এই ভাওনা সমাৰোহত পেণ্ডেল, শব্দ, পোহৰৰ লগতে বহু দোকানত ৰাজীৱ নাথে পৰিশোধ নকৰিলে প্রাপ্য ধন। বিভিন্ন ঠাইৰ প্ৰৱঞ্চিত যুৱকসকলৰ অধিকাংশই হৈছে ভাওনাৰ লগত জড়িত কলা-কুশলী। ভাওনাৰ জৰিয়তে চিনাকি হৈ যুৱকসকলৰ মাজত জাল পেলাইছিল প্ৰৱঞ্চক ৰাজীৱ নাথে। বিভিন্ন অনুষ্ঠানত হাজাৰ হাজাৰ টকা অনুদান হিচাপে দি সমাজ হিতৈষীৰ ভাও দিয়া এইজন তথাকথিত পলাতক সাংস্কৃতিক কৰ্মীৰ বিৰুদ্ধে চৰকাৰে কেনে ব্যৱস্থা গ্রহণ কৰে সেয়া লক্ষণীয় হ'ব |

Share This