অমিত শ্বাহক 'অযোগ্য গৃহ মন্ত্রী' আখ্যা তৃণমূল কংগ্ৰেছৰ, এছ আই আৰ বিষয়ত মন্তব্যৰ পাছতে প্রতিক্রিয়া

dainik janambhumi November 22, 2025

ডিজিটেল ডেস্ক : কেন্দ্ৰীয় গৃহ মন্ত্রী অমিত শ্বাহে ভোটাৰ তালিকাৰ বিশেষ ব্যাপক সংশোধন (এছ আই আৰ)ৰ বিষয়ত কৰা মন্তব্যৰ বাবে শুকুৰবাৰে তৃণমূল কংগ্ৰেছে তেওঁক সমালোচনা কৰে। কেন্দ্ৰীয় চৰকাৰ ৰাষ্ট্ৰীয় নিৰাপত্তাত বিফল হৈছে বুলি অভিযোগ কৰি তৃণমূল কংগ্ৰেছে শ্বাহৰ পদত্যাগো দাবী কৰে। তৃণমূলৰ জ্যেষ্ঠ মন্ত্রী শশী পাঞ্জাই কয় যে শ্বাহ গুজৰাটলৈ যায় আৰু অনুপ্ৰৱেশ, গণতন্ত্ৰ আৰু ৰাষ্ট্ৰীয় সুৰক্ষাৰ কথা কয়, কিন্তু 'সত্যটো হৈছে সমগ্র দেশত গভীৰ অনিৰাপত্তাৰ ভাব আছে।' তেওঁ কয়, সন্ত্রাসবাদীয়ে কাশ্মীৰত পৰ্যটকক কৰা হত্যা আৰু দিল্লীত হোৱা এটা বিস্ফোৰণে দেখুৱায় 'গৃহ মন্ত্ৰীৰ নিৰীক্ষণত নিৰাপত্তাৰ কাঠাম (ফ্রেমৱৰ্ক) ভাগি পৰিছে।' 

তেওঁ কয়, 'যদি সীমান্তবোৰ সঁচাকৈয়ে সুৰক্ষিত হ'লহেঁতেন, এই ঘটনাবোৰ সংঘটিত নহ'লহেঁতেন।' পাঞ্জাই অভিযোগ কৰে যে শ্বাহে সত্য বিকৃত কৰিছে আৰু 'পশ্চিম বংগলৈ আঙুলি টোৱাই বিফলতাৰ পৰা দৃষ্টি আঁতৰাইছে।' তেওঁ কয়, 'যেতিয়া দিল্লীত ত্রুটী হ'ব, তেতিয়া বিজেপিয়ে পুৰণি পাণ্ডুলিপিৰ পৰা পাঠ কৰে আৰু বংগক দোষ দিয়ে।' তেওঁ কয় যে বংগত এছ আই আৰ 'শাস্তিমূলক, বলপূর্বক' অনুশীলন হৈ পৰিছে। তেওঁ কয়, '২০০২ চনত হোৱা শেহৰটো এছ আই আৰত দুবছৰ লাগিছিল। 

এতিয়া পশ্চিম বংগত দুমাহতে সম্পূৰ্ণ কৰিবলৈ কোৱা হৈছে।' তেওঁ কয়, 'অমিত শ্বাহ ডাঙৰীয়া হৈছে অতি অযোগ্য গৃহ মন্ত্রী। তেওঁ পহলগামৰ সন্ত্রাসবাদী আক্রমণ বাধা দিয়াত বিফল হ'ল। তেওঁ দিল্লীৰ বিস্ফোৰণ ৰোধ কৰাত বিফল হ'ল। যদি অনুপ্ৰৱেশকাৰী আহি আছে, এয়া তেওঁৰ বিফলতা।' উল্লেখযোগ্য যে শ্বাহে গুজৰাটৰ ভুজত বি এছ এফৰ প্ৰতিষ্ঠা দিৱসত ভাষণ দি কৈছিল যে এছ আই আৰক বাধা দিয়া দলবোৰে অনুপ্ৰৱেশকাৰীৰ নাম ভোটাৰ তালিকাত বিচাৰে। তেওঁ এছ আই আৰ অনুশীলনক ভোটাৰ তালিকাৰ 'শুদ্ধিকৰণ' আখ্যা দিছিল।

Share This