বাংলাদেশত সক্রিয় হৈছে ভাৰত-বিৰোধী ইছলামিক মৌলবাদী

dainik janambhumi July 21, 2025

ডিজিটেল ডেস্কঃ বাংলাদেশ এতিয়া ভাৰত-বিৰোধী ইছলামিক মৌলবাদী আৰু সন্ত্রাসবাদীৰ ঘাটি হৈ পৰিছে। কেৱল সিমানেই নহয়, ৰাজধানী ঢাকাৰ ৰাজপথ কঁপাই তোলে জিহাদী আৰু সন্ত্রাসবাদীয়ে মুকলিকৈ বিক্ষোভপ্ৰদৰ্শন কৰি ভাৰত বিৰোধী শ্ল'গান দিয়ে।

বাংলাদেশৰ নিৰাপত্তা বাহিনীৰ সন্মুখতে জিহাদীয়ে মুকলিকৈ নিজকে জিহাদী ঘোষণা কৰাৰ লগতে ইয়াৰ সমর্থনত শ্ল'গানো দিয়ে।

আনকি জিহাদীয়ে ৰাজধানী ঢাকাৰ ৰাষ্ট্ৰীয় মছজিদ বৈতুল মুকৰমত কুখ্যাত সন্ত্রাসবাদী সংগঠন আইছিছৰ পতাকাও উত্তোলন কৰে।

উল্লেখযোগ্য যে যোৱা বছৰ দেশখনত হোৱা ছাত্র আন্দোলনৰ পাছত ৫ আগষ্টত দেশখনৰ শেখ হাছিনা চৰকাৰৰ পতন ঘটে। ইয়াৰ পাছৰে পৰা বাংলাদেশত জিহাদী আৰু মৌলবাদী সংগঠনৰ প্ৰভাৱ বৃদ্ধি পাবলৈ ধৰে। যোৱা শুকুৰবাৰে জিহাদী মুকলিকৈ ৰাজপথলৈ ওলাই আহে।

 শুকুৰবাৰৰ নামাজৰ পাছতে ঢাকাৰ ৰাষ্ট্ৰীয় মছজিদৰ প্ৰাংগণত  হিজব উত-তহৰীৰ, বিলায়াহ বাংলাদেশ, আনছাৰ অল-ইছলাম আৰু জামাত-ই-ইছলামীৰ দৰে ইছলামিক জিহাদী সংগঠনৰ সদস্যই মুকলিকৈ জিহাদৰ সমর্থনত শ্ল'গান দিয়ে। মছজিদটোৰ চৌহদৰ বাহিৰৰ পথত বৃহৎসংখ্যক জিহাদীয়ে 'জিহাদ লাগে, জিহাদেৰে জীয়াই থাকিব লাগিব, নাৰা-ই-তকবীৰ, আল্লাহু আকবৰ, আমি কোন? সন্ত্রাসবাদী, সন্ত্রাসবাদী আৰু ইছলামিক বাংলাদেশত কাফেৰৰ বাবে কোনো স্থান নাই' আদি শ্ল'গান দি ৰাজধানী মহানগৰখন কঁপাই তোলে। ইয়াৰ পৰা এটা কথা স্পষ্ট হৈ পৰে যে মহম্মদ ইউনুছ চৰকাৰৰ দুৰ্বলতাৰ সুযোগ লৈ দেশখনত জিহাদী তথা মৌলবাদী সংগঠনসমূহৰ শক্তিশালী ৰূপত উত্থান হ'বলৈ ধৰিছে। উল্লেখযোগ্য যে এই সংগঠনবোৰ দেশখনত কাগজে-কলমে নিষিদ্ধ ঘোষিত হৈ আছে। শেখ হাছিনা চৰকাৰৰ দিনত সমগ্র দেশত বোমা বিস্ফোৰণত জড়িত থকা আৰু সন্ত্রাসবাদী কার্যকলাপত জড়িত থকাৰ অভিযোগক নিষিদ্ধ কৰা হৈছিল। হাছিনা চৰকাৰৰ পতনৰ পাছত বাংলাদেশ চৰকাৰে সন্ত্রাসবাদী কার্যকলাপত জড়িত থকাৰ অভিযোগ থকা কেই বাশ অপৰাধীক কাৰাগাৰৰ পৰা মুক্তি দিয়ে। দেশখনৰ কাৰাগাৰ বিভাগৰ তথ্য মতে, তিনি শতাধিক সন্ত্রাসবাদীক জামিনত মুক্তি দিয়া হৈছে। ইয়াৰে একাংশক যাৱজ্জীৱন কাৰাদণ্ড বিহা হৈছিল। নিৰ্ভৰযোগ্য সূত্রই প্রকাশ কৰা মতে, ৰাষ্ট্ৰীয় মছজিদত শুকুৰবাৰে দেশখনৰ বিভিন্ন জিলাৰ পৰা ইছলামিক জিহাদী গোট খাইছিল। উল্লেখযোগ্য যে যোৱা ১১ মাহত দুর্ধর্ষ সন্ত্রাসবাদী সংগঠন জমাত-উল-মুজাহিদীন, বাংলাদেশৰ (জে এম বি) ১৪৮টা সন্ত্রাসবাদীক কাৰাগাৰৰ পৰা মুক্তি দিয়া হৈছে। ইফালে কালি জামাত-ই-ইছলামিয়ে ঢাকাৰ সুহৰাৱদীত এখন সমাৱেশৰো আয়োজন কৰে। ইয়াত সংগঠনটোৰ বৃহৎসংখ্যক কর্মী তথা সমর্থকে অংশগ্রহণ কৰে। সংগঠনটোৱে দেশখনত মুক্ত আৰু নিকা নির্বাচন অনুষ্ঠিত কৰাৰ দাবীও কৰে

Share This