পাকিস্তানৰ কঁকাল ভাঙি দিবলৈ মোদীক আহ্বান আছাদুদ্দিন ওৱাইছিৰ

Kakali Deka April 28, 2025

ডিজিটেল ডেস্কঃ কাশ্মীৰৰ পহলগামত সন্ত্ৰাসবাদী আক্ৰমণৰ পিছত ভাৰত আৰু পাকিস্তানৰ পৰিস্থিতি যুদ্ধৰ দৰে হৈ পৰিছে। পৰ্যটকৰ ওপৰত সন্ত্ৰাসবাদী আক্ৰমণৰ পিছত ভাৰতে পাকিস্তানৰ বিৰুদ্ধে বহু বৃহৎ পদক্ষেপ গ্ৰহণ কৰিছে। ইয়াৰ পিছতে পাকিস্তান ক্ষোভত ফাটি পৰিছে। পাকিস্তানৰ এজন মন্ত্ৰীয়ে আনকি ভাৰতক পাৰমাণৱিক বোমাৰে উৰুৱাই দিয়াৰ ভাবুকিও দিছে। যাৰ বাবে AIMIMৰ মুৰব্বী আছাদুদ্দিন ওৱাইছিয়ে পাকিস্তানক তীব্ৰ সমালোচনা কৰিছে।

আছাদুদ্দিন ওৱাইছিয়ে কয় যে পাকিস্তান ভাৰতৰ পৰা ডেৰ শতিকা পিছ পৰি আছে। মহাৰাষ্ট্ৰৰ পাৰভানীত এখন ৰাজহুৱা সভাত ভাষণ দি ওৱাইছিয়ে কয় ‘‘পাকিস্তান ভাৰতৰ পৰা মাত্ৰ আধা ঘণ্টা পিছ পৰি থকাই নহয়, আধা শতিকা পিছ পৰি আছে। আপোনাৰ দেশৰ বাজেট আমাৰ সামৰিক বাজেটৰ সমানো নহয়।’’

ওৱাইছিয়ে লগতে কয় যে, ‘‘পাকিস্তানে বাৰে বাৰে কয় যে তেওঁলোকৰ হাতত পাৰমাণৱিক বোমা আছে। মনত ৰাখিব যদি আপুনি আন এখন দেশলৈ গৈ নিৰীহ মানুহক হত্যা কৰে তেন্তে কোনো দেশ মনে মনে নাথাকে। পহলগামত পৰ্যটকক হত্যা কৰা কাৰ্যই দেখুৱাইছে যে পাকিস্তান আইছিছৰ উত্তৰাধিকাৰী।’’

তেওঁ কয় যে পাকিস্তানে বহু বছৰ ধৰি ভাৰতক লক্ষ্য কৰি সন্ত্ৰাসবাদীক প্ৰশিক্ষণ দি আহিছে। তেওঁ লগতে কয় যে আন্তঃৰাষ্ট্ৰীয় আইন অনুসৰি ভাৰতে পাকিস্তান বায়ুসেনাৰ অৱৰোধ বলৱৎ কৰিব পাৰে আৰু আমাৰ নৈতিক হেকাৰ ব্যৱহাৰ কৰি তেওঁলোকৰ ইণ্টাৰনেট হেক কৰিব পাৰে।

ইয়াৰ লগতে পাকিস্তানৰ কঁকাল ভাঙি দিবলৈ আহ্বান জনায় আছাদুদ্দিন ওৱাইছিয়ে। তেওঁ কয় যে ‘‘প্ৰধানমন্ত্ৰী নৰেন্দ্ৰ মোদী ডাঙৰীয়া পাকিস্তানৰ কঁকাল ভাঙি দিয়ক। পাকিস্তানক অৰ্থনৈতিকভাৱে দুৰ্বল কৰাৰ সকলো পদক্ষেপ গ্ৰহণ কৰক।’’

কাশ্মীৰ ভাৰতৰ অবিচ্ছেদ্য অংগ বুলিও কয় ওৱাইছিয়ে। তেওঁ কয়, ‘‘টিভি চেনেলৰ একাংশ এংকৰে কাশ্মীৰীৰ বিৰুদ্ধে কথা কৈছে। তেওঁলোক নিৰ্লজ্জ। কাশ্মীৰ আমাৰ অবিচ্ছেদ্য অংগ হৈ আছে আৰু থাকিব...।’’

উৎস প্ৰাগ নিউজ ডিজিটেল

অপাৰেশ্যন সিন্দূৰৰ বিৰুদ্ধে মন্তব্য কৰাত অশোক বিশ্ববিদ্যালয়ৰ অধ্যাপকক জে’ললৈ প্ৰেৰণ