পলম হ'ব বুমৰাহৰ প্ৰত্যাৱৰ্তন

dainik janambhumi April 03, 2025

ডিজিটেল ডেস্কঃ প্রতিযোগিতামূলক ক্রিকেটলে ঘূৰি আহিবলৈ হয়তো যশপ্রীত বুমৰাহক অলপ বেছি সময় লাগিব পাৰে। কাৰণ বেগী বলাৰ বুমৰাহে এতিয়াও বি চি চি আইৰ চেন্টাৰ অব এক্সেলেন্সত পূর্ণ শক্তিৰে বলিং কৰিব পৰা নাই। ইফালে, পেচাৰ আকাশদীপৰ প্রত্যাৱর্তনো এসপ্তাহ পিছুৱাই গৈছে। বুমৰাহ চিকিৎসাজনিত দিশেৰে ফিট হৈ উঠিছে যদিও তেওঁৰ কামৰ বোজা ক্রমান্বয়ে বৃদ্ধি পাইছে।

 

কাৰণ তেওঁৰ পিঠিৰ ষ্ট্ৰেছ ফেকচাৰ হোৱাৰ আশংকা আছে। আনহাতে, আকাশদীপেও পিঠিৰ বিষত ভুগি আছে। উল্লেখযোগ্য যে অষ্ট্ৰেলিয়া ভ্রমণৰ পাছৰে পৰাই দুয়োগৰাকী ক্রিকেটাৰ প্রতিযোগিতামূলক ক্রিকেটৰ পৰা আঁতৰি আছে। জানুৱাৰীৰ প্রথম সপ্তাহত ছিডনী টেষ্টৰ সময়তে পিঠিৰ আঘাতত ভোগে বুমৰাহে। ইয়াৰ বিপৰীতে আকাশদীপে কিছু অস্বস্তিবোধ কৰাৰ কাৰণে মূল একাদশত স্থান পোৱা নাছিল।

 

ইফালে, আই পিএলৰ পাছতেই ৫খনীয়া টেষ্ট শৃংখলাৰ বাবে ইংলেণ্ড ভ্ৰমণ কৰিব ভাৰতে। ইয়াৰ প্ৰতি লক্ষ্য ৰাখি ব'ৰ্ডৰ চিকিৎসকৰ দলে বুমৰাহৰ প্ৰসংগত খুব সাৱধানী পদক্ষেপ গ্রহণৰ সিদ্ধান্ত লৈছে। সেই অনুসৰি নির্বাচক সমিতি আৰু দলীয় মেনেজমেণ্টে ৫খনীয়া টেষ্টৰ বাবে বুমৰাহৰ ওপৰত নিৰ্ভৰ কৰিব খোজা নাই। উল্লেখযোগ্য যে বুমৰাহে প্রথমে ১ এপ্রিলৰ ভিতৰত মুম্বাই ইণ্ডিয়ানছত যোগ দিয়াৰ কথা আছিল।

Share This