সুব্রত কাপত অসমৰ ছাত্ৰীৰ দলে ৰচিলে ইতিহাস

dainik janambhumi August 29, 2025

ডিজিটেল ডেস্কঃ নতুন ইতিহাস গঢ়ি অসমক প্রতিনিধিত্ব কৰা গুৱাহাটীৰ বেতকুছি হাইস্কুলৰ ছোৱালী দলে অশ্বমেধৰ দুৰন্ত পৰাক্ৰমী ঘোঁৰাৰ দৰেই আগুৱাই গৈ চলিত ৬৪সংখ্যক সুব্রত কাপ আন্তর্জাতিক স্কুল ফুটবল প্রতিযোগিতাত প্রথমবাৰৰ বাবে চেম্পিয়নৰ ট্ৰফী অর্জন কৰে। ভাৰতীয় বায়ু সেনাই আয়োজন কৰা (১৭ বছৰ অনূর্ধ্ব) জুনিয়ৰ ছোৱালীৰ ঐতিহাসিক প্রতিযোগিতাখনৰ আজি অনুষ্ঠিত ফাইনেলত অসম জননীৰ বীৰাংগনা কন্যাই বিপক্ষ পশ্চিম বংগৰ নন্দঝাৰ আদিবাসী টাপাশিলি হাইস্কুলক ৩-১ ব্যৱধানত পৰাভূত কৰি বিজয় মুকুট পৰিধান কৰে।

নতুন দিল্লীৰ ড° বি আৰ আম্বেদকাৰ ষ্টেডিয়ামৰ নৈশালোকত অনুষ্ঠিত হাইভল্টেজ ফাইনেল মেচখনত ৰাজ্যিক ফুটবল একাডেমিৰ খেলুৱৈৰে সুসংগঠিত বেতকুছি হাইস্কুলৰ সন্মুখত কাৰ্যতঃ খেলৰ প্রথমার্ধতে আত্মসমর্পণ কৰে চুবুৰীয়া বংগ দলে (৩-১)। অসম দলে আজি তেওঁলোকৰ প্ৰশিক্ষক তথা ২০০৮ চনত ১৯ অনূর্ধ্ব ভাৰতীয় দলৰ হৈ এ এফ চি প্রতিযোগিতাত ভাগ লোৱা প্রাক্তন আন্তর্জাতিক মহিলা ফুটবলাৰ পল্লবিতা বৰাৰ পৰিকল্পিত ৰণকৌশলক শিৰোধাৰ্য কৰি অধিক আত্মবিশ্বাসেৰে খেলপথাৰত নমা বেতকুছি হাইস্কুলে ১২ মিনিটতে প্রতিপক্ষৰ গ'লবক্সত আঘাত হানে (১-০)। সেই গ'লটো কাৰ্যকৰী কৰিছিল ছায়াশ্রী চাংমায়ে বক্সৰ বাওঁ দিশৰ পৰা লোৱা এক দর্শনীয় শ্বটৰ সহায়ত। অৱশ্যে অগ্রগতি ক্ষণস্থায়ী কৰি বংগই ৯ মিনিটৰ ব্যৱধানতে গ'ল পৰিশোধ (১-১) কৰে। বংগক প্রতিনিধিত্ব কৰা নন্দঝাৰ আদিবাসী টাপাশিলি হাইস্কুলৰ হৈ ২১ মিনিটত নেহাই সেই গ'লটো দিয়ে। ২৪ মিনিটত অসমৰ মিলিনা ব্রহ্মই দ্বিতীয়টো গ'ল দি পুনৰ অগ্রগতি লয় (২-১) প্রতিপক্ষৰ বক্সৰ চেণ্টাৰৰ পৰা লোৱা তীব্র গ্রাউণ্ড শ্বটৰ জৰিয়তে। গ'ল পাই অধিক উজ্জীৱিত ৰূপ লোৱা অসমে ২৯ মিনিটত মেৰী মেচৰ গ'লেৰে বিৰতিলৈ অগ্রগতি ৩-১লৈ বৃদ্ধিৰে স্থিতি সুদৃঢ় কৰে।

দ্বিতীয়ার্ধত বংগই গ'ল দিয়াৰ চেষ্টা কৰে যদিও অসমৰ ৰক্ষণ বিভাগৰ দৃঢ়তাপূর্ণ খেলৰ বাবে গ'লৰ মুখ নেদেখিলে। অসমৰ কুশলী ফৰৱাৰ্ড মেৰীয়ে শ্রেষ্ঠ খেলুৱৈ আৰু ফুৰচাং লামাই শ্রেষ্ঠ গ'লৰক্ষকৰ সন্মান পায়। উল্লেখ্য যে প্রতিযোগিতাত অসমে ছখন মেচত মুঠ ৩১টা গ'ল দি আন এক অভিলেখ গড়ে। বেতকুছি হাইস্কুলৰ ছাত্ৰীৰ দলটোৱে ছেমি ফাইনেলত কেৰালাক ৬-০ গ'লত বিধ্বস্ত কৰি খিতাপৰ মহাৰণলৈ অগ্ৰসৰ হৈছিল।

অসমৰ মেৰী মেচে প্রতিযোগিতাত দুখন মেচত হেটত্রিক অৰ্জন কৰে। যোৱা চাৰিখন মেচত মেৰীয়ে নটা গ'ল দিছিল। বেতকুছিৰ মিলিনা ব্রহ্ময়ো এটা হেটত্রিক কৰিবলৈ সক্ষম হয়। ইয়াৰ পূৰ্বে ২০১৪ চনত অসমে পোনপ্ৰথমবাৰৰ বাবে ফাইনেল খেলিছিল যদিও ৰানাৰ্ছআপ হৈছিল।

Share This