এদিনীয়া বিশ্ব কাপত অভিষেক অসম কন্যা উমা চেত্ৰীৰ

dainik janambhumi October 27, 2025

ডিজিটেল ডেস্কঃ এদিনীয়া বিশ্ব কাপত অভিষেক ঘটিল অসম-কন্যা উমা চেত্ৰীৰ। দেওবাৰে নৱী মুম্বাইত অনুষ্ঠিত ভাৰত বনাম বাংলাদেশৰ খেলৰ পূৰ্বে ভাৰতৰ উপ-অধিনায়ক স্মৃতি মান্ধানাৰ পৰা এদিনীয়া টুপী লাভ কৰে উমা চেত্ৰীয়ে। 

এইদৰেই গোলাঘাট জিলাৰ বোকাখাতৰ পৰা ওলাই অহা উইকেটকীপাৰ বেটচমেন উমাই আই চি চিৰ বিশ্ব কাপৰ খেলত অৱতীৰ্ণ হোৱা অসম তথা উত্তৰ-পূৰ্বাঞ্চলৰ প্ৰথমগৰাকী খেলুৱৈ হিচাপে পৰিগণিত হয়। ভাৰতৰ হৈ ১৫৭নং কেপ লাভ কৰি উমাক সতীর্থ স্মৃতি মান্ধানা আৰু স্নেহ ৰাণাই সাবটি ধৰাত আপ্লুত হৈ পৰে। স্মৃতিয়ে কয়, ভাৰতীয় দলত বিশ্ব কাপত স্থান লাভকৰাটো অধিক বিশেষ। আমি সকলোৱে আপোনাক কঠোৰ পৰিশ্ৰম কৰা দেখিছোঁ। আপুনি আটাইতকৈ কঠোৰ পৰিশ্ৰমী খেলুৱৈসকলৰ ভিতৰত এগৰাকী আৰু আমি সকলোৱে আপোনাৰ ফিটনেছ আৰু ক্রীড়াশৈলীৰ শলাগ লওঁ- এয়াই আমাক আৰু ভাল কৰিবলৈ প্ৰেৰণা দিয়ে। কঠোৰ পৰিশ্ৰম কৰি যাওক, আমাক প্ৰেৰণা দি থাকিব, আৰু ভাৰতৰ হৈ মেচত জয়ী হৈ যাওক। আপোনাৰ বাবে খেলিবলৈ আৰু জয়ী হ'বলৈ আৰু বহু মেচ শাৰী পাতি আছে। উল্লেখযোগ্য যে ২০২৪ চনৰ ৭ জুলাইত চেন্নাইত দক্ষিণ আফ্ৰিকাৰ বিৰুদ্ধে দ্বিতীয়খন টি-২০ আন্তঃৰাষ্ট্ৰীয় খেলত উমা চেত্ৰীৰ আন্তঃৰাষ্ট্ৰীয় পৰ্যায়ত অভিষেক ঘটে। ২০২৩ চনৰ জুলাই মাহত প্ৰথমবাৰৰ বাবে তেওঁ ৰাষ্ট্ৰীয় দলত স্থান লাভ কৰিছিল যদিও তেতিয়া খেলাৰ সুযোগ নাপালে। পাছত বাংলাদেশ ভ্রমণ কৰি এছিয়ান গেমছত সোণৰ পদক লাভকৰা ভাৰতীয় দলৰ অংশীদাৰ আছিল। ঘৰুৱা ছেট আপত উমাই মহিলা প্রিমিয়াৰ লীগত ইউ পি ৱাৰিয়ৰ্জক প্রতিনিধিত্ব কৰে।

Share This