বাংলাদেশত ৰ’ডভৰ্তি ট্ৰাক বাগৰি ১৫ জন লোকৰ কৰুণ মৃত্যু

Rashmi May 25, 2026

ডিজিটেল ডেস্ক: বাংলাদেশৰ ঢাকা-টাংগাইল মহাসড়কৰ কালিহাতীত এক ভয়ংকৰ পথ দুৰ্ঘটনা সংঘটিত হৈছে। ৰ’ড কঢ়িয়াই নিয়া এখন ট্ৰাক নিয়ন্ত্ৰণ হেৰুৱাই বাগৰি পৰাৰ ফলত থিতাতে ১৫ গৰাকী যাত্ৰীৰ কৰুণ মৃত্যু ঘটে। জানিব পৰা মতে, নিহত আটাইকেইজন যাত্ৰীয়ে ট্ৰাকখনত উঠি ঈদৰ বাবে উত্তৰ বংগৰ দিশে ঘৰলৈ গৈ আছিল।

সোমবাৰে পুৱা প্ৰায় ৪ বজাত ঢাকা-টাংগাইল মহাসড়কৰ চৰাতৈল দক্ষিণপাৰা নামৰ স্থানত এই মৰ্মান্তিক দুৰ্ঘটনাটো সংঘটিত হয়। বৰ্তমানলৈকে নিহতসকলৰ নাম আৰু পৰিচয় জানিব পৰা হোৱা নাই। ঘটনাস্থলীত আৰক্ষী আৰু অগ্নিনিৰ্বাপক বাহিনীৰ দলে উদ্ধাৰ অভিযান চলাই আছে।

১৩০০ টকা ৰাহি কৰিবলৈ গৈয়েই শেষ যাত্ৰা!

পৰিয়ালৰ সৈতে ঈদৰ আনন্দ ভগাই ল’বলৈ ২২ জন যাত্ৰীয়ে বাছৰ পৰিৱৰ্তে ভাড়া কম হোৱাৰ বাবে (প্ৰায় ১৩০০ টকা কমকৈ দি) ট্ৰাকখনত উঠি যাত্ৰা আৰম্ভ কৰিছিল। কিন্তু সেই যাত্ৰাই তেওঁলোকৰ জীৱনৰ শেষ যাত্ৰা হিচাপে প্ৰমাণিত হ’ল। মুহূৰ্তৰ ভিতৰতে ১৫ জনকৈ লোকৰ মৃত্যু ঘটাত সমগ্ৰ অঞ্চলটোত ঈদৰ আনন্দ এতিয়া গভীৰ শোক আৰু বিষাদলৈ পৰিণত হৈছে।

কেনেকৈ ঘটিল এই দুৰ্ঘটনা?

কালিহাতী অগ্নিনিৰ্বাপক বাহিনী আৰু চিভিল ডিফেন্স ষ্টেচনৰ ইনচাৰ্জ আতাউৰ ৰহমানে ঘটনাস্থলীৰ পৰা জানিবলৈ দিয়া মতে পুৱা প্ৰায় ৪ বজাত ৰ’ড আৰু যাত্ৰী বোজাই কৰি ট্ৰাকখন ঢাকাৰ পৰা উত্তৰ বংগৰ দিশে গৈ আছিল। পথৰ মাজতে নিয়ন্ত্ৰণ হেৰুৱাই ট্ৰাকখন ৰাস্তাৰ কাষৰ খাল এটাত বাগৰি পৰে।
ট্ৰাকখনত থকা গধুৰ ৰ’ডসমূহৰ তলত চেপা খাই থিতাতে ১৫ জন লোকৰ মৃত্যু হয় আৰু আন ৬ জন যাত্ৰী গুৰুতৰভাৱে আহত হয়।

আহতসকলক ততাতৈয়াকৈ উদ্ধাৰ কৰি টাংগাইল সদৰ হাস্পতালত ভৰ্তি কৰা হৈছে। দুৰ্ঘটনাস্থলীত দেখিবলৈ পোৱা গৈছে যে মহাসড়কৰ কাষতে ট্ৰাকখন ওলোটাকৈ পৰি আছে আৰু ট্ৰাকত থকা ৰ’ডসমূহ মাটিত সিঁচৰতি হৈ পৰিছে। এই মৰ্মান্তিক দৃশ্য প্ৰত্যক্ষ কৰিবলৈ স্থানীয় ৰাইজৰ মাজত ব্যাপক ভিৰৰ সৃষ্টি হৈছে। আৰক্ষীয়ে ঘটনা সন্দৰ্ভত প্ৰাথমিক তদন্ত আৰম্ভ কৰিছে।



উৎস : প্ৰাগ নিউজ ডিজিটেল

Share This