অক্সফ'ৰ্ডৰ পৰা 'সংস্কৃত'ত স্নাতক ডিগ্ৰী গুৱাহাটীৰ ছাত্ৰীৰ

dainik janambhumi August 11, 2025

ডিজিটেল ডেস্ক : গুৱাহাটী মহানগৰীৰ বামুণীমৈদামৰ পৰাগ দাস পথ নিৱাসী অসম সন্তান অৰণী এছ হাজৰিকাই সুদূৰ ইংলেণ্ডৰ বিশ্ববিখ্যাত উচ্চশিক্ষাৰ প্ৰতিষ্ঠান অক্সফ'ৰ্ড বিশ্ববিদ্যালয়ৰ পৰা সংস্কৃত আৰু ধ্রুপদী হিন্দী বিষয়ত সুখ্যাতিৰে স্নাতক ডিগ্রী লাভ কৰা প্ৰথম অসমীয়া হিচাপে বিৰল কৃতিত্ব অৰ্জন কৰিছে। বিশ্বৰ প্ৰাচীনতম বিশ্ববিদ্যালয়খনৰ বিখ্যাত শ্বেল্ডনিয়ান থিয়েটাৰৰ প্ৰেক্ষাগৃহত শনিবাৰে ব্ৰিটিছ সময়মতে দুপৰীয়া এক বজাৰ পৰা অনুষ্ঠিত আৰু বিশ্ববিদ্যালয়খনৰ উপাচার্যকে ধৰি বিভিন্ন বিশ্ববিখ্যাত পণ্ডিত, শিক্ষক আৰু গৱেষক উপস্থিত থকা ডিগ্রী প্রদান অনুষ্ঠানত ডিগ্রী গ্রহণ কৰি অৰণীয়ে সংস্কৃত আৰু ধ্রুপদী হিন্দী বিষয়ত স্নাতক হোৱা সৰ্বপ্ৰথম অসমীয়াৰূপে ৰাজ্যবাসীলৈও গৌৰৱ আৰু সন্মান কঢ়িয়াই আনিলে। 

২১ বছৰীয়া অসম সন্তানগৰাকীয়ে ১২৬৩ চনতে জন দি বেলিঅলে প্ৰতিষ্ঠা কৰা আৰু ইংৰাজী ভাষা কোৱা পৃথিৱীখনৰ আটাইতকৈ পুৰণি মহাবিদ্যালয় হিচাপে চিহ্নিত উচ্চ মানৰ বেলিঅল মহাবিদ্যালয়ৰ ছাত্ৰী ৰূপে এছীয় আৰু মধ্যপ্রাচ্য অধ্যয়ন (Department of Asian and Middle Eastern Studies)ৰ অধীনত সংস্কৃত আৰু ধ্রুপদী হিন্দীৰ স্নাতক পাঠ্যক্রম অধ্যয়ন কৰিছিল। জানিব পৰা মতে, যোৱা কেইবাটাও দশকৰ ভিতৰত পৃথিৱীৰ এই প্রাচীন আৰু বিখ্যাত বিশ্ববিদ্যালয়খনৰ পৰা বি এ ডিগ্রী লাভ কৰাৰ ক্ষেত্ৰতো প্ৰথম অসমীয়া হিচাপে অৰণীয়ে কৃতিত্ব অর্জন কৰিছে। গুৱাহাটীৰ চানমাৰিৰ কৃষ্ণনগৰস্থিত হলি চাইল্ড উচ্চমাধ্যমিক বিদ্যালয়ৰ প্ৰাক্তন ছাত্রী অৰণীয়ে দশম আৰু দ্বাদশ শ্ৰেণীৰ চি বি এছ ই পৰীক্ষাত অত্যন্ত সুখ্যাতি অর্জন কৰিছিল। দ্বাদশ শ্ৰেণীৰ শিক্ষান্ত পৰীক্ষাৰ পাছতে ১৮ বছৰ বয়সতে সংস্কৃত বিষয়ৰ স্নাতক পাঠ্যক্ৰমৰ বাবে অক্সফ'ৰ্ড বিশ্ববিদ্যালয়ে অৰণীক নির্বাচিত কৰিছিল। তদুপৰি বিশ্ববিদ্যালয়খনৰ অতি সন্মানীয় আৰু তীব্র প্রতিযোগিতামূলক চাইমন এণ্ড জুন লী আণ্ডাৰগ্ৰেজুৱেট স্ক'লাৰশ্বিপ অৰণীয়ে লাভ কৰে। 

২০২২ চনৰ অক্টোবৰ মাহৰ পৰা অৰণীয়ে এই পাঠ্যক্রমত যোগদান কৰে। পৃথিৱীৰ এই প্ৰাচীন শিক্ষানুষ্ঠানখনত পঢ়িবলৈ পোৱাৰ বিৰল কৃতিত্ব অর্জনকাৰীৰূপে চিহ্নিত হোৱা অৰণীয়ে পাঠ্যক্ৰমৰ সময়ত প্ৰস্তুত কৰা গৱেষণা-পত্ৰখনৰো বিষয় আছিল অসমৰ বিশ্বখ্যাত নদীদ্বীপ মাজুলীত অৱস্থিত মহাপুৰুষ শংকৰদেৱ প্ৰতিষ্ঠিত দক্ষিণপাট সত্ৰত উপলব্ধ পোন্ধৰ শতিকাৰ সাঁচিপাতৰ পাণ্ডুলিপিৰ এক নির্দিষ্ট সময়ৰ আৰু লেখকৰ ৰচনাৰ প্রামাণীকৰণ (Standardization)। এই বিৰল কৃতিত্ব অৰ্জন কৰি অসমলৈ গৌৰৱ কঢ়িয়াই অনা অৰণী এছ হাজৰিকা ৰাজ্যখনৰ জনপ্রিয় ফেংছুই-বাস্তু পৰামৰ্শদাতা আৰু সুকবি সুদক্ষিণা ভূঞা আৰু জ্যেষ্ঠ সাংবাদিক, লেখক-অনুবাদক তথা দ্য আছাম ট্রিবিউন কাকতৰ সহকাৰী সম্পাদক পাৰ্থপ্রতিম হাজৰিকাৰ একমাত্র কন্যা।

Share This