পৰীক্ষা কৰা বেলিষ্টিক মিছাইলৰ লক্ষ্যস্থান নাপাওঁতেই বিস্ফোৰণ

dainik janambhumi July 25, 2025

ডিজিটেল ডেস্কঃ পাৰমাণৱিক সক্ষমতা থকা পাকিস্তানৰ ছাহিন-III বেলিষ্টিক মিছাইল ২২ জুলাইত পৰীক্ষণৰ সময়ত লক্ষ্যত আঘাত কৰিব নোৱাৰি কক্ষচ্যুত হয় আৰু বিস্ফোৰিত হৈ ডেৰা গাজী খানত থকা পাৰমাণৱিক ঘাটিৰ সমীপত ধ্বংসাবশেষ পৰে। ইয়াৰ পাছতেই বেলুচিস্তানৰ অসামৰিক এলেকাসমূহত ব্যাপক প্ৰভাৱ পৰে।

বেলিষ্টিক মিছাইলটোৰ শেহতীয়া পৰীক্ষণৰ সময়ত লক্ষ্যস্থানত আঘাত হানিব নোৱাৰি মিছাইলটো বিস্ফোৰিত হয় আৰু ইয়াৰ ধ্বংসাবশেষ আহি পঞ্জাব প্রদেশৰ ডেৰা গাজী খান অঞ্চলত থকা এটা পাৰমাণৱিক ঘাটিত পৰে। তদুপৰি, মিছাই লটোৰ ধ্বংসাবশেষ বেলুচিস্তানৰ ডেৰা বুগটি জিলাৰ জনবসতি অঞ্চলতো পৰে আৰু বাসিন্দাসকলৰ মাজত হাহাকাৰ লাগে। এই ঘটনাৰ পাছতেই পাকিস্তানী সামৰিক বাহিনীৰ সক্ষমতাক লৈ দেশখনৰ জনসাধাৰণৰ মাজত প্ৰশ্নৰ উদ্ৰেক হয়।

বেলিষ্টিক মিছাইলটোৰ পৰীক্ষণ ব্যর্থ হোৱাৰ পাছত আক্রান্ত অঞ্চলসমূহত ইণ্টাৰনেট সংযোগ কর্তন কৰা হয় আৰু সংবাদকর্মীসকলক অঞ্চলসমূহলৈ যোৱাত বাধা আৰোপ কৰা হয় আৰু জনসাধাৰণক ঘৰৰ ভিতৰত থাকিবলৈ নির্দেশ দিয়া হয়। উল্লেখযোগ্য যে ডেৰা গাজী খানৰ ৰাখছানী অঞ্চলৰ পৰা ছাহিন-III মিছাইলটো পাকিস্তানে পৰীক্ষণ কৰিছিল যদিও এই মিছাইলটো কক্ষচ্যুত হয় আৰু বিস্ফোৰিত হৈ বেলুচিস্তানৰ ডেৰা বুগটি জিলাৰ মাট অঞ্চলত ইয়াৰ ধ্বংসাৱশেষ পৰে।

Share This