অহা ফেব্ৰুৱাৰীত বাংলাদেশৰ সাধাৰণ নির্বাচন

dainik janambhumi August 07, 2025

ডিজিটেল ডেস্কঃ বাংলাদেশৰ প্ৰাক্তন প্রধানমন্ত্রী শেখ হাছিনা ক্ষমতাচ্যুত আৰু দেশ এৰি পলায়ন কৰি যোৱাৰ এবছৰ পাছত দেশখনত সাধাৰণ নিৰ্বাচনৰ সম্ভাব্য দিন ঘোষণা কৰা হয়। দেশখনৰ অন্তৱৰ্তী চৰকাৰৰ মুখ্য উপদেষ্টা মহম্মদ ইউনুছে কয় যে নির্বাচন অহা বৰ্ষৰ ৰমজান মাহৰ আগেয়ে সম্পন্ন হ'ব। 

ইউনুছে কয়, 'আমাৰ শেষৰটো দায়িত্ব পূৰণ কৰাৰ সময় আহি পৰিছে। এয়া হৈছে নিৰ্বাচনৰ উৎসৱ। আমি এখন নির্বাচিত চৰকাৰক ক্ষমতা হস্তান্তৰ কৰাৰ প্ৰক্ৰিয়া আৰম্ভ কৰিছোঁ।' তেওঁ কয় যে মহিলা ভোটাৰসকলে এই নিৰ্বাচনত বৃহৎ হাৰত ভোটদান কৰা উচিত। ৩৪ মিনিটজোৰা এক টেলিভিশ্যনৰ ভাষণৰ জৰিয়তে মহম্মদ ইউনুছে এই কথা ঘোষণা কৰে। তেওঁ লগতে কয় যে চৰকাৰৰ হৈ তেওঁলোকে শান্তিপূর্ণ, স্বচ্ছ নির্বাচন হোৱাত সহযোগিতা আৰু সহায় আগবঢ়াব। 

পূৰ্বৰ হাছিনা চৰকাৰৰ দিনত নাগৰিকক ভোটৰ অধিকাৰৰ পৰা বঞ্চিত কৰাৰ বাবে ইউনুছে পূৰ্বৰ চৰকাৰক দোষাৰোপ কৰে। তেওঁ তাৎপৰ্যপূৰ্ণ মন্তব্য কৰি কয় যে নিৰ্বাচনৰ দিনটো ঈদ উদ্যাপনৰ দৰে হোৱাটো চৰকাৰে বিচাৰে। যোৱা বছৰ শাসনৰ পৰা ক্ষমতাচ্যুত আৱামী লীগক নির্বাচনত প্রতিদ্বন্দ্বিতা কৰাৰ পৰা বাৰণ কৰা হৈছে। অৱশ্যে দলটোৱে কয় যে তেওঁলোকে যুঁজি যাব।

Share This