আগষ্টত বাংলাদেশৰ সাধাৰণ নিৰ্বাচনৰ দিন ঘোষণাৰ সম্ভাৱনা

dainik janambhumi August 01, 2025

ডিজিটেল ডেস্কঃ বাংলাদেশৰ সাধাৰণ নির্বাচন দেশখনৰ অন্তৰ্বর্তী চৰকাৰে আগষ্ট মাহৰ প্ৰথম সপ্তাহত ঘোষণা কৰাৰ সম্ভাৱনা আছে। সংবাদ সংস্থাসমূহে এই কথা প্রকাশ কৰিছে। তাৎপৰ্যপূৰ্ণভাবে হাছিনা চৰকাৰৰ পতনৰ বর্ষপূৰ্তিৰ উপলক্ষ্য আৰু নিৰ্বাচনৰ দিন ঘোষণা কৰাটো কাকতালীয় ঘটনা হ'ব। অন্তর্বর্তী চৰকাৰৰ মুখ্য উপদেষ্টা মহম্মদ ইউনুছে ৰাষ্ট্ৰক সম্বোধনেৰে নিৰ্বাচনৰ দিন ঘোষণাৰ সম্ভাৱনা প্রকাশ পাইছে।

ইতিমধ্যে দেশখনৰ বহুকেইটা ৰাজনৈতিক দলে সাধাৰণ নিৰ্বাচনৰ পোষকতা কৰি আহিছে আৰু অন্তর্বর্তী চৰকাৰখনৰ ৰাজনৈতিক জনাদেশ নাই বুলি মন্তব্য কৰিছে। ইয়াৰ পূৰ্বে ইউনুছে ঘোষণা কৰিছিল যে প্রয়োজনীয় প্রস্তুতি সম্পূৰ্ণ হ'লে পৰৱৰ্তী সাধাৰণ নির্বাচন ২০২৬ বৰ্ষৰ ৰমজান মাহ আৰম্ভ হোৱাৰ পূর্বে (ফেব্ৰুৱাৰীৰ পূৰ্বে) অনুষ্ঠিত হ'ব। যোৱা বৰ্ষৰ আগষ্টত শ্বেখ হাছিনা চৰকাৰৰ পতনৰ পাছত বাংলাদেশ এখন নিৰ্বাচিত চৰকাৰ অবিহনে পৰিচালিত হৈ আহিছে।

আনহাতে, বাংলাদেশত সাধাৰণ নির্বাচন অনুষ্ঠিত কৰিবলৈ সাজু হৈছে দেশখনৰ নিৰ্বাচন আয়োগ। নির্বাচন আয়োগৰ এজন জ্যেষ্ঠ বিষয়াই মঙলবাৰে প্ৰকাশ কৰা অনুসৰি, নিৰ্বাচনৰ বাবে খচৰা ভোটাৰ তালিকা ১০ আগষ্টত প্ৰকাশ কৰা হ'ব। ইয়াৰ পাছত ওজৰ-আপত্তি নিষ্পত্তি কৰাৰ পাছত চূড়ান্ত ভোটাৰ তালিকা ৩১ আগষ্টত প্ৰকাশ কৰা হ'ব। বিষয়াজনে লগতে কয় যে ভোটাৰ তালিকা আইনৰ সংশোধনীত পলম হোৱাৰ বাবে আয়োগে প্ৰথমতে এখন পৰিপূৰক তালিকা প্রকাশ কৰিব।

অৱশ্যে ইয়াৰ সংশোধনী প্ৰকাশৰ পূৰ্বেই ৰাজহুৱা কৰাৰ পাছত আয়োগে ১৩সংখ্যক সংসদীয় নিৰ্বাচনৰ পূৰ্বেই সম্পূৰ্ণ ভোটাৰ তালিকা প্রকাশৰ সিদ্ধান্ত লৈছে। উল্লেখযোগ্য যে এইবাৰ দেশখনত ৪.৪ মিলিয়নতকৈও অধিক নতুন ভোটাৰে নিৰ্বাচনত ভোটদান কৰিব পাৰিব। দেশখনত সম্প্রতি প্রায় ১২৪ মিলিয়ন ভোটাৰ আছে।

Share This