অন্তৰ্ৱৰ্তী চৰকাৰৰ দিনত বাংলাদেশত নিৰ্যাতিত হৈছে হিন্দু 

dainik janambhumi February 14, 2025

ডিজিটেল ডেস্ক: বাংলাদেশৰ অন্তৰ্ৱৰ্তী চৰকাৰৰ মুখ্য উপদেষ্টা মহম্মদ ইউনুছে বাৰে বাৰে কৈ আহিছে যে দেশখনত হিন্দুসকলৰ বিৰুদ্ধে হিংসাত্মক ঘটনা সংঘটিত হোৱা নাই আৰু এনেধৰণৰ বাতৰি হৈছে 'অতিৰঞ্জিত অপপ্ৰচাৰ' বুলি তেওঁ ঘোষণা কৰি আহিছে। কিন্তু তেওঁৰ এই ভুৱা স্বৰূপ উদঙাই দিছে ৰাষ্ট্ৰসংঘৰ মানৱাধিকাৰ আয়োগৰ এখন প্রতিবেদনে। 

বাংলাদেশত হিন্দুৰ উপাসনাস্থলী আক্ৰমণ কৰাৰ লগতে দেশখনৰ সংখ্যালঘু হিন্দুসকলৰ ওপৰত উন্মত্ত জনতাই আক্ৰমণ কৰাৰ তথ্য-প্রমাণ পাইছে ৰাষ্ট্ৰসংঘৰ তথ্য অনুসন্ধানকাৰী দলটোৱে।আনহাতে, এই তথ্য উদ্ধাৰকাৰী দলটো ইউনুছৰ অন্তৰ্ৱর্তী চৰকাৰৰ আমন্ত্রণক্রমে বাংলাদেশলৈ অনুসন্ধান কৰিবলৈ আহিছিল। বাংলাদেশত সংঘটিত হোৱা ছাত্র আন্দোলনৰ পাছত ক্ষমতাচ্যুত তদানীন্তন প্রধানমন্ত্রী শ্বেখ হাছিনাই বিগত বৰ্ষৰ ৫ আগষ্টত দেশখনৰ পৰা পলায়ন কৰি ভাৰতত আশ্ৰয় লৈছিল আৰু ইয়াৰ পাছতে দেশখনৰ ১৭ কোটি জনসংখ্যাৰ ৮ শতাংশ হিন্দু লোক বিভিন্ন হত্যা-হিংসাত্মক ঘটনাৰ বলি হৈছিল। ১২ ফেব্ৰুৱাৰীত ৰাষ্ট্ৰসংঘৰ প্রতিবেদনখনত প্রকাশ পাইছে যে হাছিনাই ভাৰতলৈ পলায়ন কৰাৰ পূৰ্বেই হিন্দু সংখ্যালঘুসকলৰ ওপৰত অত্যাচাৰ আৰম্ভ হৈছিল। বিগত বৰ্ষৰ ২৬ নৱেম্বৰৰ পৰা চলিত বৰ্ষৰ ২৫ জানুৱাৰীলৈকে বাংলাদেশত হিন্দুসকলৰ বিৰুদ্ধে ৭৬টা আক্ৰমণৰ ঘটনা সংঘটিত হয়। 

বিগত বৰ্ষৰ আগষ্টৰ পৰা ২৩গৰাকী হিন্দু লোকক বাংলাদেশত হত্যা কৰা হয় আৰু হিন্দুৰ মন্দিৰ আক্ৰমণৰ ১৫২টা ঘটনা সংঘটিত হয় বুলি ইতিমধ্যে ভাৰতে উল্লেখ কৰিছে। ইফালে, ৰাষ্ট্ৰসংঘৰ প্ৰতিবেদনখনত আৰু কোৱা হৈছে যে কেৱল মহম্মদ ইউনুছৰ অন্তৰ্ৱৰ্তী চৰকাৰৰ কার্যকালতেই হিন্দু নিগ্ৰহৰ ঘটনা সংঘটিত হোৱা নাই, ভাৰতৰ সীমান্ত সুৰক্ষা বাহিনীয়েও (বি এছ এফ) ভাৰত-বাংলাদেশ সীমান্তৰ সমীপৰ পৰা সহস্রাধিক বাংলাদেশী হিন্দুক বাংলাদেশলৈ পুনৰ পঠিয়াই দিছিল। হিন্দুক আক্ৰমণৰ ঘটনাক 'অপপ্ৰচাৰ' বুলি ইউনুছৰ অন্তৰ্ৱৰ্তী চৰকাৰে দাবী কৰিলেও ৰাষ্ট্ৰসংঘৰ প্রতিবেদনখনে বাংলাদেশত হিন্দু নিগ্ৰহৰ প্ৰকৃত তথ্য উদঙাই দিলে।

Share This