বৰ্ষাপাৰাত আজি আই পি এলৰ প্ৰথম মেচ ,ৰিয়ান -জ্বৰত আক্ৰান্ত গুৱাহাটী 

dainik janambhumi March 26, 2025

ডিজিটেল ডেস্কঃ আই পি এল ক্রিকেটৰ জ্বৰত আক্রান্ত অসম তথা উত্তৰ-পূব। বিশেষকৈ এইবাৰ ৰিয়ান পৰাগক লৈ আৱেগত উথলি উঠিছে অঞ্চলটোৰ ক্রিকেটপ্রেমী। দেশীয় ক্রিকেটত অসম-উত্তৰ-পূব এতিয়া এৰাব নোৱৰা এক নাম। ৰিয়ান পৰাগ আই পি এলৰ আৱেগ। উমা চেত্রী আৰু জিণ্টিমণি কলিতা মহিলা ক্রিকেটৰ পৰিচয়। দেৱজিৎ শইকীয়া দেশৰ ক্রিকেট নিয়ন্ত্রণ ব'ৰ্ডৰ সচিব। আই পি এলৰ অন্যতম দল ৰাজস্থান ৰয়েলছৰ (আৰ আৰ) ঘৰুৱা গ্রাউণ্ড গুৱাহাটী। আহি থকা সময়ত গুৱাহাটীত প্রথমখন টেষ্ট মেচ আৰু মহিলা বিশ্ব কাপৰ খেল উপভোগ কৰিব পাৰিব ক্রিকেট প্রেমীয়ে।

এনে এক আনন্দদায়ক পৰিৱেশৰ মাজতেই বর্ষাপাৰাত আজি ৰাজস্থান ৰয়েলছ আৰু কলকাতা নাইট ৰাইডাৰ্ছ আই পি এলৰ এখন খেলত মুখামুখি হ'ব। আই পি এলৰ অষ্টাদশ সংস্কৰণৰ ৬ নম্বৰৰ মেচখন আজি ৭-৩০ বজাত আৰম্ভ হ'ব। টিকট বিক্রী হৈছে যদিও আশংকা আছে বৰষুণৰ। এফালে ৰিয়ান পৰাগৰ আৱেগ আৰু আনফালে বৰষুণৰ আশংকা। ইয়াৰ মাজতেই দুলি আছে ৰাজস্থান ৰয়েলছ আৰু কলকাতা নাইট ৰাইডাৰ্ছৰ মাজৰ সম্ভাব্য জয়-পৰাজয়। ঘৰুৱা গ্রাউণ্ড আৰু ঘৰুৱা দর্শকৰ অভূতপূর্ব সমর্থন। এই দুটা হ'ব অসম সন্তান ৰিয়ান পৰাগৰ বাবে কাইলৈ তেওঁৰ আই পি এলৰ ইতিহাসত অধিনায়কত্বৰ দ্বিতীয়খন খেলৰ পৰিপক্বতাৰ দিশ।

 

ইফালে, আজিংক্য ৰাহানে নেতৃত্বাধীন শক্তিৰে ভৰপূৰ কে কে আবব পক্ষত ঘৰুবা সমর্থক নাথাকিলেও কে কে আৰৰ লিগেছি তেওঁলোকৰ অন্যতম শক্তি। দুয়োটা দলে আৰম্ভণিৰ বিপৰ্যয়ৰ পৰা উভতি আহিবলৈ বিচাৰিছে। উল্লেখযোগ্য যে ২৩ মার্চত হায়দৰাবাদত ছানৰাইজাৰ্ছ হায়দৰাবাদৰ বিৰুদ্ধে অধিনায়কত্বৰ অভিষেক ঘটোৱা ৰিয়ান পৰাগে নিজৰ গৃহ ৰাজ্যত ২খন বেক টু বেক মেচত আৰ আৰক নেতৃত্ব দিব। ইফালে, অজিংক্য বাহানেৰ নেতৃত্বত কে কে আৰে নিজৰ বিস্ফোৰক লাইনআপেৰে আৰ আৰক লক্ষ্যভ্রষ্ট কৰাৰ চেষ্টা কৰিব। ৰয়েলছৰ ৰাজত্ব, নে নাইটছৰ উত্থান হ'ব গুৱাহাটীত? এই উত্তৰ পাবলৈ আমি অপেক্ষা কৰিব লাগিব আৰু কেইটামান মুহূর্ত।

Share This