সুঁৱেৰী উৎসৱেৰে ৪ দিনীয়া বৰপেটা দৌল মহোৎসৱৰ সামৰণি

dainik janambhumi March 17, 2025

ডিজিটেল ডেস্ক : কৃষ্ণ ভক্তি, ভগৱৎ প্ৰেম আৰু মহা আনন্দৰ অপূৰ্ব মিলনত একাকাৰ হ'ল সত্ৰ নগৰী বৰপেটা। ৰঙত একাকাৰ হৈ পৰে পুৰুষ-মহিলাকে ধৰি সমগ্ৰ বৰপেটাবাসী। ৰং আৰু আনন্দৰ মাজেৰে কালি সামৰণি পৰে বৰপেটাৰ দৌল মহোৎসৱৰ। যোৱা ১৩ মাৰ্চত গন্ধযাত্ৰাৰে আৰম্ভ হোৱা দৌল উৎসৱ উপলক্ষে ১৪ মার্চ আৰু কালি ভৰদৌল পালন কৰাৰ পাছতে কালি সুঁৱেৰী উৎসৱেৰে সামৰণি পৰে বৰপেটা দৌল মহোৎসৱৰ। ভৰদৌল উপলক্ষে লোকাৰণ্য হৈ পৰে বৰপেটা সত্ৰৰ চৌহদ। কালি পালন কৰা হয় সুঁৱেৰী উৎসৱ। 

সুঁৱেৰী উৎসৱ উপলক্ষে ৰং, ৰসৰ সাগৰত বিলীন হৈ পৰে সমগ্ৰ বৰপেটা। যোৱা দুদিন ধৰি হৰিনামৰ ধ্বনি আৰু হোলীগীতৰ সুৰৰ মূৰ্ছনাৰে মুখৰিত হৈ থকা সত্ৰ নগৰী বৰপেটাত পাৰ ভাঙি বয় আনন্দৰ নিজৰা। প্ৰণালীবদ্ধ বৈচিত্ৰ্য আৰু আড়ম্বৰেৰে যোৱা তিনিদিন ধৰি দৌল উৎসৱ পালন কৰা বৰপেটাবাসীয়ে কালি বিভিন্ন প্ৰান্তৰ পৰা অহা আলহী-অতিথিৰ সৈতে পালন কৰে সুঁৱেৰী উৎসৱ। বৰপেটা সত্ৰৰ পৰম্পৰাগত নিয়ম অনুসৰি, দৌল গোবিন্দ আৰু ক'লীয়া ঠাকুৰ গোসাঁইক দৌল গৃহৰ পৰা নমোৱা হয়। ইয়াৰ পাছৰ পৰাই আনন্দত উন্মনা হৈ পৰে বৰপেটাবাসী। দিনটোৰ প্ৰথম ভাগত অহা এজাক মুষলধাৰ বৰষুণেও ম্লান কৰিব নোৱাৰিলে বৰপেটাবাসীৰ মনৰ আনন্দ আৰু উৎসাহক। প্রচণ্ড বৰষুণৰ মাজতো সুঁৱেৰী উৎসৱ উপলক্ষে ৰঙে-ৰসে ভৰপূৰ হৈ উঠে সমগ্ৰ বৰপেটা। ৰঙীন হৈ পৰে বৰপেটাৰ আকাশ-বতাহ। সাময়িকভাৱে দুখ, যন্ত্রণাক উপেক্ষা কৰি থৈ কালি পুৱাৰে পৰা ওলাই অহা মানুহবোৰৰ মুখবোৰ নানা ৰঙেৰে ৰঙীন হৈ পৰে। চাৰিওপিনে কেৱল ৰং আৰু ৰং। আবাল-বৃদ্ধ-বনিতাৰ পৰা আৰম্ভ কৰি শিশুলৈকে কোনো বাদ পৰি যোৱা নাই এই আনন্দৰ পৰা। পাৰ ভাঙি বয় বৰপেটাবাসীৰ হৃদয়ে হৃদয়ে প্রৱাহিত প্ৰেমৰ নিজৰা। প্রত্যেকেই ইজনে সিজনৰ মুখত সানি দিয়ে হেঁপাহৰ ৰং। ৰঙা, নীলা, সেউজীয়া ৰঙৰ ফাকুগুৰি ছটিয়াই ইজনে সিজনক নিৱেদন কৰে প্ৰেম-শুভেচ্ছা। 

শিশুসকলে ফিচকাৰীৰে ৰং ছটিয়াই ৰঙে ৰঙে একাকাৰ কৰি তোলে সমগ্ৰ পৰিৱেশ। আজিৰ এই দিনটোত সমগ্ৰ বৰপেটাবাসীয়ে কেৱল ৰঙৰ মাজেৰেই প্ৰকাশ কৰে বছৰজোৰা সাঁচি ৰখা উৎসাহ-উদ্দীপনা। সৰ্বত্ৰ ৰঙত মতলীয়া হৈ পৰা বৰপেটা সত্ৰৰ যুৱক-যুৱতীসকলে দল বান্ধি পৃথকে পৃথকে হোলীগীত গাই গাই চহৰখনৰ বাইশখন হাটীৰ পথ হর্ষোল্লাসেৰে মুখৰিত কৰি তোলে। বৰপেটা আৰু ইয়াৰ আশে-পাশে থকা অঞ্চলৰ লোকসকলে পুৱাৰ ভাগত এইদৰে ৰং-আনন্দ প্ৰকাশ কৰাৰ পাছত দুপৰীয়া দৌল উৎসৱৰ প্ৰধান কেন্দ্ৰ বৰপেটা সত্ৰলৈ ধাৱমান হয়। বৰপেটা সত্ৰৰ বাহিৰে-ভিতৰে সৃষ্টি হয় জনসমুদ্ৰৰ। ইয়াৰ মাজতে বাৰাদি সত্ৰৰ পৰাও গোসাঁইক বৰপেটা কীৰ্তন ঘৰলৈ অনা হয়। ব্যাপক জনসমাগমৰ মাজতে বিয়লি দৌল গোবিন্দ আৰু ক'লীয়া ঠাকুৰৰ লগতে বাৰাদিৰ পৰা নিয়া গোসাঁইক তিনিখন সুশোভিত দোলাত তুলি বৰপেটা সত্ৰৰ দক্ষিণ দিশে প্রায় ডেৰ কিল'মিটাৰ  নিলগত থকা কলবাৰী সত্ৰলৈ নিয়া হয়। এই সময়ছোৱাত গায়ন-বায়নৰ খোল-তালৰ মধুৰ শব্দ, আইসকলৰ নাম, ভক্তসকলে গোৱা হোলীগীতৰ গুঞ্জনে মুখৰিত কৰি তোলে সমগ্র পথ পৰিক্ৰমা। জনসমাগমৰ ভিৰ ঠেলি ঠেলি তিনিও গোসাঁইক কলবাৰী সত্ৰত উপস্থিত কৰোৱাৰ পাছতে এক পৱিত্ৰ ভূমিত ৰখা হয় আৰু ভক্তসকলে হেকেতা নামৰ এবিধ বনৰীয়া মাহ গোসাঁইৰ সন্মুখত দিয়ে। ইয়াৰ পাছত পুনৰ গোসাঁইত্রয়ক একেই সমদল-যাত্ৰা কৰি বৰপেটা সত্ৰলৈ লৈ অনা হয়। 

গোসাঁইক লৈ অহা সমদলটো বৰপেটা সত্ৰৰ দালানৰ সন্মুখত উপস্থিত হোৱাৰ লগে লগে সত্ৰৰ টুপৰ চোতালত বাঁহ ভঙা পৰ্ব আৰম্ভ হয়। উল্লেখযোগ্য যে শ্রীকৃষ্ণই লক্ষ্মীৰ গৃহ এৰি ঘুনুচাৰ গৃহত থাকি আহি পুনৰ লক্ষ্মীৰ গৃহত প্ৰৱেশ কৰিবলৈ লওঁতে লক্ষ্মীয়ে শ্রীকৃষ্ণক গৃহ প্ৰৱেশত বাধা দিয়ে। এই কাহিনীৰ আধাৰতে বাঁহ ভঙা পর্ব অনুষ্ঠিত হয়। বৰপেটাৰ যুৱক-ভক্তবৃন্দই সমস্ত শক্তি উজাৰি দি এই বাঁহ ভঙা কার্যত লিপ্ত হয়। এই আকর্ষণীয় দৃশ্য প্রত্যক্ষ কৰি বাৰুকৈয়ে আপ্লুত হয় যাত্রীসকল। বাঁহ ভঙা পৰ্বৰ পাছত দৌলগোবিন্দ আৰু ক'লীয়া গোসাঁইক সত্ৰৰ চৌহদত প্ৰৱেশ কৰোৱা হয় আৰু কীৰ্তনঘৰৰ চাৰিওফালে সাত পাক ঘূৰোৱা হয়। গোসাঁইদ্বয়ক লৈ কীৰ্তনঘৰৰ চাৰিওপিনে প্রদক্ষিণ কৰি থকাৰ সময়ছোৱাত, মঠৰ চোতালত অনুষ্ঠিত হয় বোলবোলনি অনুষ্ঠানৰ। শ্রীকৃষ্ণ আৰু লক্ষ্মীদেৱীৰ পক্ষৰ মাজত বাদানুবাদৰে অনুষ্ঠিত হোৱা নাট্যধর্মী এই বোলবোলনি অনুষ্ঠানে মুগ্ধ কৰে উপস্থিত সকলোকে। বোলবোলনি পৰ্বৰ পাছতে গোসাঁইদ্বয়ক কীর্তনঘৰৰ ভিতৰত প্ৰৱেশ কৰোৱা হয় আৰু ইয়াৰ লগে লগে সামৰণি পৰে দৌলোৎসৱৰ। এই আনন্দৰ শেষত ক্লান্তি-অৱসাদেৰে ঘৰমুৱা হয় সকলো। উভতনি যাত্ৰা আৰম্ভ কৰে দূৰণিবটীয়া যাত্ৰীসকলে। বৰপেটা সত্ৰৰ নিচিনাকৈ পাটবাউসী, সুন্দৰীদিয়া, বাৰাদি, গণককুছি, কেওটকুছি আদি সত্ৰৰ লগতে বৰপেটা জিলাৰ বিভিন্ন স্থানত কালি সুঁৱেৰী উৎসৱ পালন কৰা হয়।

Share This