মণিপুৰৰ মুখ্যমন্ত্রী বীৰেন সিঙৰ পদত্যাগ

Dainik janambhumi February 10, 2025

ডিজিটেল ডেস্ক: হিংসাত্মক ঘটনাৰে জৰ্জৰিত হৈ থকা মণিপুৰৰ মুখ্যমন্ত্রী এন বীৰেন সিঙে আজি পদত্যাগ কৰে।উল্লেখযোগ্য যে ৰাজ্য বিধানসভাত কংগ্ৰেছৰ নেতৃত্বত বিৰোধী পক্ষই বীৰেন সিং মন্ত্রীসভাৰ বিৰুদ্ধে অনাস্থা প্রস্তাব উত্থাপন কৰাৰ কথা আছিল। ইয়াৰ আগে আগে তেওঁ পদত্যাগ-পত্র দাখিল কৰে। পদত্যাগ কৰাৰ আগতে সিঙে দিল্লীত কেন্দ্রীয় গৃহমন্ত্রী অমিত শ্বাহৰ সৈতে এক বৈঠকত মিলিত হৈছিল। 

উল্লেখযোগ্য যে সিং বিজেপিৰ সাংসদ সম্বিত পাত্ৰৰ লগতে ৰাজ্যখনৰ মন্ত্ৰী আৰু শাসকীয় পক্ষৰ বিধায়কসকলৰ সৈতে ৰাজভৱনত উপস্থিত হয়। ইয়াৰ পাছতে তেওঁ ৰাজ্যপাল অজয় কুমাৰ ভাল্লাৰ হাতত পদত্যাগ-পত্র দাখিল কৰে। ৰাজ্যপালে তেওঁ তদাৰকী মুখ্যমন্ত্ৰীৰূপে দায়িত্ব পালন কৰি যাবলৈ অনুৰোধ জনায়। অহা দুই-এদিনৰ ভিতৰত ৰাজ্যখনৰ নতুন মুখ্যমন্ত্ৰীৰ সম্পর্কত সিদ্ধান্ত লোৱা হ'ব বুলি জনা গৈছে। উল্লেখযোগ্য যে ৰাজ্যখনত বিগত ২১ মাহে হিংসাত্মক ঘটনা ঘটি আছে আৰু ইয়াৰ ফলত বীৰেন সিং যথেষ্ট চাপৰ মাজত আছিল। বিৰোধী পক্ষই অহৰহ তেওঁৰ পদত্যাগ দাবী কৰি আহিছিল। হিংসাত্মক ঘটনাত ২৫০গৰাকীতকৈ অধিক লোকে প্রাণ হেৰুৱায়। বিৰোধী পক্ষৰ লগতে ৰাজ্যখনত শাসনত থকা বিজেপিৰ নেতৃত্বাধীন এন ডি এৰ বিধায়কেও মুখ্যমন্ত্ৰীজনৰ প্ৰতি অনাস্থা প্রকাশ কৰি আহিছিল। সিং বিৰোধীৰ লগতে বিজেপিৰ বিধায়কৰো ক্ষোভৰ সন্মুখীন হৈছিল। 

যোৱা বছৰৰ অক্টোবৰত বিজেপিৰ ১৯জন বিধায়কে বীৰেন সিঙক মুখ্যমন্ত্ৰী পদৰ পৰা অপসাৰণ কৰাৰ বাবে প্ৰধানমন্ত্ৰী নৰেন্দ্ৰ মোদীলৈ পত্ৰ প্ৰেৰণ কৰিছিল। সিঙে ৰাজ্যপালক দাখিল কৰা পদত্যাগ-পত্রত কয়, 'এতিয়ালৈকে মণিপুৰৰ জনসাধাৰণক সেৱা কৰি থকাটো সম্মানৰ কথা। মই কেন্দ্ৰীয় চৰকাৰৰ প্ৰতি কৃতজ্ঞতা প্রকাশ কৰিছোঁ। কেন্দ্ৰীয় চৰকাৰে প্ৰয়োজন অনুসৰি ব্যৱস্থা গ্রহণ কৰিছে, সহায় আৰু বিকাশৰ হকে কাম কৰি আহিছে। প্ৰতিগৰাকী মণিপুৰীৰ স্বাৰ্থ সুৰক্ষিত কৰাৰ বাবে ভালেমান আঁচনি চলাই আছে। এই আঁচনিসমূহ ভৱিষ্যতেও চলাই থাকিব বুলি মই আশা কৰিছোঁ।' নিৰাপত্তা বাহিনীসমূহক গৃহমন্ত্রী অমিত শ্বাহে সষ্টম হৈ থাকিবলৈ নিৰ্দেশ দিছে।
 

Share This