চাকৰি নিয়মীয়া হ'ব ১০৪৬ গৰাকী পৌৰ কৰ্মচাৰীৰ

Dainik janambhumi February 06, 2025

ডিজিটেল ডেস্ক: ৰাজ্যৰ ৭১খন পৌৰ পৰিষদত কৰ্মৰত ১০৪৬ গৰাকী কৰ্মচাৰীৰ চাকৰি ৰাজ্য চৰকাৰে নিয়মীয়া কৰিব। মুখ্যমন্ত্রী ড° হিমন্ত বিশ্ব শৰ্মাৰ অধ্যক্ষতাত অনুষ্ঠিত কেবিনেট বৈঠকত এই সিদ্ধান্ত গ্রহণ কৰা হয়। বৈঠকৰ অন্তত অনুষ্ঠিত এখন সংবাদমেলত মন্ত্রী জয়ন্ত মল্ল বৰুৱাই কয় যে ২০১৩ চনৰ চাৰি ফেব্ৰুৱাৰীৰ পূৰ্বে যিসকল লোকে পৌৰসভা আৰু নিগমসমূহত যোগদান কৰিছিল, তেওঁলোকৰ চাকৰি নিয়মীয়া কৰা হ'ব। ইয়াৰ বাবে কেবিনেটে অসম পৌৰ কৰ্মচাৰী (প্রাদেশিকীকৰণ) বিধেয়ক ২০২৫ত অনুমোদন জনায়। 

আনহাতে গুৱাহাটীত জল সংৰক্ষণৰ বাবে আৰবান ৱাটাৰ বডি ৰিজার্ভেশ্যন এক্ট গৃহীত কৰাৰ দৰেই ৰাজ্যৰ সৰু সৰু নগৰ-চহৰবোৰত থকা প্ৰাকৃতিক জল ভাণ্ডাৰসমূহ সুৰক্ষিত কৰাৰ বাবে বিধি প্রণয়ন কৰা হ'ব। ইয়াৰ বাবে আজিৰ কেবিনেটে অসম নগৰীয়া জলাশয় (সুৰক্ষা আৰু সংৰক্ষণ) বিধি ২০২৫ত অনুমোদন দিয়ে। ইফালে অসমীয়াৰ বাহিৰে আন মাধ্যমৰ বিদ্যালয়ত নিয়োজিত হৈ থকা অসমীয়া ভাষাৰ শিক্ষকসকলক আন বিদ্যালয়লৈ বদলি কৰাৰ ক্ষেত্ৰত থকা সমস্যাও আজিৰ কেবিনেটে দূৰ কৰে বুলি জনাই তেওঁ কয় যে ইয়াৰ বাবে প্রয়োজনীয় বিধিত আজিৰ কেবিনেটে অনুমোদন দিছে। 

প্রণিধানযোগ্য যে আজিৰ কেবিনেটে সুলভ মূল্যৰ দোকানীসকলৰ বাবেও সুখবৰ কঢ়িয়াই আনিছে। সুলভ মূল্যৰ দোকান নৱীকৰণৰ তিনি বছৰৰ পৰিৱৰ্তে পাঁচ বছৰলৈ বৃদ্ধি কৰিছে কেবিনেটে। একেদৰে মূল্য সংযোজিত কৰ অৰ্থাৎ ভেটৰ ক্ষেত্ৰত কেবিনেটে আজি কিছু সংশোধন ঘটাইছে। সেই অনুসৰি নথি পত্ৰ অবিহনে অসমলৈ অনা ২৫০ লিটাৰতকৈ অধিক কোনো প্ৰকাৰৰ সামগ্রী বিতৰণ কৰিব নোৱাৰিব। মন্ত্ৰী বৰুৱাৰ মতে এই সিদ্ধান্তৰ ফলত বহিঃৰাজ্যৰ পৰা অবৈধভাবে অনা পেট্রল, ডিজেল, সুৰা আদিৰ বেপাৰ বন্ধ হ'ব। ইফালে আজিৰ কেবিনেটে যোগ্য বিবেচিত ব্যক্তিগত বিদ্যালয়ত আর্থিকভাৱে দুৰ্বল শ্ৰেণীৰ শিশুসকলৰ বাবে ২৫ শতাংশ আসন সংৰক্ষণ সুনিশ্চিত কৰিবলৈ এটা পৰ্টেল মুকলিৰ সিদ্ধান্ত লোৱাৰ লগতে ক্ষুদ্র উদ্যোগসমূহত ক্লাষ্টাৰ উন্নয়নৰ কাম কৰিবলৈ ৪২.৭২ কোটি টকাৰ বিনিয়োগত অনুমোদন জনায়।

Share This