বিশ্বলৈ বিনাশ মাতি আনিব পাৰে : ৰাষ্ট্ৰসংঘৰ সচিব প্ৰধান গুটাৰেছ

dainik janambhumi June 23, 2025

ডিজিটেল ডেস্ক : আমেৰিকাই ইৰানত কৰা আক্রমণক‌ লৈ সমগ্র বিশ্বতে মিশ্রিত প্রতিক্রিয়াৰ সৃষ্টি হৈছে। একাংশ দেশে আমেৰিকাৰ আক্ৰমণক কঠোৰ ভাষাৰে গৰিহণা দিয়াৰ বিপৰীতে আন একাংশ দেশে আমেৰিকাক সমর্থন জনাইছে। ৰাষ্ট্ৰসংঘৰ সচিবপ্রধান এন্টনিঅ' গুটাৰেছে ইৰানত আমেৰিকাৰ সামৰিক শক্তি প্রয়োগ কৰাত গভীৰ উদ্বেগ প্রকাশ কৰিছে। তেওঁ এইবুলি সতৰ্ক কৰি দিয়ে যে মধ্য প্রাচ্যৰ পৰিস্থিতিয়ে বিশ্বলৈ বিনাশ মাতি আনিব পাৰে। 

গুটাৰেছে কয় যে পৰিস্থিতি অতি বিপজ্জনক হৈ পৰিছে আৰু এই যুদ্ধ দ্রুত গতিত নিয়ন্ত্ৰণৰ বাহিৰ হৈ যাব পাৰে। ইয়াৰ অতি বেয়া প্ৰভাৱ অঞ্চলটোৰ জনসাধাৰণৰ লগতে সমগ্ৰ বিশ্বতে পৰিব। আমেৰিকাৰ ৰাষ্ট্ৰপতি ড'নাল্ড ট্রাম্পে কালি নিশা আক্ৰমণটোৰ পাছত দেশবাসীক উদ্দেশ্যি দিয়া ভাষণৰ পাছতে গুটাৰেছে এটা বিবৃতিত কয়- এই আক্রমণ আন্তঃৰাষ্ট্ৰীয় শান্তি আৰু সুৰক্ষাৰ বাবে প্ৰত্যক্ষ ভাবুকি। 

তেওঁ কয় যে ইৰানত আমেৰিকাৰ সামৰিক অভিযানে যুদ্ধক দ্রুত গতিত নিয়ন্ত্ৰণৰ বাহিৰলৈ লৈ যাব পাৰে আৰু ইয়াৰ সাধাৰণ নাগৰিক, অঞ্চলটোৰ লগতে সমগ্ৰ বিশ্বৰ বাবে বিনাশকাৰী পৰিণাম হ'ব পাৰে। সামৰিক অভিযান কোনো সমাধান নহয় বুলি উল্লেখ কৰি গুটাৰেছে কূটনীতিৰে ইয়াক সমাধান কৰাৰ আৰু শান্তি স্থাপনৰ দিশত কাম কৰাৰ আহ্বান জনায়।

Share This