হাতে হাতে পানীৰ  কলহ, বাল্টি লৈ এটোপাল বিশুদ্ধ খোৱাপানীৰ বাবে প্ৰতিবাদ

Kakali Deka March 21, 2025

ডিজিটেল ডেস্কঃ ৩১ মাৰ্চৰ আগতে যদি পানী যোগান নিদিয়ে তেন্তে সমাগত পঞ্চায়ত নিৰ্বাচনত ইয়াৰ পৰিণাম বেলেগ হ'ব বুলি হুংকাৰ প্ৰতিবাদী জনতাৰ।

 চন্দ্ৰপুৰত এটুপি বিশুদ্ধ খোৱা পানীৰ বাবে ৰাজপথলৈ ওলাই আহিছে ৰাইজ ।

জলজীৱন আঁচনিৰ জৰিয়তে বিশুদ্ধ খোৱা পানী যোগান ধৰাত ব্যৰ্থ হোৱাৰ বাবে চন্দ্ৰপুৰ আঞ্চলিক ছাত্ৰ সন্থাৰ উদ্যোগত ৰাইজৰ প্ৰতিবাদ ।

ৰাইজে হাতে হাতে প্লে'-কাৰ্ড ,বাল্টি , কলহ লৈ ওলাই আহিছে ৰাজপথলৈ। 

'আমাক পানী লাগে, ঘৰ ঘৰ নল ঘৰ ঘৰ জল' কেতিয়া, জয়ন্তমল্ল  বৰুৱা হায় হায়, গুজৰাটৰ পানীৰ পাইপেৰে কি ওলায় আপুনি জানে কিন্তু অসমৰ পানীৰ পাইপেৰে মন্ত্ৰী জয়ন্ত মল্লৰ মিছা কথাৰ নৈ বয়, জনস্বাস্থ্য কাৰিকৰী বিভাগ হুঁচিয়াৰ , অসম চৰকাৰ গ' বেক ' আদি শ্ল'গান দি পৰিৱেশ উত্তাল কৰি তোলে । 

 ৩১ মাৰ্চৰ ভিতৰত চন্দ্ৰপুৰবাসীক বিশুদ্ধ খোৱা পানী যোগান নধৰিলে চন্দ্ৰপুৰ আছুৱে ৰাইজৰ সহযোগত বৃহৎ জংগী আন্দোলন কৰিব বুলি সকীয়াই দিছে । 

কেৱল আন্দোলনে নহয়, পানী নাপালে আগন্তুক পঞ্চায়ত নিৰ্বাচন বৰ্জন কৰিবলৈ বাধ্য হ'ব বুলি কয় প্ৰতিবাদকাৰী  ৰাইজে ।

উল্লেখযোগ্য যে ২০১৪-১৫ বৰ্ষত চন্দ্ৰপুৰৰ তাঁতীমাৰা পাহাৰত ৩৪৮ কোটি টকা ব্যয়েৰে জলজীৱন মিছনৰ অধীনত এটা বৃহৎ পানী যোগান প্ৰকল্প স্থাপন কৰিছিল । এই প্ৰকল্পটোৰ জৰিয়তে চন্দ্ৰপুৰ উন্নয়ন খণ্ডৰ পানীখাইতী, আমচিং , পশ্চিম মায়ং আৰু চন্দ্ৰপুৰ গাঁও পঞ্চায়ত এলেকাৰ ৪২ খন গাঁৱৰ ৰাইজক ২৪ ঘণ্টাই বিশুদ্ধ খোৱা পানী যোগান ধৰাৰ কথা আছিল । কিন্তু প্ৰকল্পটো স্থাপন হোৱাৰ আজি দহ বছৰ অতিক্ৰম কৰাৰ পিছতো ৰাইজক এটুপিও বিশুদ্ধ খোৱা পানী যোগান ধৰিব পৰা নাই ।

 ইপিনে ঘৰে ঘৰে খোৱা পানী যোগান ধৰাৰ বাবে ২২৫-৪৫০ টকাকৈ প্ৰতিটো পৰিয়ালৰ পৰা প্ৰায় ৬৬ লাখ টকা সংগ্ৰহ কৰিছে যদিও আজি পৰ্যন্ত ৰাইজে খোৱা পানী নোপোৱাত ক্ষুব্ধ হৈ পৰিছে ।

Share This