অহা বছৰৰ পৰা দুবাৰ হ'ব দশম শ্ৰেণীৰ পৰীক্ষা

Kakali Deka February 20, 2025

ডিজিটেল ডেস্কঃ কেন্দ্রীয় মাধ্যমিক শিক্ষা পৰিষদে (চি বি এছ ই) অহা শিক্ষা বৰ্ষৰ পৰা পৰীক্ষা প্ৰণালীত ব্যাপক সালসলনি কৰিব।
চি বি এছ ইয়ে লোৱা সিদ্ধান্ত অনুসৰি অহা শৈক্ষিক বৰ্ষৰ পৰা ইয়াৰ অধীনৰ দশম শ্ৰেণীৰ পৰীক্ষা বছৰত দুবাৰ অনুষ্ঠিত কৰা হ'ব। ছাত্ৰ-ছাত্ৰীসকলে দুয়োবাৰ পৰীক্ষাত বহাৰ সুযোগ লাভ কৰিব আৰু দুয়োটা পৰীক্ষাত লাভ কৰা সৰ্বশ্রেষ্ঠ নম্বৰ বাছনি কৰি লোৱাৰ সুযোগ পাব। কোনো শিক্ষার্থীয়ে শাৰীৰিক অসুস্থতা বা আন কাৰণত প্ৰথমবাৰ পৰীক্ষা দিব নোৱাৰিলে বা প্ৰথমবাৰ কম নম্বৰ পালে পাছৰবাৰ পৰীক্ষাত বহাৰ সুযোগ লাভ কৰিব আৰু নিজৰ নম্বৰ উন্নত কৰাৰ সুযোগ পাব।

চি বি এছ ইয়ে নতুন পৰীক্ষা প্ৰণালীৰ খচৰা অচিৰেই প্ৰকাশ কৰিব আৰু এই সন্দৰ্ভত জনসাধাৰণৰ মতামত গ্রহণ কৰিব। শিক্ষা মন্ত্রী ধর্মেন্দ্র প্রধানে এই বিষয়টোক লৈ চি বি এছ ইৰ বিষয়া, ৰাষ্ট্ৰীয় শৈক্ষিক গৱেষণা আৰু প্ৰশিক্ষণ প্রতিষ্ঠান, কেন্দ্রীয় বিদ্যালয় সংগঠন আৰু নৱোদয় বিদ্যালয় সমিতিৰ প্ৰতিনিধিৰ সৈতে আলোচনা কৰি প্ৰস্তাৱিত সালসলনিক পর্যালোচনা কৰে। সূত্ৰসমূহে প্রকাশ কৰা অনুসৰি নতুন পৰীক্ষা প্ৰণালীৰ খচৰা অহা সোমবাৰে প্ৰকাশ কৰাৰ সম্ভাৱনা আছে। এটা বাতৰিত চি বি এছ ইৰ বিষয়াসকলৰ উদ্ধৃতিত কোৱা হৈছে যে পৰীক্ষাত বহাৰ কেইবাটাও সুযোগ দিয়াৰ জৰিয়তে চি বি এছ ইয়ে এনে ধৰণৰ শৈক্ষিক পৰিৱেশ সৃষ্টি কৰিবলৈ বিচাৰিছে যাৰ জৰিয়তে শিশুসকলৰ মুখস্থ ৰখাৰ পৰিৱৰ্তে চিন্তা কৰা আৰু বুজি পোৱাৰ ক্ষমতা বৃদ্ধিত গুৰুত্ব আৰোপ কৰা হৈছে।

চি বি এছ ইৰ এজন বিষয়াই প্ৰকাশ কৰা অনুসৰি নতুন পৰীক্ষা প্ৰণালী পৰম্পৰাগত পৰীক্ষা পদ্ধতিৰ পৰিৱৰ্তে সম্পূৰ্ণৰূপে দক্ষতা-ভিত্তিক মূল্যাংকন আধাৰিত হ'ব। ছাত্ৰ-ছাত্ৰীসকলে ব্যাৱহাৰিক জ্ঞান লাভ আৰু নিজকে উন্নত কৰাৰ সুযোগো লাভ কৰিব নতুন পৰীক্ষা প্ৰণালীত। ইয়াৰ বাবে চি বি এছ ইয়ে শিক্ষক-শিক্ষয়িত্রীসকলক প্রশিক্ষণো দি আছে। আনহাতে, চি বি এছ ইয়ে অহা শৈক্ষিক বৰ্ষৰ বাবে নতুন পাঠ্যক্রম প্রস্তুত কৰাৰ কামো কৰি আছে। আনহাতে, চি বি এছ ইয়ে অহা শৈক্ষিক বৰ্ষৰ পৰা বিদেশত থকা ইয়াৰ অধীনৰ ২৬০খন বিদ্যালয়ত বিশ্ব পৰ্যায়ৰ পাঠ্যক্ৰম আৰম্ভ কৰিব। চি বি এছ ইয়ে কয় যে ইয়াৰ জৰিয়তে ছাত্ৰ-ছাত্ৰীসকলে বছৰত দুবাৰ ব'ৰ্ডৰ পৰীক্ষা দিয়া আৰু সৰ্বশ্রেষ্ঠ নম্বৰ লাভ কৰাৰ সুযোগ লাভ কৰিব।

এই পদক্ষেপৰ জৰিয়তে ছাত্ৰ-ছাত্ৰীসকলক মানসকি চাপৰ পৰা মুক্তি দিয়াৰ ব্যৱস্থাও গ্রহণ কৰা হৈছে। বছৰত দুবাৰ দশম শ্ৰেণীৰ পৰীক্ষা নীতি কাৰ্যকৰী হোৱাৰ পাছত ছাত্ৰ-ছাত্ৰীসকলৰ বাবে দুয়োটা পৰীক্ষাত বহাটো অপশ্যনেল হ'ব। ছাত্র-ছাত্ৰীসকলে নিজৰ ইচ্ছা অনুসৰি ব'ৰ্ডৰ পৰীক্ষা দিব পাৰিব।

Share This