আফগানিস্তানৰ বিৰুদ্ধে খেলিব ইংলেণ্ডে

Dainik janambhumi February 08, 2025

ডিজিটেল ডেস্ক: বিভিন্ন পক্ষই জনোৱা বৰ্জনৰ দাবীক অগ্রাহ্য কৰি ইংলেণ্ড এণ্ড ৱেলছ ক্রিকেট ব'র্ডে (ইচি বি) ঘোষণা কৰে যে লাহোৰত চেম্পিয়ন্‌ছ ট্ৰফীৰ আফগানিস্তানৰ বিৰুদ্ধে মেচখনত ইংলেণ্ডে খেলিব। উল্লেখযোগ্য যে আফগানিস্তানত তালিবান প্রশাসনে মহিলাসকলৰ অধিকাৰ খৰ্ব আৰু উৎপীড়ন কৰাৰ প্রতিবাদত বিভিন্ন পক্ষই এই মেচখন বৰ্জন কৰাৰ কাৰণে ইংলেণ্ডক দাবী জনাইছিল। ই চি বিৰ মুৰব্বী ৰিছাৰ্ড থম্পছনে আফগানিস্তানত তালিবান প্রশাসনে চলাই অহা লিংগ বৈষম্য তথা মহিলাসকলক তেওঁলোকৰ অধিকাৰৰ পৰা বঞ্চিত কৰি অহা কাৰ্যত গভীৰ উদ্বেগ প্রকাশ কৰে। ইয়াৰ লগতে তেওঁ একপক্ষীয়ভাৱে কোনো ব্যৱস্থা গ্রহণ কৰাৰ পৰিৱৰ্তে আন্তঃৰাষ্ট্ৰীয়ভাৱে সকলোৱে উপযুক্ত ব্যৱস্থা গ্রহণত গুৰুত্ব আৰোপ কৰে। 

উল্লেখযোগ্য যে মানৱাধিকাৰ কৰ্মী, নীতি নির্মাতাসহ সমাজৰ বিভিন্ন শ্ৰেণীৰ লোকে ইংলেণ্ডক আফগানিস্তানৰ বিৰুদ্ধে চেম্পিয়ন্‌ছ ট্ৰেফীৰ মেচখন বৰ্জন কৰাৰ দাবী জনাই আহিছে। তেওঁলোকে আফগানিস্তানত মহিলাসকলৰ অধিকাৰত ব্যাপক হাৰত নিষেধাজ্ঞা আৰোপ কৰা বুলি অভিহিত কৰে। ই চি বি তালিবানৰ এই কাৰ্যক লিংগ বৈষম্য বুলি অভিহিত কৰে। ই চি বিয়ে মেচ বৰ্জনৰ দাবীক সতর্কতাৰে বিবেচনা কৰি এই বুলি কয় যে মেচ বর্জন কৰাটো এই বিষয়টোৰ আটাইতকৈ প্ৰভাৱশালী উপায় হ'ব নোৱাৰে। ইয়াৰ পৰিৱৰ্তে আন্তঃৰাষ্ট্ৰীয়ভাৱে সামূহিক প্রচেষ্টা চলোৱাৰ প্ৰয়োজন বুলি ই চি বিয়ে কয়। উল্লেখযোগ্য যে যোৱা বছৰ ই চি বিয়ে গ্ল'বেল ৰিফিউজি ফাণ্ডক ১ লাখ পাউণ্ডৰ বৰঙনি দিছিল। উল্লেখযোগ্য যে ইংলেণ্ডৰ দুই শতাধিক ৰাজনৈতিক নেতাই স্বাক্ষৰ কৰা এখন পত্ৰত ইংলেণ্ডক মেচখন বৰ্জন কৰাৰ দাবী কৰা হৈছিল। ইংলেণ্ডৰ ৰাজনৈতিক নেতাসকলে দক্ষিণ আফ্ৰিকাৰ ক্ৰিকেট দলটোকে আফগানিস্তানৰ বিৰুদ্ধে মেচখন বৰ্জন কৰাৰ আহ্বান জনাইছিল। অৱশ্যে দক্ষিণ আফ্রিকা ক্রিকেট ব'র্ডেও এই দাবী অগ্রাহ্য কৰে।

Share This