ছট্ৰিশগড়ৰ ছুকমাত চি আৰ পি এফৰ অভিযান , ১১ মহিলা কেডাৰসহ ১৭ মাওবাদী সংঘৰ্ষত নিহত 

dainik janambhumi March 30, 2025

ডিজিটেল ডেস্কঃ ছট্টিশগড়ৰ বাস্তাৰ অঞ্চলৰ ছুকমা জিলাত নিৰাপত্তা বাহিনীৰ সৈতে হোৱা সংঘৰ্ষত শনিবাৰে ১১গৰাকী মহিলা কেদাৰসহ ১৭ মাওবাদী নিহত হয়। এই সংঘৰ্ষত নিৰাপত্তা বাহিনীৰ ৪জন জোৱানো আহত হয়। অৱশ্যে আহত জোৱানসকল বিপদমুক্ত।

 আজিৰ সংঘর্ষত নিহত এজন মাওবাদীক জগদীশ ওৰফে বুধৰা বুলি চিনাক্ত কৰা হৈছে। মাওবাদী নেতা বুধৰাৰ মূৰৰ ওপৰত ২৫ লাখ টকাৰ পুৰস্কাৰ ঘোষণা কৰা হৈছিল। ২০১৩ চনত ঝীৰমত কংগ্ৰেছ নেতা মহেন্দ্র কর্মাকে ধৰি কমেও ২৫ গৰাকী লোকৰ হত্যাকাণ্ডত বুধৰা জড়িত আছিল। বাস্তাৰ অঞ্চলৰ আৰক্ষীৰ মহাপৰিদৰ্শক সুন্দৰৰাজ পিয়ে জনোৱা মতে মাওবাদীৰ উপস্থিতিৰ খবৰ পাই কেন্দ্ৰীয় সংৰক্ষিত বাহিনী (চি আৰ পি এফ) আৰু ডিস্ট্রিক্ট ৰিজার্ভ গার্ড (ডি আৰ জি)ৰ এটা যুটীয়া দলে কেৰলাপাল অঞ্চলত মাওবাদী বিৰোধী অভিযান আৰম্ভ কৰোঁতেই পুৱা ৮ মান বজাত সংঘৰ্ষ আৰম্ভ হয়। 

পাছত যুটীয়া দলটোৱে মাওবাদীৰ মৃতদেহবোৰ উদ্ধাৰ কৰাৰ লগতে বৃহৎ পৰিমাণৰ অস্ত্র-শস্ত্ৰ জব্দ কৰে। এইবোৰৰ ভিতৰত আছে  এ কে ৪৭, ছেল্ল্ফ ল'ডিং ৰাইফল, ৰকেট লান্সাৰ, খ্ৰী নট খ্ৰী ৰাইফল আৰু বেৰেল গ্রেনেড লান্সাৰ। আনহাতে নিৰাপত্তা বাহিনীয়ে ১৭জন মাওবাদীক হত্যা কৰাৰ পাছত কেন্দ্রীয় গৃহ মন্ত্রী অমিত শ্বাহে কয়, 'অস্ত্র লৈ থকাসকলক মই কওঁ যে অস্ত্ৰ আৰু হিংসাই পৰিৱৰ্তন আনিব নোৱাৰে, কেৱল শান্তি আৰু উন্নয়নেহে পাৰে।

Share This