আমেৰিকাই যদি যুদ্ধ বিচাৰে শেষলৈকে যুঁজিবলৈ আমি সাজু : চীন

dainik janambhumi March 06, 2025

ডিজিটেল ডেস্ক: আমেৰিকাই চীনৰ সামগ্ৰীত আৰোপ কৰা অতিৰিক্ত শুল্কক লৈ ক্ষুব্ধ হৈ পৰিছে দেশখন। আমেৰিকাই চীনৰ পাৰ আমদানি কৰা সকলো সামগ্রীত ১০-১৫% অতিৰিক্ত শুল্ক আৰোপ কৰাৰ কথা ঘোষণা কৰে। ইয়াৰ প্ৰত্যুত্তৰত চীনেও আমেৰিকাৰ সামগ্ৰীত সমহাৰত শুল্ক আৰোপ কৰাৰ কথা ঘোষণা কৰে। ইয়াৰ লগতে চীনে আমেৰিকাৰ ট্রাম্প প্ৰশাসনক মুকলিকৈ যুদ্ধৰ ভাবুকি দিয়ে। চীনে কয়, 'যদিহে আমেৰিকাই যুদ্ধ বিচাৰে আৰু সেই যুদ্ধ শুল্ক যুদ্ধই হওক বা বাণিজ্যিক যুদ্ধই হওক বা আন কোনো ধৰণৰ যুদ্ধই হওক, আমি শেষলৈকে যুঁজ দিবলৈ সাজু।' 

উল্লেখযোগ্য যে ড'নাল্ড ট্রাম্পে দ্বিতীয়বাৰৰ কাৰণে আমেৰিকাৰ ৰাষ্ট্ৰপতিৰ পদ গ্ৰহণ কৰাৰ পাছত চীনৰ সামগ্ৰীত অতিৰিক্ত শুল্ক আৰোপ কৰাৰ কথা ঘোষণা কৰে। চীনৰ বিদেশ মন্ত্র্যালয়ে এটা বিবৃতিত আমেৰিকাক এনেদৰে মুকলিকৈ ভাবুকি দিয়ে। বিদেশ মন্ত্র্যালয়ে বিবৃতিটোত লগতে কয়, 'চীনৰ লগত ডাবি- ধমকিৰে কাম নচলে।' আমেৰিকাই চীনৰ অপবাদ ৰটনা কৰা বুলিও দেশখনৰ বিদেশ মন্ত্ৰ্যালয়ে অভিযোগ কৰে। চীনৰ মতে, তেওঁলোকৰ তৰফৰ পৰা এই বিষয়টো শান্তিপূর্ণভাৱে সমাধান কৰাৰ কাৰণে সম্পূৰ্ণৰূপে প্রচেষ্টা চলাইছিল, চীনে বিষয়টোৰ ক্ষেত্ৰত সহায়ো কৰিছিল, কিন্তু আমেৰিকাই দেশখনক দণ্ডিতহে কৰিলে। 

বিদেশ মন্ত্ৰ্যালয়ৰ মতে আমেৰিকাত বৰ্তমান সৃষ্টি হোৱা ফেন্টেনাইলৰ সমস্যাৰ বাবে আমেৰিকা নিজে দায়ী। আন কোনো দেশৰ বিৰুদ্ধে শাস্তিমূলক ব্যৱস্থা গ্রহণ কৰিলে সমস্যাৰ সমাধান নহয়। উল্লেখযোগ্য যে ৰাষ্ট্ৰপতি ট্রাম্পে প্রতিটো ভাষণতে চীনক সমালোচনা কৰি আহিছে আৰু চীনৰ আধিপত্য নচলিব বুলি কৈ আহিছে। ট্রাম্পৰ এই মন্তব্যত চীন অধিক ক্ষুব্ধ হৈ পৰে।

Share This