বিদ্যুতৰ খুঁটা গাত পৰি ধিঙত কলেজীয়া ছাত্ৰৰ কৰুণ মৃত্যু 

Kakali Deka May 28, 2025

ডিজিটেল ডেস্কঃ বিদ্যুতৰ খুঁটা গাত পৰি ধিঙত  প্ৰাণ গ'ল এজন কলেজীয়া ছাত্ৰৰ ।

ধিঙৰ বেছামাৰীৰ আমতলত সংঘটিত হৈছে এই কৰুণ ঘটনা ।

বিদ্যুৎ পৰিবাহী খুঁটা ভাগি পৰাত থিতাতে মৃত্যু হয় ৰাহুল ইছলাম নামৰ ছাত্ৰজনৰ ।

প্ৰত্যক্ষদৰ্শী মতে, নিশা ৰাহুল ইছলামে লগৰীয়াৰ সৈতে ৰাস্তাৰ কাষত বহি থকাৰ সময়তেই এখন বাহনত বিদ্যুতৰ তাঁৰ লাগি ধৰাত   বিদ্যুতৰ খুঁটাতো  ভাগি পৰে ৰাহুল ইছলামৰ গাত ।

পকী খুঁটাৰ হেঁচাত থিতাতে কৰুণ মৃত্যুক সাবটি লয় ৰাহুল ইছলামে ।

ঘটনা সংঘটিত কৰিয়েই ঘটনাস্থলীৰ পৰা পলায়ন কৰে গাড়ীসহ গাড়ীচালকজন ।

বিগত সময়ছোৱাত ৰাইজে ধিং বিদ্যুৎ বিভাগক জহি-খহি যোৱা এই খুঁটাটো  সলনি কৰিবলৈ জনাই আহিছিল যদিও বিদ্যুৎ বিভাগে এই ক্ষেত্ৰত কোনো ধৰণৰ ব্যৱস্থা গ্ৰহণ নকৰাৰ ফলত এই ঘটনাটো হ'ল বুলি ৰাইজৰ অভিযোগ ।

গাড়ী চালকৰ অতপালি আৰু বিদ্যুৎ বিভাগৰ আওকণীয়া মনোভাবৰ বাবেই এজন ছাত্ৰই এনেদৰে অকাল মৃত্যুক সাবটি ল'ব লগীয়া হʼল ।

Share This