আহমেদাবাদত অনুষ্ঠিত কমনৱেলথ গেছমত চৰাইদেউৰ চাৰি ভাৰোত্তোলকৰ সাফল্যত গৌৰৱান্বিত অসম

dainik janambhumi August 28, 2025

ডিজিটেল ডেস্কঃ আহমেদাবাদত অনুষ্ঠিত কমনৱেলথ গেছমত চৰাইদেউৰ চাৰি ভাৰোত্তোলকৰ দপদপনি। চাৰিওজনে ভাৰোত্তোলনত যুৱ শাখা আৰু জুনিয়ৰ শাখাত সোণৰ পদক লাভ কৰি ভাৰতৰ লগতে অসম তথা গৃহজিলা চৰাইদেউলৈ গৌৰৱ কঢ়িয়াই আনিবলৈ সক্ষম হৈছে।

কমনৱেলত গেমছত চৰাইদেউ ভাৰোত্তোলন প্ৰশিক্ষণ কেন্দ্ৰৰ চাৰি ছাত্ৰ অভিনৱ গগৈ,ধৰ্মজ্যোতি দেওঘৰীয়া, ভাবনা গগৈ আৰু হেমন্ত দৈমাৰীয়ে ভাৰতক প্ৰতিনিধিত্ব কৰি ভাৰোত্তোলন বিভাগত আটাইকেইজনে সোণৰ পদক আঁজুৰি আনিবলৈ সক্ষম হোৱাত গৃহ জিলা চৰাইদেউত বৈছে এতিয়া আনন্দৰ বন্যা।

ইয়াৰে ধৰ্মজ্যোতি দেউঘৰীয়াই ৫৬ কেজি যুৱ শাখাত সোণৰ পদকৰ লগতে স্নেটছত পূৰ্বৰ ৰেৰ্কড ভংগ কৰিছে।আনফালে অভিনৱ গগৈয়ে ৭১ কিলোগ্ৰামৰ যুৱ শাখাত স্নেটছত ১২৩ কেজি, ক্লিন এণ্ড জাৰ্কত ১৫৫ কিল'গ্ৰাম উত্তোলন কৰি পূৰ্বৰ ৰেৰ্কড ভংগ কৰিবলৈ সক্ষম হয়। খবৰ লাভ কৰিয়েই অভিনৱ গগৈৰ জন্মস্থান সাপেখাতীত ফটকা ফুটাই আবতৰীয়া দেৱালী উদযাপন কৰে ৰাইজে ৷

Share This