বিশ্বনাথত নৱ বিবাহিতা মহিলাৰ মৃত্যুক কেন্দ্ৰ কৰি উত্তপ্ত পৰিস্থিতি,দুই ফৈদৰ মাজত প্ৰচণ্ড মাৰপিটৰ ঘটনা

Rashmi August 07, 2025

ডিজিটেল ডেস্কঃ বিশ্বনাথৰ পূব ভিৰ গাঁৱত এগৰাকী নৱ বিবাহিতা বোৱাৰীৰ মৃত্যুক কেন্দ্ৰ কৰি আজি উত্তপ্ত পৰিস্থিতিৰ সৃষ্টি হয়। হাতে হাতে বাঁহ, শিল লৈ মাৰপিটত লিপ্ত হয় দুই ফৈদ। ঘটনাত  কেইবাজনো লোক আহত হৈছে।

উল্লেখ্য যে বিশ্বনাথৰ পূৱ ভিৰ গাঁৱৰ মালি হুছেইন ওৰফে ৰহমত আলীয়ে এমাহ পূৰ্বে বিবাহ কৰাইছিল বিশ্বনাথৰ ১ নং আদাভেটি গাঁৱৰ আফ্ৰোজা খাতুনক। আজি আফ্ৰোজা খাতুনৰ ডিঙি ৰেপি থোৱা অৱস্থাত ৰহস্যজনক ভাৱে মৃতদেহ উদ্ধাৰ হয় স্বামী গৃহৰ পাকঘৰত।

এই ঘটনা আফ্ৰোজা খাতুনৰ পৰিয়ালে বেলেগৰ মুখেৰে জানিব পাৰি মালি হুছেইনৰ ঘৰত উপস্থিত হোৱাৰ লগে লগে এক উত্তপ্ত পৰিস্থিতিৰ সৃষ্টি হয়।পৰিস্থিতি ইমানে উত্তপ্ত হৈ পৰে যে দুয়ো পক্ষৰ মাজত হাতে হাতে বাঁহ,শিল লৈ প্ৰচণ্ড মাৰপিটৰ ঘটনা সংঘটিত হয়।

বিশ্বনাথ জিলাৰ উচ্চ পদস্থ আৰক্ষী বিষয়াসহ  আৰক্ষীৰ বৃহৎ দল উপস্থিত হৈ পৰিস্থিতি নিয়ন্ত্ৰণ কৰে যদিও চেপা উত্তেজনা অব্যাহত । ইফালে আফ্ৰোজা খাতুনৰ পৰিয়ালৰ স্পষ্ট অভিযোগ,আফ্ৰোজা খাতুনৰ স্বামী ৰহমত হুছেইন আৰু পৰিয়ালৰ লোকে মিলি হত্যা কৰিছে  আফ্ৰোজা খাতুনক।

ইতিমধ্যে বিশ্বনাথ আৰক্ষীয়ে স্বামী ৰহমত আলী, পিতৃ মফেল আলী আৰু মাতৃ ফজিতন নেচাক  আটক কৰিছে লগতে দণ্ডাধীশ উপস্থিত হৈ আফ্ৰোজা খাতুনৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে। স্থানীয় লোক তথা আমছুৰ দাবী, এই ঘটনাৰ তদন্ত কৰি দোষীক কঠোৰতকৈ কঠোৰ শাস্তি প্ৰদান কৰা।


উৎস : প্ৰাগ নিউজ ডিজিটেল

Share This