ফাঁচিবজাৰত নকল সামগ্ৰীৰ ঘাটি উৎখাত

dainik janambhumi July 18, 2025

ডিজিটেল ডেস্কঃ ফাঁচিবজাৰৰ চাহিদা মার্কেটত বুধবাৰে চলোৱা অভিযানৰ পাছতেই গুৱাহাটীৰ দোকানত নকল আইফ'ন বিক্রী হৈ থকা তথ্য পোহৰলৈ আহিছে। এপল প্রতিষ্ঠানৰ এগৰাকী প্ৰতিনিধিৰ এজাহাৰৰ ভিত্তিত লাখটকীয়াৰ কেইবাখনো ম'বাইল বিপণীত পাণবজাৰ আৰক্ষীয়ে চলোৱা অভিযানত উৎখাত হ'ল নকল এপলৰ সামগ্রী তৈয়াৰ কৰাৰ ঘাটি। অভিযানত আৰক্ষীয়ে মার্কেটখনৰ ৬খন ম'বাইল বিপণীৰ পৰা নকল আইফ'নসহ এপল'ৰ লগ'সম্বলিত বিভিন্ন সামগ্রী জব্দ কৰে।

অভিযানত ৭টা নকল আইফ'ন, ইউ এছ বি কেন্দ্র, ইউ এছ বি এডপ্টাৰ, পাৱাৰ বেংক, বেক পেনেল, এয়াৰপডছ-ইয়েৰ পডছ, ঘড়ী, ছাৰ্জাৰ কেব্‌ল্, বেটাৰি, এপলৰ লগ'কে ধৰি অন্যান্য বহু নকল সামগ্রী জব্দ কৰা হয়। ঘটনা সন্দৰ্ভত আৰক্ষীয়ে জয়ছ কুমাৰ, কান্তিলাল, গণেশ ৰাম, নৰেশ কুমাৰ, গোপাল লাল আৰু ৰমেশ কুমাৰক গ্ৰেপ্তাৰ কৰে।

আৰক্ষীৰ প্ৰাথমিক তদন্তত এই দুষ্ট চক্ৰটোৱে ফাঁচিবজাৰৰ চাহিদা মাৰ্কেটৰ পৰাই বিলাসী এপল' ব্ৰেণ্ডৰ নকল সামগ্রী নির্মাণ কৰি বজাৰত বিক্ৰী তথা নিয়ন্ত্ৰণ কৰাৰ তথ্য পোহৰলৈ আহিছে। ঘটনা সন্দৰ্ভত আৰক্ষীৰ তদন্ত অব্যাহত আছে।

Share This