ডিজিটেল ডেস্কঃ মার্কিন ৰাষ্ট্ৰপতি ড'নাল্ড ট্রাম্পৰ প্রশাসনে ঘোষণা কৰা বৃহৎ শুল্ক আৰোপৰ সিদ্ধান্তৰ পাছত নীতি নিৰ্ধাৰকসকলে বিশ্বজনীন বাণিজ্য নীতিৰ পৰিৱৰ্তন আৰু অর্থনৈতিক অনিশ্চয়তাৰ আশংকা কৰিছিল। কিন্তু এই আশংকাৰ মাজতে ভাৰতীয় ৰিজার্ভবেংকে (আৰ বি আই) বুধবাৰে ইয়াৰ নীতিত সূতৰ হাৰ অপৰিৱৰ্তিত ৰাখে।
উল্লেখযোগ্য যে বৃহস্পতিবাৰৰ পৰা আমেৰিকাত সকলো ভাৰতীয় সামগ্ৰীৰ ওপৰত ট্রাম্প প্রশাসনে ২৫ শতাংশ শুল্ক আৰোপ কৰিছিল। আনহাতে ৰাছিয়াৰ তেল ক্ৰয় কৰি থাকিলে ভাৰতৰ বিৰুদ্ধে অধিক শুল্ক আৰোপৰ ভাবুকি দিছিল ট্রাম্পে। বিশ্বজনীন বাণিজ্য অনিশ্চয়তাৰ প্ৰতি লক্ষ্য ৰাখি, আৰ বি আইৰ গৱৰ্নৰ সঞ্জয় মালহোত্ৰাৰ নেতৃত্বত ছজনীয়া 'ৰেট-ছেটিং' পেনেলে ৰিপাৰচেজ ৰেট ৫.৫ শতাংশ নির্ধাৰণ কৰে সৰ্বসন্মতিক্রমে আৰু এটা 'নিৰপেক্ষ' স্থিতি বাহাল ৰাখে। মার্কিন শুল্কৰ প্ৰভাৱৰ বিষয়ে পোনপটীয়াকৈ নক'লেও আৰ বি আইৰ গৱৰ্নৰজনে ইংগিত দিয়ে যে ভাৰতৰ বিকাশৰ ওপৰত মার্কিন শুল্কৰ প্ৰভাৱ পৰিবনে নাই, সেইটো পূর্বানুমান কৰাটো জটিল।
আৰ বি আয়ে ইতিমধ্যে ভাৰতৰ বিকাশৰ হাৰ ৬.৭ শতাংশৰ পৰা ৬.৫ শতাংশ কৰিছে। মালহোত্রাই কয় যে দেশৰ বিকাশ শক্তিশালী হৈছে। তেওঁলোকৰ আশা অনুসৰি দেশৰ বিকাশৰ হাৰৰ ক্ষেত্ৰত কৰা পূর্বানুমান যদিও হ্রাস হৈছে, তথাপি মুদ্রা নীতিৰ পৰিৱৰ্তন প্ৰক্ৰিয়া চলি আছে বুলি তেওঁ কয়।