২০২৪-২৫ বিত্তীয় বৰ্ষত দেশত ১,৫০,৫৯০ কোটি টকা মূল্যৰ অস্ত্ৰ-শস্ত্ৰৰ নিৰ্মাণ

dainik janambhumi August 10, 2025

ডিজিটেল ডেস্কঃ আত্মনিৰ্ভৰ ভাৰত' পদক্ষেপৰ অধীনত প্ৰতিৰক্ষা সামগ্ৰী নিৰ্মাণৰ ক্ষেত্ৰত ভাৰতে আত্মনিৰ্ভৰশীলতাৰ গতি ত্বৰান্বিত কৰি কৃতিত্ব অর্জন কৰিছে। দেশৰ প্ৰতিৰক্ষা মন্ত্রালয়ে কয় যে ২০২৪-২৫ বিত্তীয় বর্ষত ১,৫০,৫৯০ কোটি টকা মূল্যৰ সৰ্বকালৰ সৰ্বশ্রেষ্ঠ প্ৰতিৰক্ষা সামগ্ৰী নিৰ্মাণ কৰি ইয়াৰ বাৰ্ষিক প্ৰতিৰক্ষা উৎপাদনত উল্লেখনীয় বৃদ্ধি কৰিছে। কেন্দ্ৰীয় প্ৰতিৰক্ষা মন্ত্ৰী ৰাজনাথ সিঙে শনিবাৰে কয় যে পূৰ্বৰ বিত্তীয় বর্ষৰ ১.২৭ লাখ কোটি টকাৰ প্ৰতিৰক্ষা সামগ্ৰী উৎপাদনৰ তুলনাত ২৪-২৫ বিত্তীয় বর্ষত শক্তিশালীভাবে ১৮ শতাংশ বৃদ্ধিৰে অভিলেখ গঢ়া হৈছে।

বিত্তীয় বর্ষ ২০১৯-২০ৰ পৰা এই প্ৰতিৰক্ষা সামগ্ৰীৰ উৎপাদন ৯০ শতাংশ বৃদ্ধি হৈছে। ৰাজনাথ সিঙে কয় যে ২০১৯-২০ বিত্তীয় বৰ্ষত ভাৰতে ৭৯,০৭১ কোটি টকা মূল্যৰ প্ৰতিৰক্ষা সামগ্ৰী উৎপাদন কৰিছিল। আনহাতে, কেন্দ্রীয় মন্ত্রীজনে কয় যে প্রতিৰক্ষা সামগ্ৰীৰ মুঠ উৎপাদনত প্ৰতিৰক্ষাৰ ৰাজহুৱা খণ্ডৰ অধীনস্থ প্রতিষ্ঠান (ডি পি এছ ইউ) আৰু ৰাজহুৱা খণ্ডৰ প্ৰতিষ্ঠানৰ ৭৭ শতাংশ অংশ আছে আৰু ২৩ শতাংশত ব্যক্তিগত খণ্ডৰ প্রতিষ্ঠানৰ অৱদান আছে। দেশৰ প্ৰতিৰক্ষা পৰিৱেশ তন্ত্রত ব্যক্তিগত খণ্ডৰ অৱদানক বৃদ্ধি কৰি ২০২৩-২৪ বিত্তীয় বৰ্ষৰ ২১ শতাংশৰ তুলনাত ২০২৪-২৫ বিত্তীয় বর্ষত ২৩ শতাংশ হৈছে। কেন্দ্ৰীয় প্ৰতিৰক্ষা মন্ত্ৰীজনে প্ৰতিৰক্ষা সামগ্রী উৎপাদনৰ বিভাগ আৰু সকলো অংশীদাৰ- ডি পি এছ ইউ, ৰাজহুৱা খণ্ডৰ নিৰ্মাণকাৰী আৰু ব্যক্তিগত খণ্ডৰ উদ্যোগসমূহৰ সংগবদ্ধ প্রচেষ্টাক ভূয়সী প্রশংসা কৰে। মন্ত্রীজনে কয় যে এই ঊর্ধ্বগামী উৎপাদনে ভাৰতৰ প্ৰতিৰক্ষা ঔদ্যোগিক ভেটি শক্তিশালী হোৱাটোকে প্রতিপন্ন কৰিছে।

উল্লেখযোগ্য যে ৰাজহুৱা আৰু ব্যক্তিগত খণ্ডৰ উদ্যোগসমূহে বছৰে বছৰে প্ৰতিৰক্ষা সামগ্রী নির্মাণত উল্লেখনীয় বৃদ্ধি কৰিছে। প্ৰতিৰক্ষা নীতিৰ সংস্কাৰ, ব্যৱসায় কৰাত সুচলতা আৰু থলুৱাভাৱে নির্মিত সামগ্রীত কৌশলগতভাবে গুৰুত্ব প্রদানেই এই সামগ্রী নিৰ্মাণৰ বৃদ্ধিৰ ক্ষেত্ৰত অৰিহণা যোগাইছে। আনহাতে, বিত্তীয় বর্ষত ডি পি এছ ইউ আৰু ব্যক্তিগত খণ্ডসমূহৰ প্ৰতিৰক্ষা সামগ্ৰীৰ উৎপাদন ক্রমান্বয়ে ১৬ শতাংশ আৰু ২৮ শতাংশ বৃদ্ধি হৈছে। কেন্দ্রীয় মন্ত্রী সিঙে কয় যে থলুৱাভাবে প্রতিৰক্ষা সামগ্ৰী নিৰ্মাণৰ ক্ষেত্ৰত ভাৰতে অৰ্জন কৰা এই কৃতিত্বই বিদেশৰ পৰা আমদানি হ্রাস কৰিছে আৰু দেশৰ প্ৰতিৰক্ষা সক্ষমতা বৃদ্ধি কৰিছে।

Share This