শৃংখলা নিশ্চিত কৰিলে ভাৰতে

Dainik janambhumi February 10, 2025

ডিজিটেল ডেস্ক: অধিনায়ক ৰোহিত শৰ্মাৰ (১১৯) বিস্ফোৰক বেটিঙৰ সহায়ত ইংলেণ্ডক দ্বিতীয় এদিনীয়াত ৪ উইকেটত পৰাজিত কৰে ভাৰতে। ইংলেণ্ডৰ ৩০৪ ৰানৰ প্ৰত্যুত্তৰত ভাৰতে ফর্মলৈ উভতি অহা ৰোহিতৰ ৯০টা বলত ১২টা চাৰি আৰু ৭টা ছয় সম্বলিত ১১৯ ৰানৰ জৰিয়তে ৪৪.৩ অ'ভাৰত ৬টা উইকেট হেৰুৱাই লক্ষ্য অতিক্ৰম কৰে। 

ভাৰতে ৩০৮ ৰান কৰি তিনিখনীয়া এদিনীয়া শৃংখলা জয় ২-০ ব্যৱধানত নিশ্চিত কৰে। শেহতীয়াকৈ ফৰ্মৰ বাবে যুঁজ-বাগৰ চলাই থকা ৰোহিতে তীব্র চাপৰ মাজত নিজৰ সাৱলীল বেটিঙেৰে ভাৰতৰ জয়ৰ ভেটি গঢ়ে। শুভমন গীলৰ (৬০) সৈতে মিলি দলৰ বাবে দৃঢ় আৰম্ভণি কৰে। ৰোহিত ফৰ্মলৈ উভতিলেও পুনৰ ব্যৰ্থ হোৱা বিৰাট কোহলীয়ে ৮টা বলৰ মুখামুখি হৈ মাথোঁ ৫ ৰানহে কৰে। আনহাতে শ্রেয়াস আয়াৰে ৪৪ আৰু অক্ষৰ পেটেলৰ বেটৰ পৰা আহে অপৰাজিত ৪১ ৰান। ইয়াৰ আগয়ে ছিনিয়ৰ বেটাৰ জু ৰোট (৬৯) আৰু অ'পেনাৰ বেন ডাকেটৰ (৬৫) অর্ধ-শতৰানৰ সহায়ত ইংলেণ্ডে ৪৯.৫ অভাৰত কেউটা উইকেট হেৰুৱাই ৩০৪ ৰান কৰে। 

৭২টা বলত ছটা চাৰিৰে ৬৯ ৰান কৰা ৰোটক যোগ্য সহযোগিতা আগবঢ়ায় ডাকেট (৫৬টা বলত ১০টা চাৰিৰে ৬৫) আৰু অধিনায়ক জুছ বাটলাৰে (৩৫টা বলত দুটা চাৰিৰে ৩৪)। লিয়াম লিভিংষ্টনে ৪১, হেৰী ব্ৰকে ৩১ আৰু অ'পেনাৰ ফিলিপ ছল্টে ২৬ ৰানৰ উল্লেখনীয় অৱদান যোগায়। ভাৰতৰ ৰবীন্দ্ৰ জাদেজাই সর্বাধিক তিনিটা উইকেট লাভ কৰে।

Share This