ডিজিটেল ডেস্কঃ বৌদ্ধ ধর্মগুৰু দালাই লামাৰ উত্তৰসুৰী নিৰ্বাচনক লৈ ভাৰত আৰু চীনৰ মাজত তীব্ৰ বিতর্ক চলি থকাৰ মাজতে ধৰ্মগুৰুজনে মন্তব্য কৰে যে তেওঁ জনসাধাৰণক সেৱা কৰিবলৈ আৰু ৩০-৪০ বছৰ জীয়াই থকাৰ আশা কৰিছে। চুগুলাগখাঙত তেওঁৰ ৯০ বছৰীয়া জন্ম বার্ষিকী উপলক্ষে আয়োজিত অনুষ্ঠানত ধর্মগুৰুজনে এইদৰে মন্তব্য কৰে। তেওঁ কয় যে ভগৱান বৌদ্ধৰ আশীৰ্বাদত তেওঁ এতিয়ালৈকে জনসাধাৰণৰ সেৱা কৰি আহিছে আৰু ৩০-৪০ বছৰ তেওঁ জীয়াই থাকি এই সেৱা অব্যাহত ৰাখিব।
আনহাতে, ধৰ্মগুৰু দালাই লামাৰ উত্তৰাধিকাৰী নিৰ্বাচনক লৈ ভাৰত আৰু চীনৰ মাজত বিতর্ক অব্যাহত আছে। চীনে ধৰ্মগুৰুজনৰ উত্তৰাধিকাৰী নিৰ্বাচনৰ ক্ষেত্ৰত দেশখনৰ অনুমতি ল'ব লাগিব বুলি মন্তব্য কৰা পাছতেই ভাৰতৰ হৈ কেন্দ্ৰীয় মন্ত্ৰী কিৰেন ৰিজিজুৱে মন্তব্য কৰিছিল যে ধৰ্মগুৰুজনৰ উত্তৰাধিকাৰী নিৰ্বাচনৰ ক্ষেত্ৰত কেৱল ধৰ্মগুৰুজনেহে সিদ্ধান্ত ল'ব। ইয়াৰ পাছতে শেহতীয়াকৈ দালাই লামাৰ উত্তৰাধিকাৰী ক্ষেত্ৰত ভাৰতে লোৱা স্থিতিৰ প্রতিক্রিয়া প্রকাশ কৰিছে চীনে। চীনে ভাৰতক কয় যে তিব্বত সম্বন্ধীয় বিষয়সমূহৰ ক্ষেত্ৰত ভাৰতে সাৱধানেৰে কাৰ্যপন্থা ল'ব লাগে। চীনে ভাৰতক সকীয়াই দিয়ে যে ভাৰতে তিব্বত সম্বন্ধীয় বিষয়সমূহত মন্তব্য কৰোঁতে সতর্কতা অৱলম্বন কৰিব লাগে। এই বিষয়ত ভাৰতে কৰা মন্তব্যই যাতে দুয়ো দেশৰ দ্বিপাক্ষিক সম্বন্ধত প্ৰভাৱ নপৰে তাৰ বাবে ভাৰতে চেষ্টা কৰিব লাগে বুলি চীনে কয়।