হাড় কঁপোৱা জাৰত ফুটপাথত ৰোগী-পৰিয়াল ,এইম্ছ সন্দৰ্ভত নড্ডা, আতিশীলৈ ৰাহুল গান্ধীৰ পত্ৰ
ডিজিটেল ডেস্কঃ দিল্লীৰ এইম্ছলৈ চিকিৎসাৰ বাবে অহা শ শ ৰোগী আৰু তেওঁলোকৰ পৰিয়াল এইম্ছৰ বাহিৰৰ ফুটপাথ আৰু মেট্ৰ’ ষ্টেছনৰ ভূগৰ্ভ পথত [ছাবৱে’] পৰি থাকিবলগীয়া হোৱা দুৰ্দশাৰ দৰে ‘মানৱীয় দুৰ্যোগ’ সমাধান কৰাৰ ক্ষেত্ৰত দৃঢ় পদক্ষেপ ল’বৰ বাবে আহ্বান জনাই কংগ্ৰেছ-নেতা ৰাহুল গান্ধীয়ে কেন্দ্ৰীয় স্বাস্থ্য মন্ত্ৰী জে পি নড্ডা আৰু দিল্লীৰ মুখ্যমন্ত্ৰী আতিশীলৈ পত্ৰ প্ৰেৰণ কৰিছে৷ লোক সভাৰ বিৰোধী দলপতি গান্ধীয়ে ইয়াৰ উপৰি আগন্তুক কেন্দ্ৰীয় বাজেটত ৰাজহুৱা স্বাস্থ্য সেৱা ব্যৱস্থা শক্তিশালী কৰিবলৈ বাস্তৱসন্মত পদক্ষেপ ল’বলৈ তথা ইয়াৰ বাবে প্ৰয়োজনীয় সমল বৃদ্ধি কৰিবলৈও আহ্বান জনায়৷
সামাজিক মাধ্যম এক্সৰ এটা প’ষ্টত গান্ধীয়ে এই পত্ৰৰ কথা ৰাজহুৱা কৰে৷ তেওঁ কয়, ‘শেহতীয়াকৈ মই দেখিলোঁ যে হাড় কঁপোৱা জাৰত এই লোকসকলে মেট্ৰ’ ষ্টেছনৰ ভূগৰ্ভ পথত শুই থাকে, য’ত খোৱাপানী বা শৌচালয়ৰ কোনো ব্যৱস্থা নাই৷’ তেওঁ ফুটপাথত শুই থকা ৰোগী আৰু ৰোগীৰ পৰিয়ালৰ লোকৰ কথাও উল্লেখ কৰে, যিসকলে খোৱাপানী, শৌচালয় অবিহনে মাত্ৰ এখন পাতল কম্বল লৈ শুই থাকে৷ যোৱা ১৮ জানুৱাৰীত প্ৰেৰণ কৰা পত্ৰত গান্ধীয়ে কয় যে যি সময়ত দিল্লী এইম্ছে উৎকৃষ্ট আৰু ব্যয়সাধ্য স্বাস্থ্য সেৱা আগবঢ়াই আছে, সেই সময়তে ৰোগী আৰু পৰিয়ালৰ এনে অৱস্থাৰ সমাধানৰ পদক্ষেপ গ্ৰহণ কৰিব লাগে৷