আই পি এলত চেন্নাই ছুপাৰ কিংছৰ পৰাজয়ৰ হেটত্রিক, উদ্ধাৰ অভিযানত নামিব ধোনি

dainik janambhumi April 08, 2026

ডিজিটেল ডেস্ক: চলিত আই পি এলত একেৰাহে তিনিখন খেলত পৰাজয়েৰে পইন্ট টেবুলৰ একেবাৰে তলৰ ফালে আছে চেন্নাই ছুপাৰ কিংছ। তৰুণৰ পৰা অভিজ্ঞ সকলোৱে সংগ্রাম কৰিবলগীয়া হৈছে। এনে পৰিস্থিতিত চেন্নাই ছুপাৰ কিংছে দলত মহেন্দ্ৰ সিং ধোনিৰ অভাৱ অনুভৱ কৰিছে। বহুতৰ মতে ধোনিয়ে হয়তো দলক উদ্ধাৰ কৰিব পাৰিব। 

সমস্যাটো হ'ল হেমষ্ট্ৰিঙৰ আঘাতৰ বাবে তেওঁ খেলিব পৰা নাই। অহা ১১ এপ্রিলত দিল্লী কেপিটেলছৰ বিৰুদ্ধে চেন্নায়ে এখন গুৰুত্বপূৰ্ণ খেলত নামিব। দললৈ উভতি আহিবৰ বাবে ধোনিয়ে ফিটনেছ পৰীক্ষাত অৱতীৰ্ণ হ'ব লাগিব। অনুমান কৰা হৈছে যে ৪৪ বছৰীয়া ধোনিয়ে ইয়াৰ পাছতহে খেলিবলৈ পাৰপত্ৰ লাভ কৰিব পাৰে। প্রশিক্ষণ শিবিৰত পেশীত পোৱা আঘাতৰ কাৰণে তেওঁ প্রথম ৩খন মেচত খেলিব নোৱাৰিলে। প্ৰথম অৱস্থাত আই পি এলৰ প্ৰথম দুসপ্তাহতে ধোনিয়ে খেলিব নোৱাৰিব বুলি ভবা হৈছিল। কিন্তু পঞ্জাব কিংছৰ বিৰুদ্ধে খেলখনৰ আৰম্ভণিতে তেওঁক নেটত দেখা গৈছিল। দলৰ বাকীসকলক তেওঁ পৰামৰ্শ দিয়া দেখা পোৱা গৈছিল। 

ইফালে, চেন্নাই শিবিৰৰ বাবে আন এক ভাল খবৰ হ'ল দলটোৰ নিৰ্ভৰযোগ্য মিডল অৰ্ডাৰ বেটাৰ ডেৱাল্ড ব্রেভিছো দিল্লীৰ বিৰুদ্ধে মেচলৈ উভতিব পাৰে। তেওঁ আৰোগ্য হোৱাৰ পথত আগবাঢ়িছে।

Share This