ৰাষ্ট্ৰপতি ট্রাম্পৰ কঠোৰ পদক্ষেপ

dainik janambhumi February 05, 2025

ডিজিটেল ডেস্ক: আমেৰিকাৰ ড'নাল্ড ট্রাম্প প্রশাসনে দেশখনৰ অনুপ্ৰৱেশকাৰীসকলৰ বিৰুদ্ধে লোৱা কঠোৰ ব্যৱস্থাৰ পৰা ভাৰতীয়সকলো সাৰি যোৱা নাই। আমেৰিকাত অবৈধভাৱে প্ৰৱেশ কৰা মুঠ ২০৫গৰাকী ভাৰতীয় নাগৰিকক মঙলবাৰে ট্রাম্প প্রশাসনে আমেৰিকাৰ সামৰিক বিমানেৰে টেক্সাছৰ পৰা ভাৰতলৈ বিতাড়ন কৰে। সূত্ৰসমূহে সদৰী কৰা অনুসৰি, উল্লিখিত প্ৰতিগৰাকী ভাৰতীয় নাগৰিকৰ সত্যাসত্য পৰীক্ষা কৰাৰ পাছত এইটো স্পষ্ট হৈছে যে এই বিতাড়ন কৰা প্ৰক্ৰিয়াত নতুন দিল্লী জড়িত হৈ আছে। আমেৰিকাৰ অনুপ্ৰৱেশকাৰীসকলক স্বদেশলৈ বিতাড়িত কৰাৰ প্ৰক্ৰিয়াত ব্যৱহাৰ কৰা সামৰিক বিমানসমূহৰ ভিতৰত এইখনেই সম্ভৱতঃ প্রথমখন বিমান যিখনত তুলি ভাৰতীয় অনুপ্ৰৱেশকাৰীক স্বদেশলৈ বিতাড়ন কৰা হয়। 

এ চি-১৭ ইউ এছ সামৰিক বিমানখনে অনুপ্ৰৱেশকাৰী ভাৰতীয়সকলক স্বদেশলৈ লৈ আহিছে। আনহাতে, আমেৰিকাৰ ট্রাম্প প্রশাসনে গুৱাটেমালা, পেৰু আৰু হণ্ডৰাছৰ অনুপ্ৰৱেশকাৰীসকলৰ ক্ষেত্ৰতো অনুৰূপ ব্যৱস্থা লৈ তেওঁলোকক আমেৰিকাৰ সামৰিক বিমানেৰে স্বদেশলৈ বিতাড়িত কৰে। উল্লেখযোগ্য যে অহা সপ্তাহত ভাৰতৰ প্ৰধানমন্ত্ৰী নৰেন্দ্ৰ মোদী আমেৰিকা ভ্ৰমণলৈ যোৱাৰ খবৰ ওলাই থকাৰ মাজতে ট্রাম্প প্রশাসনে ভাৰতীয় অনুপ্ৰৱেশকাৰীক বিতাড়িত কৰাৰ প্ৰথম পর্যায় আৰম্ভ কৰিলে। দ্বিতীয়বাৰৰ বাবে আমেৰিকাৰ ৰাষ্ট্ৰপতি হিচাপে কাৰ্যভাৰ লোৱাৰ পাছত, ভাৰতৰ প্ৰধানমন্ত্ৰী মোদীৰ এইটো প্রথম আমেৰিকা ভ্রমণ হ'ব। ভাৰতৰ বিদেশ মন্ত্রী এছ জয়শংকৰে পূৰ্বেই কৈছিল যে আমেৰিকাসহ বিদেশত অবৈধভাৱে বাস কৰি থকা ভাৰতীয় নাগৰিকসকলৰ ভাৰতলৈ 'বৈধ প্রত্যর্পণ'ৰ ক্ষেত্ৰত নতুন দিল্লীয়ে দুৱাৰ মুকলি কৰি ৰাখিছে। 

আনহাতে, ট্রাম্পে যোৱা মাহত সাংবাদিকক কৈছিল যে ইতিহাসত প্ৰথমবাৰৰ বাবে তেওঁলোকে অবৈধ প্ৰব্ৰজনকাৰীক চিনাক্ত কৰি তেওঁলোক য'ৰ পৰা আহিছিল তালৈ দেশখনৰ সামৰিক বিমানেৰে ওভতাই পঠিওৱা হ'ব। তদুপৰি, ট্রাম্পে কৈছিল যে যেতিয়া তেওঁলোকে ভাৰতৰ অবৈধ প্ৰব্ৰজনকাৰীসকলক আমেৰিকাৰ পৰা নিৰ্বাসিত কৰিব, সেইক্ষেত্রত প্রধানমন্ত্রী নৰেন্দ্ৰ মোদীয়ে তেওঁক নিশ্চিতি দিছিল যে ভাৰতে 'যিটো সঠিক' সেইমতে কার্যপন্থা গ্রহণ কৰিব। ব্লুমবার্গ নিউজৰ মতে, আমেৰিকাত অবৈধভাৱে প্ৰৱেশ কৰা ১৮০০০ ভাৰতীয় অনুপ্ৰৱেশকাৰীক ট্রাম্প প্রশাসনে চিনাক্ত কৰিছে। ইফালে, ভাৰতৰ বিদেশ মন্ত্রী জয়শংকৰে কয় যে ভাৰত সদায় অবৈধ প্ৰব্ৰজনকাৰীসকলৰ বিৰুদ্ধে, কাৰণ এইসকল বিভিন্নপ্ৰকাৰৰ সংগবদ্ধ অপৰাধৰ লগত জড়িত। ভাৰতৰ বৈদেশিক মন্ত্ৰ্যালয়ৰ মুখপাত্ৰ ৰণধীৰ জয়ছোৱালে কয় যে কেৱল আমেৰিকাতেই নহয়, বিশ্বৰ যিকোনো ঠাইতে উপযুক্ত নথি-পত্র নথকাকৈ বাস কৰি থকা ভাৰতীয়সকলক বৈধ ভাৰতীয় নাগৰিক হিচাপে সত্যতা নিৰূপণ কৰাৰ বাবে উপযুক্ত নথি-পত্র দেখুৱালে তেওঁলোকক ভাৰতলৈ ঘূৰাই অনা হ'ব।

Share This