আমেৰিকাত ঔষধৰ দাম হ্ৰাস কৰাৰ নিৰ্দেশ 

dainik janambhumi August 03, 2025

ডিজিটেল ডেস্কঃ আমেৰিকাৰ ৰাষ্ট্ৰপতি ট্রাম্পে এক অভূতপূর্ব আৰু প্ৰত্যক্ষ পদক্ষেপ গ্রহণ কৰি দেশখনত ঔষধৰ আকাশলংঘী দাম হ্ৰাস কৰাৰ কাৰণে শীঘ্ৰে ব্যৱস্থা গ্রহণ কৰিবলৈ দেশখনৰ আগশাৰীৰ ১৭টা ঔষধ কোম্পানীৰ মুখ্য কার্যবাহী বিষয়ালৈ ব্যক্তিগতভাৱে পত্র প্ৰেৰণ কৰে। এই মুখ্য কাৰ্যবাহী বিষয়াসকলৰ ভিতৰত নভাৰ্টিছৰ পৰিচালন সঞ্চালক তথা মুখ্য কার্যবাহী বিষয়া বসন্ত নৰসিংহমো আছে। ট্রাম্পে স্বাক্ষৰ কৰা এই পত্ৰখন যোৱা বৃহস্পতিবাৰে হোৱাইট হাউছে প্রকাশ কৰে।

পত্ৰখনত ট্রাম্পে কোম্পানীসমূহক তেওঁলোকে ইউৰোপ আৰু আন উন্নত দেশবোৰত বিক্ৰী কৰাৰ দৰত আমেৰিকাতো ঔষধ বিক্ৰীৰ বাবে ব্যৱস্থা গ্রহণ কৰিবলৈ ৯ ছেপ্টেম্বৰ চূড়ান্ত সময়সীমা বান্ধি দিয়ে। হোৱাইট হাউছৰ মুখপাত্ৰ কেৰ'লিন লিভিট্টে এই কথা প্রকাশ কৰে। ট্রাম্প প্রশাসনে এই ঔষধ প্ৰস্তুত কৰা কোম্পানীসমূহৰ দাম নির্ধাৰণ প্ৰক্ৰিয়াক অযুক্তিকৰ বুলি অভিহিত কৰে আৰু এই পত্ৰখনৰ জৰিয়তে প্রশাসনে ইয়াৰ বিৰুদ্ধে যুঁজ আৰম্ভ কৰা বুলি তেওঁ কয়। লিভিট্টেই কয় যে দীর্ঘদিন ধৰি আমেৰিকানসকলে একেধৰণৰ জীৱনৰক্ষক ঔষধৰ বাবে আন দেশৰ তুলনাত প্রায় তিনি গুণ দাম ভৰি আহিছে। উক্ত পত্ৰখনত ট্রাম্পে চাৰিটা বাধ্যতামূলক দাবী কৰিছে।

ইয়াৰ ভিতৰত ঔষধৰ বাবে বিশ্বত একে সমান মূল্য নির্ধাৰণ প্ৰণালীৰ ব্যৱস্থা কৰা, নতুন ঔষধৰ উপযুক্ত মূল্য নির্ধাৰণ কৰা, বিদেশত কৰা লাভ আমেৰিকাৰ ৰোগীৰ বাবে ব্যৱহাৰ কৰা তথা আন্তঃৰাষ্ট্ৰীয় পৰ্যায়ৰ মূল দামত আমেৰিকাৰ ৰোগীয়ে প্রত্যক্ষভাবে ঔষধ ক্ৰয়ৰ সুবিধা লাভ কৰা।

Share This