ই ডিয়ে আইনৰ গণ্ডীৰ ভিতৰত কাম কৰিব লাগিব

dainik janambhumi August 09, 2025

ডিজিটেল ডেস্ক : উচ্চতম ন্যায়ালয়ে বৃহস্পতিবাৰে আইন বলবৎকাৰী সঞ্চালকালয়ৰ (ইডি) বিৰুদ্ধে দুটা পৃথক শুনানিত তীব্র সমালোচনা কৰে। ধনৰ অবৈধ সৰবৰাহ প্ৰতিৰোধ আইনৰ (পি এম এল এ) অধীনত দোষী সাব্যস্তৰ হাৰ কম হোৱাক লৈ তথা ইয়াৰ কার্যপ্রণালী আৰু বাছ-বিচাৰহীন ক্ষমতাক লৈ ন্যায়ালয়ে প্রশ্ন কৰে। এখন পীঠে কয় যে কেন্দ্রীয় সংস্থাটোৱে 'ঠগৰ (ক্রুক) দৰে কাম কৰিব নোৱাৰিব' আৰু আইনৰ সীমাৰ ভিতৰত কাম-কাজ চলাব লাগিব। উচ্চতম ন্যায়ালয়ৰ দুখন পীঠে বৃহস্পতিবাৰে পি এম এল এৰ সাংবিধানিক বৈধতা আৰু প্ৰয়োগ সন্দৰ্ভত দুখন আৱেদনৰ শুনানি গ্রহণ কৰে। দুয়োখন পীঠে ইডিৰ কাৰ্যপ্রণালী, দীঘলীয়া তদন্ত আৰু সামঞ্জস্যহীনভাবে দোষী সাব্যস্তৰ হাৰ কম হোৱাক লৈ উদ্বেগ প্রকাশ কৰে। 

প্ৰথমটো গোচৰত ভাৰতৰ মুখ্য ন্যায়াধীশ বি আৰ গৱই নেতৃত্বাধীন পীঠে ভূষণ পাৱাৰ এণ্ড স্টীল লিমিটেডৰ (বিপি এছ এল) দেউলীয়া অৱস্থা বিষয়ত উচ্চতম ন্যায়ালয়ৰ ২ মে'ৰ ৰায়ৰ পুনৰীক্ষণ আৱেদনৰ শুনানি গ্রহণ কৰিছিল। এই শুনানিৰ আনকেইজন ন্যায়াধীশ আছিল সতীশ চন্দ্র শর্মা আৰু কে বিনোদ চন্দ্রন। উচ্চতম ন্যায়ালয়ে কোম্পানীটোৰ অৱসায়ন (লিকুইডেশ্যন) ৰ নিৰ্দেশ দিছিল। এই পুনৰীক্ষণৰ শুনানিৰ সময়ত ই ডিৰ কামৰ পৰিণামে পি এম এল এৰ অধীনত ইয়াৰ ব্যাপক ক্ষমতাৰ যুক্তি দিয়েনে বুলি ভাৰতৰ মুখ্য ন্যায়াধীশ গৱয়ে প্রশ্ন কৰে, 'দোষী সাব্যস্তকৰণৰ হাৰ কিমান?' তেতিয়া ই ডিৰ হৈ ওকালতি কৰা ছলিচিটৰ জেনেৰেল তুষাৰ মেহতাই স্বীকাৰ কৰে কম। গৱয়ে পুনৰ কয়, 'আনকি যদিও তেওঁলোক দোষী সাব্যস্ত নহয়, আপোনালোকে বিচাৰ অবিহনে তেওঁলোকক বছৰ বছৰ ধৰি শাস্তি দিয়াত সফল হৈছে।'গৱয়ে আঙুলিয়াই দিয়ে যে বিচাৰৰ আগতে দীঘলীয়াকৈ জিম্মাত লোৱা আৰু পি এম এল এব অধীনত জামিনৰ কঠোৰ চৰ্তই প্রায়ে বায়দানৰ আগতে শাক্তি দিয়ে। 

ন্যায়াধীশ সূর্য কান্ত, উজ্জ্বল ভূঞা আৰু এন কোটিশ্বৰ সিঙে গ্রহণ কৰা আনটো শুনানিত পীঠে ই ডিক কয়, 'আপোনালোকে ঠগৰ দৰে কাম কৰিব নোৱাৰে। আপোনালোকে আইনৰ গণ্ডীৰ ভিতৰত কাম কৰিব লাগিব।' ন্যায়াধীশ উজ্জ্বল ভূঞাই কয়, 'আইন বলবৎকাৰী সংস্থা আৰু আইন উলংঘনকাৰী সংস্থাৰ মাজত এটা পার্থক্য আছে। চাওকচোন মই এটা গোচৰত কি কৈছিলোঁ... এজন মন্ত্রীয়ে সংসদত যি কৈছিল সেয়া সত্য হৈছে। ৫,০০০ গোচৰৰ পাছত ১০টাতকৈও কম দোষী সাব্যস্তকৰণ।'

Share This