আফগানিস্তানৰ হাতত পৰাজিত হৈ ইংলেণ্ডৰ বিদায়

Kakali Deka February 27, 2025

ডিজিটেল ডেস্কঃ ইংলেণ্ডে চেম্পিয়নছ ট্ৰফীৰ গ্ৰুপ-বিৰ এখন মেচত আফগানিস্তানৰ হাতত ১৩ ৰানত পৰাজিত হৈ প্রতিযোগিতাৰ পৰা বাহিৰ হয়। ইংলেণ্ড প্রথমখন মেচত অষ্ট্ৰেলিয়াৰ হাতত পৰাজিত হৈছিল। আফগানিস্তানে প্রথমে বেটিং কৰি ইংলেণ্ডৰ সন্মুখত জয়ৰ বাবে ৩২৬ ৰানৰ লক্ষ্য বান্ধি দিয়ে। জ' ৰুটৰ ১১১টা বলত ১২০ ৰান সত্ত্বেও দলটো জয়ৰ লক্ষ্যত উপনীত হ'ব নোৱাৰিলে আৰু সকলো উইকেট হেৰুৱাই ৩১৭ ৰানহে গোটায়।

ইয়াৰ আগতে মেচখনত আফগানিস্তানৰ বেটাৰ ইব্রাহিম জাড্ৰানে এক অভিলেখ গঢ়ে। মেচখনত আফগানিস্তানে প্রথমে বেটিং কৰে আৰু মাত্র ৩৭ ৰানতে তিনিটা উইকেট হেৰুৱাই সংকটত পৰে। সেই সময়তে অ'পেনাৰ জাড্রানে ইংলেণ্ডৰ বলাৰসকলক সাৱলীলভাৱে খেলি যাবলৈ লয়। তেওঁ ১৪৬টা বলত ১২টা চাৰি আৰু ৬টা ছয়েৰে কৰা ১৭৭ ৰান হ'ল চেম্পিয়নছ ট্ৰফীত ব্যক্তিগত সর্বাধিক ৰান। তেওঁৰ এই বিস্ফোৰক ইনিংছটোৰ সহায়ত প্রথমে বেটিং কৰা আফগানিস্তানে ৭ উইকেট হেৰুৱাই ৩২৫ ৰান কৰে।

উল্লেখযোগ্য যে মাত্র পাঁচ দিনৰ আগতে অর্থাৎ যোৱা ২২ ফেব্ৰুৱাৰীত ইংলেণ্ডৰ বেন ডাকেটে অষ্ট্ৰেলিয়াৰ বিৰুদ্ধে ১৬৫ ৰান কৰি চেম্পিয়নছ ট্রফীত ব্যক্তিগত সর্বাধিক ৰানৰ অভিলেখ গঢ়িছিল। আজি জাড্রানে তেওঁৰ এই অভিলেখ ভংগ কৰে। উল্লেখযোগ্য যে চেম্পিয়নছ ট্ৰফীত চেঞ্চুৰী কৰা তেওঁ আফগানিস্তানৰ প্ৰথমজন খেলুৱৈ। মেচখনত তেওঁৰ উপৰি অধিনায়ক হছমাতুল্লা শ্বাহিদী আৰু মহম্মদ নবিয়ে ৪০ ৰানকৈ তথা আজমাতুল্লা ওমৰজায়ে ৪১ ৰানৰ বৰঙনি আগবঢ়ায়।

Share This