ৰাছিয়াৰ দখলত থকা ইউৰোপৰ সর্ববৃহৎ পাৰমাণৱিক প্ৰকল্পত বৃহৎ আঘাত

dainik janambhumi August 04, 2025

ডিজিটেল ডেস্কঃ ইউক্রেইনৰ প্ৰকল্পত আজি ড্ৰনেৰে কৰা জাপৰিজিয়া পাৰমাণৱিক আক্রমণত প্রকল্পটোৰ ক্ষতি হোৱাৰ বাতৰি পোৱা গৈছে। জাপৰিজিয়া পাৰমাণৱিক প্রকল্পটো ইউৰোপৰ ভিতৰত সৰ্ববৃহৎ আৰু বিশ্বৰ সৰ্ববৃহৎ প্রকল্পবোৰৰ ভিতৰত প্ৰথম দহটাৰ ভিতৰত অন্যতম। এই প্রকল্পটো ৰাছিয়াৰ দখলত আছে। ইউক্রেইনে কৰা আক্রমণটোত ভালেমান লোক আহত হোৱাৰ লগতে পাৰমাণৱিক প্রকল্পটোৰ ক্ষতি হোৱা বুলি কোৱা হৈছে।

ইউক্রেইনৰ ড্ৰনে পাৰমাণৱিক প্রকল্পটোৰ সেৱা কেন্দ্র এটাত আক্রমণ কৰাৰ পাছত বিস্ফোৰণৰ শব্দ শুনিবলৈ পোৱা যায়। এই আক্রমণটো মূল পাৰমাণৱিক প্ৰকল্পৰ পৰা মাত্ৰ ১২০০ মিটাৰ আঁতৰত কৰা হয়। প্রকল্পটোত বিস্ফোৰণৰ পাছত লগা জুই নিয়ন্ত্ৰণ কৰা হৈছে। আন্তঃৰাষ্ট্ৰীয় পাৰমাণবিক শক্তি নিৰীক্ষণ সংস্থাই (আই এ ই এ) জাপৰিজিয়াত আক্ৰমণ কৰাটো নিশ্চিত কৰিছে। উক্ত সেৱা কেন্দ্ৰটোৰ ব্যাপত ক্ষতি হোৱা বুলিও কোৱা হৈছে। আই এ ই এৰ সঞ্চালক প্রধান ৰাফেল মাৰিয়ানো গ্রছিয়ে জনোৱা মতে উক্ত সেৱা কেন্দ্ৰটোৰ ফালৰ পৰা ধোঁৱা ওলোৱা দেখা যায়।

প্রকল্পটোৰ কৰ্মচাৰীসকলে প্রকাশ কৰা অনুসৰি স্থানীয় সময়মতে আজি পুৱা ৯ বজাৰ পৰা প্ৰকল্পটো ড্ৰনেৰে আক্ৰমণ আৰম্ভ কৰা হয়। আই এ ই এৰ দলে সন্ধিয়ালৈকে প্রকল্পটোৰ পৰা ধোঁৱা ওলাই থকা দেখা পায়। পাৰমাণৱিক প্রকল্পটোত কৰা আক্ৰমণটোৰ পাছত ইউৰোপতো তেজস্ক্রিয় বিকিৰণৰ আশংকা কৰা হৈছে। ইউৰোপত ইতিমধ্যে সতর্কতা জাৰি কৰা হৈছে। অৱশ্যে প্রকল্পটোৰ ৰাছিয়ান প্রশাসকে কয় যে ইউক্রেইনৰ ড্ৰন আক্রমণটোত প্রকল্পটোত এজন লোক নিহত হোৱাৰ বাদে আন কোনো লোক আহত হোৱা নাই। ইয়াৰ লগতে প্রকল্পটোৰ পৰা তেজস্ক্রিয়তাৰ মাত্রা স্বাভাৱিক অৱস্থাত থকা বুলিও কোৱা হৈছে। ইউক্রেইনে আজি প্ৰকাশ কৰা মতে ৰাছিয়াত ড্ৰনেৰে গেছ পাইপলাইন তথা সামৰিক ঘাটিত আক্রমণ কৰে।

ইফালে ৰাছিয়াৰ ছচিত থকা এটা তেলৰ ডিপ'ত ইউক্রেইনৰ ড্ৰনে কৰা আক্ৰমণত ভয়াৱহ জুই লাগে। জুই ইমানেই ভয়াৱহ আছিল যে অগ্নি নির্বাপক বাহিনীৰ শতাধিক গাড়ী জুই নুমোৱাৰ কামত লগোৱা হয়। ভিডিঅ' ফুটেজত দেখা পোৱা মতে কৃষ্ণ সাগৰৰ ক্ৰেছন 'ডাৰত প্রায় ৭০ হাজাৰ ঘনফুট ধাৰণ ক্ষমতাৰ এখন টেংকাৰৰ পৰা ক'লা ধোঁৱা ওলাই আছে। ৰাছিয়াই জাপৰিজিয়াৰ লগতে দক্ষিণ ইউক্রেইনৰ মাইকলাইভত প্রচণ্ড আক্রমণ কৰে। ৰাছিয়াৰ আক্ৰমণত সাতজন লোক আহত হোৱাৰ লগতে ভালেমান ঘৰ ধ্বংসপ্রাপ্ত হয়।

Share This