গাজিয়াবাদত ধৃত ভুৱা ৰাষ্ট্ৰদূতৰ ন ন তথ্য উন্মোচন

dainik janambhumi July 28, 2025

ডিজিটেল ডেস্কঃ উত্তৰ প্ৰদেশৰ গাজিয়াবাদৰ পৰা ভুৱা দূতাৱাসৰ এটা চক্ৰ চলাই থকা হর্ষবর্ধন জৈন নামৰ এজন লোকক গ্ৰেপ্তাৰ কৰা হৈছিল। জৈনক গ্ৰেপ্তাৰ কৰি জেৰা কৰাৰ পাছত বহুতো বিস্ফোৰক তথ্য পোহৰলৈ আহিছে। গ্ৰেপ্তাৰ কৰা হর্ষবর্ধন জৈন প্রায় ৩০০ কোটি টকীয়া এটা কেলেংকাৰিৰ সৈতে জড়িত থকাৰ সন্দেহ কৰিছে আৰক্ষীয়ে।

যোৱা ১০ বছৰত জৈনে ১৬২ বাৰ বিদেশ ভ্রমণ কৰিছে আৰু বিদেশৰ বেংকত তেওঁৰ কেইবাটাও একাউন্ট আছে।

উল্লেখযোগ্য যে উত্তৰ প্ৰদেশ স্পেচিয়েল টাস্ক ফ'ৰ্চে (এছ টি এফ) কৰা অনুসন্ধানত উদ্ধাৰ হৈছিল যে যোৱা সপ্তাহত গ্ৰেপ্তাৰ কৰা জৈনে গাজিয়াবাদৰ এটা দুমহলীয়া ভাৰা ঘৰৰ পৰা এটা ভুৱা দূতাবাস চলাই আছিল। এছ টি এফে প্রকাশ কৰা মতে, জৈন এটা চাকৰি দিয়া ভুৱা চক্ৰৰ লগত জড়িত আছিল আৰু হাৱালাৰ জৰিয়তে ধনৰ অবৈধ সৰবৰাহ কৰিছিল। গাজিয়াবাদৰ ঘৰটোত তালাচী চলোৱাৰ সময়ত ভুৱা কূটনৈতিক নম্বৰ প্লেটৰ সৈতে চাৰিখন বাহন আৰক্ষীয়ে জব্দ কৰিছিল।

তদুপৰি ভুৱা নথিপত্ৰ আৰু কেইবাটাও দামী ঘড়ী উদ্ধাৰ কৰা হৈছিল। আৰক্ষীয়ে কাইলৈ আদালতত জৈনক জিম্মাত লোৱাৰ বাবে আৱেদন কৰিব। আৰক্ষীয়ে সন্দেহ কৰিছে যে জৈন প্রায় ৩০০ কোটি টকাৰ এটা কেলেংকাৰিৰ লগত জড়িত হৈ আছে। উল্লেখযোগ্য যে জৈনৰ দুমহলীয়া ভাৰা ঘৰটোৰ বাহিৰত 'ৱেষ্ট আৰ্থটিকাৰ দূতাবাস' বুলি লিখা আছিল আৰু জৈনৰ নাম ৰাষ্ট্ৰদূত হিচাপে লিখা আছিল। লক্ষণীয় যে বিশ্বত ৱেষ্ট আর্কটিকা বুলি কোনো ৰাষ্ট্ৰ নাই।

Share This