আলোক নাথ আৰু শ্ৰেয়াস তালপাড়েৰ বিৰুদ্ধে এফ আই আৰ দাখিল, কেইবাকোটি টকা মূল্যৰ জালিয়াতিৰ গোচৰ

Kakali Deka January 24, 2025

ডিজিটেল ডেস্কঃ: বলিউড তাৰকাৰ ৰঙীন জীৱনৰ আঁৰত লুকাই থাকে বহু গুপ্ত কাহিনী। এনে এক চাঞ্চল্যকৰ কাহিনী পোহৰলৈ আহিছে হাৰিয়ানাৰ শোনিপাট জিলাৰ মুৰ্থাল থানা অঞ্চলৰ পৰা, য’ত এগৰাকী ব্যক্তিয়ে অভিনেতা শ্ৰেয়াস তালপাড়ে, আলোক নাথসহ ১৩জন তাৰকাৰ বিৰুদ্ধে প্ৰৱঞ্চনা আৰু বিশ্বাসভংগৰ অভিযোগ দাখিল কৰিছে।

এই গোচৰ তৰিছে কৰিছে ছ’নিপেক অঞ্চলৰ বাসিন্দা বিপুল আণ্টিলে। তেওঁৰ অভিযোগ অনুসৰি, 'হিউমেন ৱেলফেয়াৰ ক্ৰেডিট কো-অপাৰেটিভ ছ’চাইটি' নামৰ এক কোম্পানীয়ে সাধাৰণ ৰাইজক প্ৰৱঞ্চনাৰে কোটি কোটি টকা  লুণ্ঠন কৰি উধাও হৈছে। এই কোম্পানীটো ইন্দোৰত পঞ্জীয়নভুক্ত হৈছিল আৰু ৫০ লাখৰো অধিক লোকৰ পৰা ধন সংগ্ৰহ কৰিছিল। বিনিয়োগকাৰীসকলক বৃহৎ লাভৰ প্ৰলোভন দেখুৱাই, কোম্পানীটোৱে বহুজনৰ জীৱনৰ সঞ্চিত ধন লুটিছিল৷ বিশ্বাসযোগ্যতা অৰ্জন কৰিবলৈ কোম্পানীটোৱে বলিউড তাৰকাৰ সৈতে জড়িত থকাৰ অভিনৱ উপায় অৱলম্বন কৰিছিল।

জনপ্ৰিয় অভিনেতা শ্ৰেয়াস তালপাড়ে আৰু আলোক নাথে এই কোম্পানীৰ প্ৰচাৰত সহায় কৰিছিল৷ জনপ্ৰিয় অভিনেতা চনু  ছুদকো ইয়াৰ এক  বিশাল অনুষ্ঠানত মুখ্য অতিথি হিচাপে নিমন্ত্ৰণ জনোৱা হৈছিল। এই কাৰ্যৰে সাধাৰণ ৰাইজৰ মাজত কোম্পানীটোৱে  বিশ্বাসযোগ্যতা আদায় কৰিছিল, যাৰ ফলত বহু লোকে নিজৰ সঞ্চিত ধন কোম্পানীটোত বিনিয়োগ কৰিছিল। প্ৰায় ছয় বছৰৰ আগতে কোম্পানীটোৱে Fixed Deposit আৰু অন্যান্য বিনিয়োগ প্রকল্পৰ জৰিয়তে ধন সংগ্ৰহ কৰিছিল। আৰম্ভণিতে বিনিয়োগকাৰীক লাভৰ অংশ দিয়া হৈছিল, যাতে ৰাইজৰ বিশ্বাস বাঢ়ি যায়।

কিন্তু যেতিয়া কোম্পানীটোৰ হাতত বৃহৎ পৰিমাণৰ ধন সংগ্ৰহ হ’ল, তেতিয়া বিষয়াসকল হঠাৎ উধাও হ’ব ধৰিলে। যেতিয়া বিনিয়োগকাৰীসকলে নিজৰ ধন উভতাই বিচাৰিলে, এই কোম্পানীৰ লোকসকলে যোগাযোগ বিচ্ছিন্ন কৰি পেলালে৷

অৱশেষত বিপুল আণ্টিলে এই সন্দৰ্ভত আৰক্ষীৰ ওচৰত গোচৰ দাখিল কৰে, যাৰ ফলত এতিয়া এই চাঞ্চল্যকৰ কেলেংকাৰি পোহৰলৈ আহিছে।  এতিয়া প্ৰশ্ন উঠিছে, কোনো কোম্পানীৰ প্ৰচাৰত যদি কোনো জনপ্ৰিয় তাৰকা জড়িত থাকে, সেই ক্ষেত্ৰত তেওঁলোকো দায়ী হ'বনে? 
আৰক্ষীয়ে এতিয়া গোচৰ সন্দৰ্ভত তদন্ত আৰম্ভ কৰিছে। লগতে সাধাৰণ ৰাইজক সতৰ্ক হোৱাৰো আহ্বান জনোৱা হৈছে– 'যিকোনো কোম্পানীৰ ৰঙীন প্ৰচাৰ দেখিয়েই বিশ্বাস নকৰিব, অভিযোগ কৰাৰ আগতে ভালদৰে তদন্ত কৰি ল’ব৷'

Share This