কুঁৱাত পৰা গৰু  পোৱালিক বচাবলৈ গৈ ৫ জনৰ মৃত্যু 

Rashmi June 25, 2025

ডিজিটেল ডেস্ক :  কুঁৱাত পৰা এটা গৰু পোৱালিক বচাবলৈ গৈ ৫ জন লোকে সাৱটিলে কৰুণ মৃত্যুক।  মধ্যপ্ৰদেশৰ গুনা জিলাত সংঘটিত হৈছে এই শোকাৱহ দুৰ্ঘটনা। প্ৰাথমিক অনুসন্ধানত দেখা গৈছে যে বিষাক্ত গেছ সম্ভৱতঃ কাৰ্বন মনোক্সাইডৰ বাবে শ্বাসৰুদ্ধ হৈ তেওঁলোকৰ মৃত্যু হৈছিল।

জিলা উপায়ুক্ত কিশোৰ কন্যালে এই ঘটনা মঙলবাৰে পুৱা প্ৰায় ১১ বজাত সংঘটিত হোৱা বুলি অৱগত কৰে। প্ৰাথমিক তথ্য অনুসৰি কুঁৱাত পৰা গৰু পোৱালিটোক উদ্ধাৰ কৰিবলৈ ৬ জন লোক এটা কুঁৱাটোত নামিছিল। ইয়াৰে তিনিজন লোকৰ থিতাতে মৃত্যু হোৱাৰ বিপৰীতে দুজনক সংকটজনক অৱস্থাত গুনা জিলা চিকিৎসালয়লৈ লৈ যোৱা হয় যদিও চিকিৎসাৰ সময়তো তেওঁলোকৰ মৃত্যু হয়। মাত্ৰ এজন ব্যক্তিয়েহে নিৰাপদে ওলাই আহিব পাৰিলে।

তেওঁ কয় যে কুঁৱাটো প্ৰায় ১২ ফুট পানীৰে ভৰি পৰিছিল, যাৰ বাবে উদ্ধাৰ কামত ব্যাপক অসুবিধাৰ সৃষ্টি হৈছিল। চি আই এছ এফৰ গেইল ইউনিট, এছ ডিই আৰ এফ আৰু অন্যান্য সংস্থাৰ দলসমূহে সেই স্থানত উপস্থিত হৈ উদ্ধাৰ অভিযান আৰম্ভ কৰে যদিও তেতিয়ালৈকে পাঁচজন লোকে প্ৰাণ হেৰুৱাইছিল।

ঘটনাৰ তদন্ত কৰি মৃতদেহ কেইটা মৰণোত্তৰ পৰীক্ষাৰ বাবে প্ৰেৰণ কৰা হৈছে বুলি জিলা উপায়ুক্তই জানিবলৈ দিয়ে। জল্পনা-কল্পনা কৰা হৈছে যে কুঁৱাটোত জমা হোৱা গেছৰ ফলত শ্বাসৰুদ্ধ হৈ তেওঁলোকৰ মৃত্যু হয়।

উৎস : প্ৰাগ নিউজ ডিজিটেল

Share This