ফুটবলৰ ছেমি ফাইনেলত অসম

dainik janambhumi February 02, 2025

ডিজিটেল ডেস্ক: কুশলী মিডফিল্ডাৰ তিমথি নাৰ্জাৰীৰ বিজয়সূচক গ'লেৰে ৩৮ সংখ্যক ৰাষ্ট্ৰীয় ক্রীড়াৰ ফুটবল ইভেন্টৰ গ্ৰুপ লীগৰ নিজৰ দ্বিতীয় খেলত অসমে ঘৰুৱা দল উত্তৰাখণ্ডক পৰাভূত কৰি প্রতিযোগিতাৰ ছেমিফাইনেলত প্ৰৱেশ কৰিছে। 

হালদোৱানীৰ ইন্দিৰা গান্ধী আন্তর্জাতিক ক্রীড়া প্রকল্পত অনুষ্ঠিত গ্রুপ-এৰ দ্বিতীয় খেলত মিডফিল্ডাৰ প্ৰজ্ঞান সুন্দৰ গগৈ নেতৃত্বাধীন অসমৰ বিৰুদ্ধে আয়োজক উত্তৰাখণ্ডে আছিল হট ফেভাৰিট। তাৰ বিপৰীতে গভীৰ আত্মবিশ্বাসেৰে শক্তিশালী ৰূপত অৱতীৰ্ণ হৈছিল অসম দলটো। আক্ৰমণ-প্রত্যাক্ৰমণৰ নিজা কৌশল প্রয়োগেৰে বল আৰু খেলপথাৰ নিয়ন্ত্ৰণৰ চেষ্টা চলোৱাত খেলৰ গতিবেগ আৰম্ভণিৰে পৰা তীব্ৰতৰ হ'বলৈ ধৰে। 

তেনে পৰিৱেশতে তিমথিয়ে অসমৰ হৈ বিজয়সূচক গ'লটো দিয়ে খেলৰ ৩৩ মিনিটত মিডফিল্ডৰ পৰা লোৱা এক তীব্রবেগী গ্ৰাউণ্ড শ্বটৰ সহায়ত। ইতিপূৰ্বে গ্ৰুপৰ মেচত অসমে শক্তিশালী গোৱাৰ বিৰুদ্ধে ৩-২ গ'লত জয়ৰে অভিযান আৰম্ভ কৰিছিল। গ্ৰুপৰ তৃতীয় তথা অন্তিমখন মেচত অসম অৱতীৰ্ণ হ'ব মিজোৰামৰ বিৰুদ্ধে। আনহাতে, ছেমিফাইনেল হ'ব অহা ৫ ফেব্ৰুৱাৰীত।

Share This