১০০ টকাৰ বিনিময়তে ফাদিল অৰ্থনীতিৰ প্ৰশ্নকাকতো

dainik janambhumi March 23, 2025

ডিজিটেল ডেস্ক : ৰাজ্যত সম্প্রতি প্রশ্নকাকত ফাদিল হোৱাটো গতানুগতিক ঘটনালৈ পর্যবসিত হৈছে। বিশেষকৈ হাইস্কুল শিক্ষান্ত আৰু উচ্চতৰ মাধ্যমিক চূড়ান্ত পৰীক্ষাৰ প্রশ্নকাকত আগতীয়াকৈ ছাত্ৰ-ছাত্ৰীৰ হাতত পৰাত পৰীক্ষা ব্যৱস্থাটোৰ প্রতি যেন বিশ্বাস হেৰাই গৈছে ছাত্ৰ-ছাত্ৰীসকলৰ। প্ৰশ্নকাকত ফাদিল হোৱাৰ ঘটনাই মেধাৱী ছাত্র-ছাত্রীসকলে পৰীক্ষাত অৱতীৰ্ণ হ'বৰ বাবে কৰা অপৰিসীম পৰিশ্ৰম আৰু প্ৰচেষ্টাক নিমিষতে নাইকিয়া কৰে। 

এনে ঘটনাৰ মাজতে তিনিচুকীয়া জিলাৰ ফিল'বাৰী অঞ্চলৰ উচ্চতৰ মাধ্যমিক একাদশ শ্ৰেণীৰ একাংশ ছাত্ৰ-ছাত্ৰীয়ে ম'বাইল ফ'নৰ জৰিয়তে লাভ কৰে অৰ্থনীতি বিষয়ৰ বাৰ্ষিক চূড়ান্ত পৰীক্ষাৰ প্রশ্নকাকতখন। তদুপৰি, একাংশ ছাত্র-ছাত্রীয়ে ন্যূনতম এশ টকাকৈ পৰিশোধ কৰি প্ৰশ্নকাকতখন পাবলৈয়ো সক্ষম হোৱা বুলি জানিব পৰা গৈছে। প্রথম অৱস্থাত ছাত্র-ছাত্ৰীসকলে প্রশ্নকাকতখন সন্দেহৰ দৃষ্টিৰে চাইছিল যদিও কালি পুৱা পৰীক্ষাত অৱতীৰ্ণ হ'বলৈ পৰীক্ষা হলত বহাৰ পাছত তেওঁলোকৰ মনত থকা এই আৱৰণ খোল খাই পৰে। 

কাৰণ শুকুৰবাৰে তেওঁলোকে পোৱা প্ৰশ্নকাকতখন শনিবাৰে পৰীক্ষাত অৱতীৰ্ণ হোৱা কাকতখনৰ সৈতে হুবহু মিল আছে। আনহাতে, কালি পুৱা এই খবৰ স্থানীয়ভাৱে বিয়পি যোৱাৰ পাছত 'দৈনিক জনমভূমি'ৰ ফালৰ পৰা স্থানীয় আছুৰ নেতৃত্বৰ সৈতে যোগাযোগ কৰাত ফিল'বাৰী আছুৰ সভাপতি সমীৰণ দত্ত আৰু সম্পাদক দ্বীপবিচান সোণোৱালে জনায় যে ফিল'বাৰী ভূঞা গাঁও নিৱাসী বৰা উপাধিৰ ছাত্ৰ এজনে মাৰ্ঘেৰিটাৰ এজন ছাত্ৰৰ পৰা ৱাটছএপৰ জৰিয়তে উচ্চতৰ মাধ্যমিক প্ৰথম বৰ্ষৰ চূড়ান্ত পৰীক্ষাৰ অৰ্থনীতি বিষয়ৰ প্ৰশ্নকাকতখন লাভ কৰে। 

শুকুৰবাৰে নিশাই ফিল'বাৰী আঞ্চলিক ছাত্ৰ সন্থাৰ বিষয়ববীয়াই কথাটো গম পোৱাত ততাতৈয়াকৈ তিনিচুকীয়া জিলা বিদ্যালয় পৰিদৰ্শকক বিষয়টোৰ সন্দৰ্ভত জনায়। পৰিদৰ্শকগৰাকীয়েও বিষয়টো গুৰুত্বসহকাৰে লৈ ছাত্ৰ সন্থাৰ স্থানীয় নেতৃত্বক বিহিত ব্যৱস্থা গ্ৰহণৰ আশ্বাস দিছিল। বিষয় সন্দৰ্ভত তিনিচুকীয়া জিলা বিদ্যালয়সমূহৰ পৰিদৰ্শকৰ সৈতে টেলিফ'নিক যোগাযোগ কৰাত তেওঁ জনায় যে উচ্চতৰ মাধ্যমিক প্ৰথম বৰ্ষৰ বাৰ্ষিক পৰীক্ষাৰ প্ৰশ্নকাকত ফাদিল হোৱাৰ বিষয়টোৰ ক্ষেত্ৰত বিভাগীয় তদন্তৰ ব্যৱস্থা গ্ৰহণ কৰা হৈছে। আনহাতে, প্ৰশ্নকাকত ফাদিলৰ ঘটনাৰ লগত ফিল'বাৰীৰ নাম সাঙুৰি একাংশই ভুৱা বাতৰি পৰিৱেশন কৰাক লৈ ফিল'বাৰীৰ সচেতন ৰাইজে উদ্বেগ প্ৰকাশ কৰিছে।

Share This