লুঙি পিন্ধি থাইলেণ্ডলৈ পলাল বাংলাদেশৰ প্ৰাক্তন ৰাষ্ট্ৰপতি 

dainik janambhumi May 14, 2025

ডিজিটেল ডেস্কঃ বাংলাদেশত মঙলবাৰে পুৱতি নিশা যেতিয়া বেছিভাগ লোকেই পুৱাৰ টোপনিৰ আমেজ লৈ আছিল, সেই সময়তে লুঙী পিন্ধিয়েই এখন বিমানেৰে বাংলাদেশৰ পৰা পলাই গ'ল প্ৰাক্তন ৰাষ্ট্ৰপতি মহম্মদ আব্দুল হামিদ।

 বাতৰি মতে পুৱতি নিশা ৩ বজাত ঢাকা আন্তঃৰাষ্ট্ৰীয় বিমান বন্দৰৰ পৰা থাই এয়াৰৱে'জৰ এখন বিমানেৰে হামিদ থাইলেণ্ডলৈ ৰাওনা হয়। পাছত পুৱা এই কথা ৰাজহুৱা হৈ পৰে। হামিদৰ পলায়নৰ পাছত মহম্মদ ইউনুছৰ নেতৃত্বাধীন অন্তৱৰ্তী চৰকাৰে শিক্ষা বিভাগৰ উপদেষ্টা চি আবৰাৰৰ নেতৃত্বত প্রাক্তন ৰাষ্ট্ৰপতিজন থাইলেণ্ডলৈ ৰাওনা হোৱা সন্দৰ্ভত তদন্তৰ বাবে এখন উচ্চ পৰ্যায়ৰ সমিতি গঠন কৰে। আনহাতে কিছু আৰক্ষী বিষয়াক বদলি কৰাৰ উপৰি কিছু বিষয়াক নিলম্বন কৰা হয়।

 উল্লেখযোগ্য যে যোৱা বছৰ শেখ হাছিনাৰ বিৰুদ্ধে হোৱা আন্দোলনৰ সময়ত প্ৰতিবাদকাৰীৰ বিৰুদ্ধে কঠোৰ ব্যৱস্থা লোৱা যিসকলৰ বিৰুদ্ধে তদন্ত হৈ আছিল, সেইসকলৰ ভিতৰত প্ৰাক্তন ৰাষ্ট্ৰপতি হামিদো আছে। আব্দুল হামিদে দুটা কার্যকাল ২০১৩ চনৰ পৰা ২০২৩ চনলৈ বাংলাদেশৰ ৰাষ্ট্ৰপতিৰূপে কাৰ্যনিৰ্বাহ কৰিছিল। ২০২৪ চনৰ আন্দোলনৰ সময়ৰ পৰা প্রাক্তন প্রধানমন্ত্রী শেখ হাছিনা আৰু তেওঁৰ সহযোগীৰ বিৰুদ্ধে ৰুজু হোৱা হত্যাৰ গোচৰত নাম আছে হামিদৰ। 'ঢাকা ট্রিবিউন'ৰ মতে হাছিনা আৰু অন্যান্যসকলৰ সৈতে ৮১ বছৰীয়া হামিদকো এই বছৰৰ ১৪ জানুৱাৰীত কিশোৰগঞ্জ সদৰ থানাত ৰুজু হোৱা এটা হত্যাৰ গোচৰত অভিযুক্ত কৰা হৈছে। হামিদৰ পৰিয়ালৰ মতে তেওঁ ভাতৃ আৰু ভনী জোঁৱায়েকৰ সৈতে চিকিৎসাৰ বাবে গৈছে। কিন্তু তেওঁৰ ৰাজনৈতিক বিৰোধীৰ মতে যিহেতু তেওঁৰ বিচাৰ চলি আছে, সেয়ে তেওঁ বিমানেৰে পলায়ন কৰিছে। 

সংবাদ মাধ্যমসমূহত প্ৰকাশ পোৱা চি চি টিভিৰ ফটো, ভিডিঅ'ত এখন হুইল চেয়াৰত লুঙী পিন্ধা হামিদক দেখা গৈছে।

Share This