ডিজিটেল ডেস্ক : প্ৰাক্তন অগপ নেতা তথা গৃহ মন্ত্ৰী ভৃগু ফুকনৰ কন্যা উপাসা ফুকনে আজি ৰহস্যজনকভাৱে মৃত্যুক সাবটি লয়। মহানগৰীৰ খাৰঘুলিস্থিত বাসগৃহৰ ছাঁদৰ পৰা পৰি মৃত্যুক সাবটি লয় যুৱতীগৰাকীয়ে। এই ঘটনাই এতিয়া সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে।
জানিব পৰা মতে ঘৰৰ দ্বিতীয় মহলাৰ ছাঁদৰ পৰা পিছলি পৰি মৃত্যুক সাবটি লয় যুৱতীগৰাকীয়ে। ঘটনাৰ সময়ত ঘৰত উপস্থিত আছিল যুৱতীগৰাকীৰ মাতৃ ইন্দিৰা ফুকন। ভৃগু কুমাৰ ফুকনৰ একমাত্ৰ সন্তান আছিল উপাসা ফুকন।
আনহাতে, ঘটনা সংঘটিত হোৱাৰ পাছতেই আৰক্ষী ঘটনাস্থলীত উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। অৱশ্যে এয়া দুৰ্ঘটনা নে আত্মহত্যা এতিয়ালৈকে জানিব পৰা হোৱা নাই। মৰণোত্তৰ পৰীক্ষাৰ অন্ততহে মৃত্যুৰ প্ৰকৃত কাৰণ জানিব পৰা যাব। এই সমগ্ৰ ঘটনা সন্দৰ্ভত আৰক্ষীয়ে বৰ্তমান তদন্ত অব্যাহত ৰাখিছে।