পহলগাম আক্ৰমণক লৈ গভীৰ দুখ প্ৰকাশ প্ৰাক্তন পাকিস্তানী ক্ৰিকেটাৰ মহম্মদ হাফিজৰ

dainik janambhumi April 25, 2025

ডিজিটেল ডেস্কঃ মঙলবাৰে সংঘটিত হোৱা পহলগামৰ আক্ৰমণৰ ঘটনাই সমগ্ৰ বিশ্বকে কঁপাই গ’ল। পহলগামৰ বেছৰন উপত্যকাত সন্ত্ৰাসবাদীয়ে পৰ্যটক আৰু স্থানীয় লোকৰ ওপৰত নিৰ্বিচাৰ গুলীচালনা কৰে। এই আক্ৰমণত পৰ্যটক আৰু স্থানীয় লোককে ধৰি ২৬জন লোক নিহত হোৱাৰ লগতে কেইবাগৰাকীও লোক আহত হয়। 

ছ’চিয়েল মিডিয়াতো এই সমগ্ৰ আক্ৰমণক তীব্ৰ গৰিহণা দিছে বিশ্বৰ ভিন্ন প্ৰান্তৰ লোকে। এতিয়ালৈকে পাকিস্তানৰ কোনো খেলুৱৈয়ে এই বিষয়ে একো কোৱা নাছিল যদিও পহলগামৰ ঘটনাক লৈ গভীৰ দুখ প্ৰকাশ কৰিছে পাকিস্তানৰ প্ৰাক্তন ক্ৰিকেটাৰ মহম্মদ হাফিজে। ছ’চিয়েল মিডিয়াত ভাইৰেল হৈছে মহম্মদ হাফিজৰ পোষ্ট। 

পাকিস্তান ক্ৰিকেট দলৰ হৈ দীৰ্ঘদিন ধৰি খেলাৰ লগতে অধিনায়কো আছিল মহম্মদ হাফিজ। এই ঘটনা সন্দৰ্ভত ছ’চিয়েল মিডিয়াত কিবা এটা লিখা তেওঁ প্ৰথমজন পাকিস্তানৰ খেলুৱৈ। মহম্মদ হাফিজে পহলগামৰ আক্ৰমণক দুখজনক আৰু হৃদয় বিদাৰক বুলি অভিহিত কৰিছে। লগতে পহলগাম সন্ত্ৰাসবাদী আক্ৰমণৰ হেচটেগ ব্যৱহাৰ কৰিছে। ঘটনাটোক লৈ দুখ প্ৰকাশ কৰা বাবে পাকিস্তানী লোকে মহম্মদ হাফিজক ট্ৰল কৰিবলৈ আৰম্ভ কৰিছে।

উল্লেখ্য যে এই ঘটনা সন্দৰ্ভত বি চি চি আইয়েও ডাঙৰ সিদ্ধান্ত লৈছে। বৰ্তমান ভাৰতত আই পি এল চলি আছে আৰু বি চি চি আইয়ে সিদ্ধান্ত লৈছে যে বুধবাৰে অনুষ্ঠিত হ’বলগীয়া ছানৰাইজাৰ্ছ হায়দৰাবাদ আৰু মুম্বাই ইণ্ডিয়ানছৰ মাজত অনুষ্ঠিত হ’বলগীয়া খেলখনত সকলো খেলুৱৈয়ে বাহুত ক’লা বেণ্ড পিন্ধিব। লগতে খেলৰ সময়ত চিয়াৰলিডাৰ নাথাকিব আৰু আতচবাজীও নাথাকিব। বি চি চি আইয়ে লগতে জনাইছে যে খেল আৰম্ভ হোৱাৰ পূৰ্বে দুই মিনিট মৌনতা অৱলম্বন কৰা হ’ব, য’ত নিহতসকলৰ আত্মাৰ শান্তিৰ বাবে প্ৰাৰ্থনা কৰা হ’ব।

Share This