আই এম এফৰ কাৰ্যবাহী সঞ্চালক হিচাপে নিযুক্তি আৰ বি আইৰ প্ৰাক্তন গৱৰ্ণৰ উৰ্জিত পেটেলক

Rashmi August 29, 2025

ডিজিটেল ডেস্কঃ ভাৰতীয় ৰিজাৰ্ভ বেংকৰ প্ৰাক্তন গৱৰ্ণৰ উৰ্জিত পেটেলক আন্তঃৰাষ্ট্ৰীয় মুদ্ৰা নিধিৰ কাৰ্যবাহী সঞ্চালক হিচাপে নিযুক্তি দিয়া হৈছে। কেন্দ্রীয় চৰকাৰে জাৰি কৰা আদেশ অনুসৰি এই নিযুক্তি তিনি বছৰৰ বাবে৷

২৮ আগষ্টত পাৰ্ছনেল মন্ত্ৰ্যালয়ে জাৰি কৰা আদেশত কোৱা হৈছে যে কেবিনেটৰ নিযুক্তি সমিতিয়ে উৰ্জিত পেটেলৰ নিযুক্তিত অনুমোদন জনাইছে। এতিয়া তেওঁ আই এম এফত ভাৰতক প্ৰতিনিধিত্ব কৰিব।

আৰ বি আইৰ এক গুৰুত্বপূৰ্ণ কাৰ্যকাল

২০১৬ চনৰ ছেপ্টেম্বৰ মাহত ৰঘুৰাম ৰাজনৰ পিছত উৰ্জিত পেটেলে ২০১৬ চনৰ ৪ ছেপ্টেম্বৰত ভাৰতীয় ৰিজাৰ্ভ বেংকৰ দায়িত্ব লয় ২৪সংখ্যক গৱৰ্ণৰ হিচাপে। কিন্তু ২০১৮ চনৰ ডিচেম্বৰ মাহত কাৰ্যকাল সম্পূৰ্ণ হোৱাৰ পূৰ্বেই পদত্যাগ কৰে। সেই সময়ত তেওঁ ব্যক্তিগত কাৰণ উল্লেখ কৰিছিল। ১৯৯০ চনৰ পিছত কাৰ্যকাল সমাপ্ত হোৱাৰ পূৰ্বেই এই পদ ত্যাগ কৰা প্ৰথমজন কেন্দ্ৰীয় বেংকৰ গৱৰ্ণৰ হিচাপে পৰিগণিত হয়।

ইয়াৰ পূৰ্বেও আই এম এফৰ সৈতে জড়িত

উৰ্জিত পেটেল প্ৰথমবাৰৰ বাবে নহয় তেওঁ পূৰ্বেও আই এম এফৰ সৈতে জড়িত আছিল । ১৯৯৬-৯৭ চনত তেওঁ আই এম এফৰ পৰা ডেপুটেশ্যনত আৰ বি আইলৈ আহিছিল আৰু সেই সময়ছোৱাত তেওঁ ঋণ বজাৰ, বেংকিং খণ্ডৰ সংস্কাৰ, পেঞ্চন ফাণ্ড সংস্কাৰ আৰু বৈদেশিক মুদ্ৰাৰ বজাৰৰ ওপৰত পৰামৰ্শ দিছিল। ইয়াৰ পিছত ১৯৯৮ চনৰ পৰা ২০০১ চনলৈ বিত্ত মন্ত্ৰালয়ৰ পৰামৰ্শদাতা হিচাপে কাৰ্যনিৰ্বাহ কৰে।

ৰাজহুৱা আৰু ব্যক্তিগত খণ্ডত গুৰুত্বপূৰ্ণ দায়িত্ব পালন

আৰ বি আইৰ গৱৰ্ণৰৰ উপৰি উৰ্জিত পেটেলে বহু গুৰুত্বপূৰ্ণ পদত কাম কৰি আহিছে। ৰাজহুৱা আৰু ব্যক্তিগত খণ্ডতো বিভিন্ন ভূমিকা পালন কৰি আহিছে। এতিয়া ভাৰতৰ অৰ্থনৈতিক আৰু বিত্তীয় কৌশলৰ ক্ষেত্ৰত আই এম এফ (আন্তঃৰাষ্ট্ৰীয় মুদ্ৰা নিধি)ত তেওঁৰ নিযুক্তি গুৰুত্বপূৰ্ণ বুলি বিবেচিত হৈছে।

উৎস : প্ৰাগ নিউজ ডিজিটেল

নিতৌ চুৰি-কাণ্ডৰে ৰাইজৰ নিদ্ৰা হৰণ কৰা কুখ্যাত চোৰৰ দলক গ্ৰেপ্তাৰ মঙলদৈ আৰক্ষীৰ