গুজৰাট এ টি এছৰ বৃহৎ সাফল্য, আল কায়দাৰ ৪টা সন্ত্রাসবাদীক গ্ৰেপ্তাৰ

dainik janambhumi July 24, 2025

ডিজিটেল ডেস্কঃ গুজৰাট সন্ত্রাসবাদ-বিৰোধী স্কোৱাডে (এ টি এছ) বুধবাৰে ভাৰত উপমহাদেশৰ আল কায়দাৰ সৈতে জড়িত এটা চক্রক উৎখাত কৰিবলৈ সক্ষম হয়। গুজৰাট এ টি এছৰ বিষয়াসকলে প্রকাশ কৰা অনুসৰি, বিভিন্ন নিৰাপত্তা বাহিনীৰ সৈতে যুটীয়াভাৱে অভিযান চলাই চোৰাংচোৱাৰ খবৰৰ ভিত্তিত আল কায়দাৰ সৈতে জড়িত চাৰিজন সদস্যক গ্ৰেপ্তাৰ কৰা হয়। 

গ্ৰেপ্তাৰ কৰা অভিযুক্তকেইটাক দিল্লীৰ মহম্মদ ফেইক, আহমেদাবাদৰ মহম্মদ ফাৰদিন, আৰাৱলীৰ চেফুল্লা কুৰেশ্বী আৰু নয়দাৰ জেশ্বান আলী বুলি চিনাক্ত কৰা হৈছে। ভাৰত উপ-মহাদেশৰ আল কায়দাৰ সৈতে লোককেইজন জড়িত থকা বিষয়টো সূক্ষ্মভাৱে নিৰীক্ষণ কৰি থকা হৈছিল। গুজৰাট এ টি এছৰ ডি আই জি সুনীল যোশীয়ে কয় এই নিষিদ্ধ সংগঠনৰ সদস্যকেইটাই সমগ্র দক্ষিণ এছিয়াৰ লগতে ভাৰততো মৌলবাদী কার্যকলাপত জড়িত আছিল আৰু সন্ত্রাসবাদৰ বাবে পুঁজি সংগ্রহ কৰিছিল। তদুপৰি, সিহঁতে সিহঁতৰ যোগাযোগৰ স্থিতি নাইকিয়া কৰিবলৈ এটা স্বয়ংক্রিয়ভাৱে মচি দিব পৰা এপ এটা ব্যৱহাৰ কৰিছিল। চাৰিওটা সন্ত্রাসবাদীকে বৰ্তমান জেৰা চলাই থকা হৈছে। গুজৰাট এ টি এছে এই সন্দর্ভত অধিক তথ্য উদ্ধাৰৰ বাবে তদন্ত অব্যাহত ৰাখিছে।

Share This