গেংষ্টাৰ ভগৱান পুৰীয়াক  শিলচৰ কেন্দ্ৰীয় কাৰাগাৰলৈ স্থানান্তৰিত 

dainik janambhumi March 24, 2025

ডিজিটেল ডেস্কঃ পঞ্জাব নার্কটিকছ ব্যুৰ'ই পি আই টি-এন ডি পি এছ আইনৰ অধীনত পঞ্জাবৰ গেংষ্টাৰ ভগৱান পুৰীয়াক গ্ৰেপ্তাৰ কৰি শিলচৰৰ কাৰাগাৰলৈ প্ৰেৰণ কৰিছে। সিন্ধু মুছেৱালা হত্যাকাণ্ডৰ অভিযুক্ত আৰু চোৰাং ব্যৱসায়ৰ লগত জড়িত কুখ্যাত ব্যক্তি ভগৱান পুৰীয়া। শনিবাৰে সন্ধিয়া তেওঁক শিলচৰ কাৰাগাৰলৈ প্ৰেৰণ কৰা বুলি সূত্রই জানিবলৈ দিয়ে।

পঞ্জাব আৰক্ষী আৰু এন চি বিৰ বিষয়াৰ এটা দলে শনিবাৰে সন্ধিয়া বাথিন্দা উচ্চ নিৰাপত্তাৰ কাৰাগাৰৰ পৰা চণ্ডীগড় বিমানবন্দৰলৈ আনি শিলচৰলৈ আহে। তেওঁৰ প্ৰকৃত নাম জগদীপ সিং ভগৱানপুৰীয়া। তেওঁ পি আই টি-এন ডি পি এছ আইনৰ অধীনত গ্ৰেপ্তাৰ হোৱা পঞ্জাবৰ প্ৰথমজন গেংষ্টাৰ। গুৰদাসপুৰৰ কোট চুৰাট আৰক্ষীৰ অধীনস্থ ভগৱানপুৰ গাঁৱৰ বাসিন্দা সিং ভাৰত-পাকিস্তান সীমান্তৰ সীমা অতিক্ৰম কৰি
নিচাযুক্ত দ্রব্য সৰবৰাহৰ কুখ্যাত ব্যক্তি। সূত্ৰসমূহে জনোৱা মতে, এন ডি পি এছ সম্পর্কীয় বিভিন্ন গোচৰত দীর্ঘদিনীয়া কাৰাদণ্ডৰ সময়ছোৱাতো তেওঁ এনক্রিপ্টড যোগাযোগ আৰু অপাৰেটিভৰ বিস্তৃত নেটৱৰ্কৰ জৰিয়তে ড্ৰাগছ সৰবৰাহ, ধন দাবী আৰু হিংসাত্মক কাৰ্যকলাপৰ পৰিকল্পনা অব্যাহত ৰাখিছিল। 

তেওঁৰ অপৰাধমূলক পৰিক্ৰমা আচৰিত ধৰণৰ। তেওঁৰ বিৰুদ্ধে এন ডি পি এছ আইনৰ অধীনত ১২টা গোচৰকে ধৰি ১২৮টা গোচৰ লিপিবদ্ধ কৰা হৈছে। সূত্রসমূহে জনোৱা মতে, বিশদ তদন্তত তেওঁৰ জে'লভিত্তিক কার্যকলাপৰ
প্রমাণ উন্মোচন হোৱাৰ পাছত পি আই টি-এন ডি পি এছৰ গোচৰটোত য'ত তেওঁৰ সহযোগীৰ জৰিয়তে যোগান সমন্বয়ৰ বাবে চোৰাংচোৱা ম'বাইল ডিভাইচ ব্যৱহাৰ কৰা হৈছিল। তেওঁৰ কিছুমান সহঅভিযুক্তৰ সাক্ষ্যই পঞ্জাবৰ অবৈধ ড্রাগ ব্যৱসায়ত তেওঁৰ নেতৃত্বৰ ভূমিকাক আৰু অধিক নিশ্চিত কৰিছে। তেওঁৰ গোচৰসমূহত পিষ্টল, ৰিভলভাৰ আৰু গোলা-বাৰুদ আদি অবৈধ আগ্নেয়াস্ত্র জব্দ কৰাৰ অভিযোগ আছে।

চোৰাংচোৱাৰ প্রতিবেদনে কানাডা আৰু আমেৰিকাৰ পাকিস্তান ভিত্তিক যোগানকাৰী আৰু আন্তঃৰাষ্ট্ৰীয় নেটৱৰ্কৰ সৈতে সিং জড়িত থকাৰ ইংগিত দিয়ে। যিয়ে তেওঁৰ কাৰ্যকলাপৰ আন্তঃৰাষ্ট্ৰীয় প্ৰকৃতি আৰু ভাৰতৰ অভ্যন্তৰীণ নিৰাপত্তাৰ প্ৰতি থকা বিপদৰ ওপৰত গুৰুত্ব আৰোপ কৰে।

ভাৰত চৰকাৰৰ যুটীয়া সচিব (পি আই টি-এন ডি পি এছ)ৰ ২১ মার্চ তাৰিখে দিয়া এক নির্দেশনাৰ পাছতে নার্কটিক কন্ট্রল ব্যুৰ' (এন চি বি)য়ে তেওঁক বাথিন্দাৰ উচ্চ নিৰাপত্তাসম্পন্ন কাৰাগাৰৰ পৰা অসমৰ শিলচৰ কেন্দ্ৰীয় কাৰাগাৰলৈ তাৎক্ষণিকভাৱে স্থানান্তৰ কৰে। এই পদক্ষেপে পঞ্জাব আৰু ওচৰৰ অঞ্চলত গঢ় লৈ উঠা অপৰাধীৰ নেটৱৰ্কৰ ক্ষেত্ৰত তেওঁৰ শক্তিশালী দখল ভাঙি পেলাবলৈ বিচৰা বুলি এটা সূত্রই লগতে কয়।

Share This