ইৰান আক্ৰমণৰ কৰ্তৃত্ব দিলে ইজৰাইলক

dainik janambhumi March 24, 2025

ডিজিটেল ডেস্ক : মধ্য প্রাচ্যৰ পৰিস্থিতি অধিক বেয়াৰ ফালে ঢাল খোৱাৰ আশংকা কৰা হৈছে। ইয়াৰ মূলতে হ'ল আমেৰিকাৰ ৰাষ্ট্ৰপতি ড'নাল্ড ট্রাম্পে ইৰানত আক্ৰমণ কৰাৰ কাৰণে ইজৰাইলক পূৰ্ণ কর্তৃত্ব দিয়াটো। উল্লেখযোগ্য যে ইয়াৰ পূৰ্বে আমেৰিকাৰ কোনো প্রশাসনে ইৰানত আক্ৰমণৰ কাৰণে ইজৰাইলক মুকলিকৈ সমর্থন জনোৱা নাছিল। 

ইয়াৰ লগতে ইৰান ভূ-খণ্ডত থকা পাৰমাণৱিক প্রকল্প বিধ্বস্ত কৰিব পৰাকৈ ইজৰাইলত আমেৰিকাই বি-৫২ যুঁজাৰু বিমান মোতায়েন কৰিছে। আমেৰিকাৰ প্ৰতিৰক্ষা সচিব পিট হেগছেথে কয় যে ইৰানে হুথী বিদ্রোহীক সমর্থন দি অহাটো বন্ধ নকৰিলে দেশখনে ইয়াৰ ফল ভোগ কৰিব লাগিব। ইফালে, আমেৰিকাৰ ভাবুকিৰ প্ৰতি লক্ষ্য ৰাখি ইৰানে তিনিটা গুৰুত্বপূৰ্ণ দ্বীপত নতুন ক্ষেপণাস্ত্ৰ নিৰীক্ষণ প্ৰণালী মোতায়েন কৰিছে। 

এই দ্বীপ তিনিটা হৰমুজ প্রণালীৰ কাষত আছে। ইৰানে প্রায় ছশ কিল'মিটাৰলৈ লক্ষ্যভেদী ক্ষমতা থকা এই ক্ষেপণাস্ত্র প্রণালী মোতায়েন কৰে গ্ৰেটাৰ টুম্ব, লেছাৰ টুম্ব আৰু আবু মুছাত। ইৰানৰ ৰিভলিউশ্যনেৰী গার্ড কর্পছৰ এজন বিষয়াই কয় যে এই দ্বীপ তিনিটাত দেশখনৰ সামৰিক শক্তি বৃদ্ধি কৰাৰ প্ৰধান কাৰণ হ'ল ইয়াৰ পৰা শত্ৰুৰ ঘাটি, জাহাজ আৰু আন সামৰিক স্থানসমূহত সহজে আক্ৰমণ কৰিব পাৰি।

Share This